పవన్ కళ్యాణ్‌ను నమ్మి.. కీలక బాధ్యతలు అప్పగించిన ప్రధాని మోదీ

ఆంధ్రప్రదేశ్ డిప్యూటీ సీఎం, జనసేన అధినేత పవన్ కళ్యాణ్‌కు భారతీయ జనతా పార్టీ మరో బాధ్యత అప్పజెప్పింది. పవన్ కళ్యాణ్ జనసేనతో కలిసి ఎన్నికలకు ముందు నుంచి బీజేపీ ప్రయాణం సాగుతోంది. టీడీపీతో బీజేపీ జట్టుకట్టి.. మూడు పార్టీలు కలిసి ఎన్డీఏ కూటమిగా ఆంధ్రప్రదేశ్ అసెంబ్లీ ఎన్నికల్లో బరిలోకి దిగడానికి పవన్ కళ్యాణ్ ఎంతగా కృషిచేశారో అందరికీ తెలిసిన సంగతే. అయితే టీడీపీతో, సీఎం నారా చంద్రబాబు నాయుడుతో పోలిస్తే.. పవన్ కళ్యాణ్‌కు, బీజేపీకి సిద్ధాంతపరంగా కొన్ని సారూప్యతలు ఉన్నాయి. దీంతో బీజేపీ, ప్రధానమంత్రి నరేంద్ర మోదీ కూడా పవన్ కళ్యాణ్‌కు అదే స్థాయిలో ప్రాధాన్యం ఇస్తూ వస్తున్నారు. తాజాగా బీజేపీ పవన్ కళ్యాణ్‌కు మరో బాధ్యత అప్పగించింది.

ప్రస్తుతం దేశంలో కొన్ని రాష్ట్రాల్లో శాసనసభ ఎన్నికలు జరుగుతున్నాయి. అయితే అందరి ఫోకస్ మాత్రం మహారాష్ట్ర అసెంబ్లీ ఎన్నికలపై ఉంది. మహారాష్ట్ర ఎన్నికల్లో విజయం సాధించేందుకు అటు కాంగ్రెస్ నేతృత్వంలోని మహావికాస్ అఘాడీ.. బీజేపీ సారథ్యంలోని మహాయుతి కూటమి హోరాహోరీగా తలపడుతున్నాయి. ఈ నేపథ్యంలోనే మహారాష్ట్ర ఎన్నికల ప్రచారంలోకి పవన్ కళ్యాణ్‌ను దించుతోంది బీజేపీ. మహారాష్ట్ర ఎన్నికల్లో బీజేపీ కూటమి తరుఫున ప్రచారం చేయాల్సిందిగా పవన్ కళ్యాణ్‍ను కోరింది. బీజేపీ అభ్యర్థన మేరకు మహారాష్ట్ర ఎన్నికల్లో పవన్ కళ్యాణ్ ప్రచారం చేయనున్నారు. ఈ మేరకు షెడ్యూల్ కూడా ఖరారైంది. బీజేపీ ఆహ్వానం మేరకు నవంబర్ 16,17 తేదీల్లో పవన్ కళ్యాణ్ మహారాష్ట్ర ఎన్నికల ప్రచారంలో పాల్గొంటారు.

ముఖ్యంగా మహారాష్ట్రలో తెలుగువారు అధికంగా ఉన్న ప్రాంతాల్లో పవన్ కళ్యాణ్ పర్యటన ఉండేలా బీజేపీ ప్లాన్ చేస్తోంది. పవన్ కళ్యాణ్ ఛరిష్మాను ఉపయోగించుకుని ఓట్లు, సీట్లు రాబట్టుకోవాలని బీజేపీ అధిష్టానం పక్కా ప్రణాళిక ప్రకారం ముందుకెళ్తోంది. మొన్నామధ్య జరిగిన తమిళనాడు ఎన్నికల్లోనూ పవన్ కళ్యాణ్ బీజేపీ తరుఫున ప్రచారం చేసిన సంగతి తెలిసిందే. ఇప్పుడు మహారాష్ట్రలోనూ ఎన్నికల ప్రచారం చేయనున్నారు. మరోవైపు తెలంగాణ ముఖ్యమంత్రి రేవంత్ రెడ్డి కాంగ్రెస్ కూటమి తరుఫున మహారాష్ట్రలో ఎన్నికల ప్రచారం నిర్వహించనున్నారు. రెండ్రోజుల పాటు రేవంత్ రెడ్డి ఎన్నికల ప్రచారం జరగనుంది. మొత్తానికి మరాఠా ఎన్నికలకు తెలుగు నేతల ప్రచారం నేపథ్యంలో ఊపొచ్చిందనే చెప్పొచ్చు.

 మరోవైపు 288 మంది సభ్యుల బలమున్న మహారాష్ట్ర శాసనసభకు నవంబర్ 20న ఎన్నికలు జరగనున్నాయి. నవంబర్ 23న ఫలితాలు ప్రకటిస్తారు. ఇక ఎన్నికల్లో విజయం సాధించేందుకు కాంగ్రెస్, బీజేపీ కూటములు హోరాహోరీగా తలపడుతున్నాయి. మరాఠా ఓటర్లను ఆకర్షించేందుకు మ్యానిఫెస్టోలలో వరాల జల్లు కురిపిస్తున్నాయి.