పూజారులమనే సంగతి మరిచి.. ఆలయంలో ఇదేం పని! ఇద్దరు అర్చకులకు మెమోలు

ఆంధ్రప్రదేశ్‌లోని తిరుపతి జిల్లా తలకోన శివాలయానికి సంబంధించి సోషల్ మీడియాలో వీడియో వైరల్ అవుతోంది. ఆలయంలోని ఇద్దరు అర్చకుల మధ్య వివాదం చోటుచేసుకుంది. ఈ వివాదం కాస్తా చిలికి చిలికి గాలివానలా మారి.. పరస్పరం కొట్టుకునే దాకా వెళ్లింది. అయితే వీరు బయట ఎక్కడైనా గొడవ పడి ఉంటే ఇంత చర్చనీయాంశం కాకపోయేదేమో కానీ.. వీరిద్దరూ ఆలయంలోనే గొడవకు దిగారు. అర్చకులుగా ఆలయంలో విధులు నిర్వహిస్తున్నామనే సంగతి మరిచి.. దేవాలయంలోనే పరస్పరం దాడులు చేస్తున్నారు. భక్తుల ముందే గొడవకు దిగారు. ఈ తతంగం మొత్తం అక్కడున్న సీసీ కెమెరాల్లో రికార్డయ్యింది. ఈ వీడియోలు సోషల్ మీడియాలో చక్కర్లు కొడుతున్నాయి.

అసలు విషయంలోకి వస్తే.. తలకోన శివాలయంలో శివప్రసన్న శర్మ, ప్రసాద్‌ అనే ఇద్దరు వ్యక్తులు అర్చకులుగా పనిచేస్తున్నారు. అయితే శివప్రసన్నశర్మ తన కుమారుడైన మనోజ్‌కు ఈ మధ్య సహాయ అర్చక బాధ్యతలు అప్పగించినట్లు తెలిసింది. ఈ విషయంలోనే ఇద్దరి మధ్య గొడవ జరుగుతోంది. తనకు తెలియకుండా, తన సంతకం పెట్టి కుమారుడికి బాధ్యతలు అప్పగించారంటూ ప్రసాద్ ఆరోపిస్తున్నారు. ఈ నేపథ్యంలోనే శివప్రసన్న శర్మ, ప్రసాద్ మధ్య మాటా మాటా పెరిగి.. పరస్పరం దాడి చేసుకునే వరకూ వెళ్లింది. ఆలయంలో భక్తుల సమక్షంలోనే ఇద్దరూ తగవులాడుకున్నారు. ఈ దృశ్యాలన్నీ సీసీ కెమెరాల్లో రికార్డు కాగా.. ప్రస్తుతం నెట్టింట ఈ వీడియో చక్కర్లు కొడుతోంది.

మరోవైపు వీడియో వైరల్ కావటంతో శివప్రసన్న శర్మ, ప్రసాద్ గొడవ వ్యవహారం ఉన్నతాధికారుల వరకూ చేరింది. దీంతో ఆలయంలో గొడవపడిన ఇద్దరు అర్చకులకూ ఈవో మమత మెమో జారీ చేశారు. జరిగిన ఘటనపై ఇద్దరి నుంచి వివరణ తీసుకోనున్నారు. ఆ తర్వాత చర్యలు తీసుకునే అవకాశం ఉంది. అయితే భేదాభిప్రాయాలు ఉంటే కూర్చుని మాట్లాడుకోవాలి కానీ.. ఇలా గుడిలో గొడవకు దిగడం ఏమిటని భక్తులు మండిపడుతున్నారు. అలాగే భక్తులు ఉన్నారనే సంగతి కూడా మర్చిపోయి.. అర్చకులు చేసుకున్న దాడిని తప్పుబడుతున్నారు. వీరిపై చర్యలు తీసుకోవాలని అధికారులను కోరుతున్నారు.