సంజూ శాంసన్‌పై దక్షిణాఫ్రికా కెప్టెన్ మార్‌క్రమ్ ప్రశంసల వర్షం

వరుసగా రెండు టీ20ల్లో సెంచరీ సాధించిన తొలి భారత బ్యాటర్‌గా సంజూశాంసన్‌ నిలిచాడు. తాజాగా దక్షిణాఫ్రికాపై కేవలం 50 బంతుల్లోనే 107 పరుగులు చేశాడు. భారత్‌ చేతిలో 61 పరుగుల తేడాతో సౌతాఫ్రికా  ఓటమి పాలైంది. ఈ మ్యాచ్‌లో ఫలితం తీవ్ర నిరాశకు గురిచేసిందని.. తమ ప్రణాళికలను సరిగ్గా అమలుచేయలేకపోయినట్లు దక్షిణాఫ్రికా కెప్టెన్ మార్‌క్రమ్ స్పందించాడు. సంజూ శాంసన్‌పై ప్రశంసల వర్షం కురిపించాడు. భారత బ్యాటర్‌ను అభినందించేందుకు తానేమీ మొహమాట పడటం లేదని వ్యాఖ్యానించాడు. ‘‘సంజూశాంసన్‌ ఆట చాలా బాగుంది. మా బౌలర్లను తీవ్ర ఒత్తిడికి గురిచేశాడు. అతడిని అడ్డుకొనే క్రమంలో మా ప్రణాళికలు గతితప్పాయి. వచ్చే మ్యాచుల్లో కొత్త ప్లాన్స్‌తో వస్తాం. ఓవైపు క్రీజ్‌లో పాతుకుపోయి దూకుడుగా ఆడుతుంటే ఆపడం చాలా కష్టం. సంజు ఇన్నింగ్స్‌ను మనమంతా అభినందించాలి. మ్యాచ్‌కు ముందు ప్రణాళికలను ఎలా అమలుచేయాలనే దానిపై తీవ్రంగా చర్చించాం. ఎవరు డెత్ ఓవర్లను వేయాలనేది ఆలోచించుకున్నాం. సంజూశాంసన్‌ భారీ హిట్టింగ్‌తో మిడిల్‌ ఓవర్లలో మేం అనుకున్న ఫలితాన్ని అందుకోలేకపోయాం. కానీ, చివరి నాలుగు ఓవర్లలో కోయిట్జీ, యాన్‌సెన్ అద్భుతంగా బౌలింగ్‌ చేసి భారత్‌ను అడ్డుకోగలిగారు.

మేం టాస్‌ గురించి పెద్దగా ఆలోచించడం లేదు. తొలుత బ్యాటింగ్‌ కాకుండా బౌలింగ్‌ తీసుకోవడంపై చాలామంది వ్యాఖ్యలు చేసి ఉండొచ్చు. అయితే, రెండు ఇన్నింగ్స్‌ల్లోనూ కొత్త బంతితో అదనంగా బౌన్స్‌ వచ్చింది. బంతి పాతబడితే మాత్రం భారీ షాట్లు కొట్టడం మరింత సులువు. కానీ, లక్ష్య ఛేదనలో మాకు సరైన ఆరంభం దక్కలేదు. అక్కడే మ్యాచ్‌లో వెనకబడిపోయాం. బౌలింగ్‌ పరంగా ఏ ఇబ్బంది లేదు. బ్యాటింగ్‌లోనే మేం చాలా మెరుగుకావాల్సి ఉంది. తప్పకుండా రెండో మ్యాచ్‌లోను పుంజుకుంటామని భావిస్తున్నా’’ అని మార్‌క్రమ్‌  వెల్లడించాడు. ఆదివారం రెండో టీ20 మ్యాచ్‌ జరగనుంది