సిటీలో ఇళ్లు కట్టుకునేవారికి బిగ్ రిలీఫ్.. మంత్రి నారాయణ కీలక ప్రకటన

నగరాల్లో ఇళ్లు నిర్మించుకోవాలంటే సవాలక్ష అడ్డంకులు.. ప్లాన్ అవ్రూవల్ కోసం మున్సిపల్ అధికారులు చుట్టూ కాళ్లరిగేలా తిరిగినా కొన్నిసార్లు ఫలితం ఉండదు. పేదలు, మధ్యతరగతి ప్రజలకు ఇదో పెద్ద టాస్క్. ఓ పట్టాన అధికారుల నుంచి అనుమతులు రావు. ఇలాంటి వారి ఇబ్బందులను గుర్తించిన ప్రభుత్వం.. నగరాల్లో నిర్మించే 100 గజాల్లోపు గృహాలకు ‘ప్లాన్‌ అప్రూవల్’ ప్రక్రియను మినహాయించేందుకు సిద్ధమైంది. దీనిపై చర్యలు తీసుకుంటామని మున్సిపల్‌, పట్టణాభివృద్ధి శాఖ మంత్రి పి.నారాయణ తెలిపారు. విశాఖ జిల్లాలో శనివారం పర్యటించిన ఆయన.. అధికారులతో సమీక్షా సమావేశం నిర్వహించారు.

 ఈ సందర్భంగా మంత్రి నారాయణ మాట్లాడుతూ... భవన నిర్మాణ అనుమతుల విధానాలు పరిశీలించి పేద, మధ్యతరగతి ప్రజలకు మేలు జరిగేలా నిర్ణయం తీసుకుంటామని చెప్పారు. అలాగే, 300 గజాల్లోపు ఇళ్లకు సులభతరంగా ప్లాన్‌ ఆమోదం వచ్చేలా ప్రణాళికలు రూపొందిస్తామని ఆయన పేర్కొన్నారు. పెండింగ్‌ దస్త్రాల వివరాలను డీటీసీపీ (డైరెక్టర్‌ టౌన్‌ అండ్‌ కంట్రీప్లానింగ్‌) వెబ్‌సైటలో నమోదు చేయిస్తున్నామని మంత్రి చెప్పారు.

టీడీఆర్‌‌ల వివరాలు, ఇతర అంశాలు ఆన్‌లైన్‌లోనే ఉంచుతున్నట్లు ప్రకటించారు. ఇక, వీఎంఆర్‌డీఏ ప్రాజెక్టుల పురోగతిపై ఆరా తీసిన నారాయణ.. పెండింగ్‌ పనులు త్వరితగతిన పూర్తి చేయాలని అధికారులకు సూచించారు. మాస్టర్‌ప్లాన్‌ రహదారుల రూపకల్పన, నిధుల సమీకరణ, మెట్రో రైలు డీపీఆర్, టిడ్కో ఇళ్ల పురోగతి వంటి అంశాలపై కూడా చర్చించారు. ఈ సమీక్షలో విశాఖ జిల్లా ఇంఛార్జి మంత్రి డాక్టర్‌ డోలా శ్రీ బాల వీరాంజనేయస్వామి, విశాఖ ఎంపీ శ్రీభరత్‌, జీవీఎంసీ, వీఎంఆర్‌డీఏ అధికారులు పాల్గొన్నారు.

ఇదిలా ఉండగా, విశాఖ నగరంలోని రిషికొండపై గత ప్రభుత్వ హయాంలో నిర్మించిన విలాసవంతమైన భవనాలను సీఎం చంద్రబాబు నాయుడు శనివారం పర్యటించారు. ఈ సందర్భంగా మాజీ సీఎం వైఎస్ జగన్మోహన్ రెడ్డిపై ఆయన విమర్శలు గుప్పించారు. పర్యావరణ ఉల్లంఘనకు పాల్పడిన జగన్.. గత ఐదేళ్లలో విశాఖను దోచుకున్నారని చంద్రబాబు తీవ్ర స్థాయిలో ఆరోపించారు. అంతేకాదు, రాజకీయాలకు అతడు పూర్తిగా అనర్హుడని దుయ్యబట్టారు.