ఈ నెల 11 నుంచి ఏపీ అసెంబ్లీ సమావేశాలు.. ఆ రోజునే సభలో పూర్తిస్థాయి బడ్జెట్

ఆంధ్రప్రదేశ్ అసెంబ్లీ సమావేశాలు నవంబరు 11 నుంచి ప్రారంభం కానున్నాయి. ఈ సమావేశాల్లో పూర్తిస్థాయి బడ్జెట్‌ను కూటమి ప్రభుత్వం ప్రవేశపెట్టనుంది. అసెంబ్లీ ఎన్నికల్లో విజయం సాధించి, జూన్‌లో కూటమి ప్రభుత్వం ఏర్పడిన తర్వాత ఇప్పటి వరకూ పూర్తిస్థాయి బడ్జెట్‌ను ప్రవేశపెట్టకుండా.. ఓటాన్ అకౌంట్‌తోనే నెట్టుకొస్తున్నారు. ఓటాన్‌ అకౌంట్‌ బడ్జెట్‌ ఈ నెలాఖరుతో ముగియనుండగా.. పూర్తిస్థాయి బడ్జెట్‌ను ప్రవేశపెట్టనున్నారు. అసెంబ్లీ సమావేశాలు ప్రారంభమైన రోజునే బడ్జెట్ ఉంటుంది. ఉదయం 10 గంటలకు రాష్ట్ర ప్రభుత్వం వార్షిక బడ్జెట్‌ను సభలో ప్రవేశపెట్టనుంది. అటు, కనీసం పదిరోజుల పాటు అసెంబ్లీ సమావేశాలు నిర్వహించాలని ప్రభుత్వం భావిస్తోంది. బడ్జెట్‌తోపాటు ఇతర బిల్లులను సభ ముందుకు తీసుకురానుంది.

ప్రభుత్వం ఏర్పడి 4 నెలలు దాటుతుండటంతో శీతాకాల సమావేశాలు నిర్వహించాలని ప్రభుత్వం భావిస్తోంది. ఇందులో భాగంగా ఈ అసెంబ్లీ సమావేశాలు జరగనున్నాయి. ఇక, నవంబర్‌ 6న రాష్ట్ర మంత్రివర్గం సమావేశం నిర్వహించాలని ఇప్పటికే నిర్ణయించింది. ఇందులో పలు కీలక నిర్ణయాలు తీసుకునే అవకాశం ఉంది. ఎన్నికల్లో ఇచ్చిన సూపర్ సిక్స్ హామీలను ఒక్కొక్కటిగా అమలు చేస్తోన్న కూటమి ప్రభుత్వం.. దీపావళి రోజున ఉచిత సిలిండర్ పథకం ప్రారంభించిన విషయం తెలిసిందే.

బుధవారం జరగబోయే క్యాబినెట్‌లోనూ మరో హమీ అమలుపై నిర్ణయం తీసుకుంటారని తెలుస్తోంది. మహిళలకు ఉచిత బస్సుకు సంబంధించి క్యాబినెట్ చర్చించే అవకాశం ఉందని భావిస్తున్నారు. అధికారంలోకి వచ్చిన వెంటనే ఈ పథకం అమలవుతుందని భావించినా.. దీనిపై సీఎం చంద్రబాబు నాయుడు లోతుగా అధ్యయనం చేసిన తర్వాతే నిర్ణయం తీసుకోవాలని భావించారు. అందుకే ఈ పథకం అమలవుతోన్న కర్ణాటక, తెలంగాణలో అధికారులు అధ్యయనం చేసి నివేదికను సమర్పించారు.

ఇక, అసెంబ్లీ సమావేశాలకు వస్తే కొత్త ప్రభుత్వం ఏర్పడిన తర్వాత రెండుసార్లు అసెంబ్లీ సమావేశాలు జరిగాయి. జూన్‌లో కొత్త ఎమ్మెల్యేల ప్రమాణస్వీకారం కోసం.. ఆ తర్వాత జులై చివరి వారంలో ఐదు రోజుల పాటు నిర్వహించారు. ఈ సమావేశంలోనే మూడు నెలల కాలపరిమితికి ఓటాన్ అకౌంట్ పద్దును ప్రభుత్వం తీసుకొచ్చిన విషయం తెలిసిందే.