స్పీకర్ అయ్యన్న పాత్రుడు సీరియస్.. ఇంటికి వెళ్తూ వెనక్కి వచ్చి మరీ వార్నింగ్

ఆంధ్రప్రదేశ్ అసెంబ్లీ సమావేశాలు సోమవారం ప్రారంభమైన సంగతి తెలిసిందే. నవంబర్ 11న ప్రారంభమైన ఏపీ అసెంబ్లీ బడ్జెట్ సమావేశాలు ఈ నెల 22 వరకూ కొనసాగనున్నాయి. అయితే సోమవారం నాటి అసెంబ్లీ సమావేశాల తర్వాత ఆంధ్రప్రదేశ్ శాసనసభ స్పీకర్ చింతకాయల అయ్యన్నపాత్రుడు ఓ విషయంలో సీరియస్ అయినట్లు తెలిసింది. సోమవారం ఏపీ అసెంబ్లీలో ఆర్థిక మంత్రి పయ్యావుల కేశవ్ బడ్జెట్ ప్రవేశపెట్టారు. ఇక బడ్జెట్ ప్రసంగం అనంతరం ఏపీ అసెంబ్లీ బుధవారానికి వాయిదా పడింది. అయితే సమావేశాల సందర్భంగా ఎమ్మెల్యేలకు అందించిన భోజనం సరిగా లేదంటూ.. ఏపీ అసెంబ్లీ స్పీకర్ చింతకాయల అయ్యన్నపాత్రుడు మండిపడినట్లు తెలిసింది.

సోమవారం అసెంబ్లీ వాయిదా పడిన తర్వాత కొంతమంది ఎమ్మెల్యేలు అసెంబ్లీలోనే భోంచేశారు. అయితే భోజనం రుచి, నాణ్యత సరిగా లేకపోవటంతో వీరంతా స్పీకర్‌కు ఫిర్యాదు చేశారు. అసెంబ్లీలో ఇచ్చే భోజనం సరిగా లేదని కొందరు ఎమ్మెల్యేలు.. స్పీకర్ వద్ద ఫిర్యాదు చేయటంతో, అయ్యన్నపాత్రుడు అసెంబ్లీ అధికారులు, ఫుడ్ కాంట్రాక్టర్లపై మండిపడ్డారు. ఎమ్మెల్యేలంటే తమాషాగా ఉందా అంటూ మండిపడినట్లు సమాచారం. అదేమైనా భోజనమా అంటూ అధికారులను నిలదీసిన అయ్యన్నపాత్రుడు.. మీరు పెట్టిన భోజనం బాగుందని ఒక్క ఎమ్మెల్యే అయినా అన్నారా అంటూ కాంట్రాక్టరుపై ఆగ్రహం వ్యక్తం చేశారు. అసెంబ్లీ వాయిదా పడిన తర్వాత ఇంటికి బయల్దేరిన స్పీకర్ అయ్యన్న పాత్రుడు.. ఎమ్మెల్యేల ఫిర్యాదుతో వెనక్కి వచ్చి మరీ అధికారులకు వార్ని్ంగ్ ఇచ్చారు.

మాకు ఒక రకంగా, ఎమ్మెల్యేలకు మరో రకంగా భోజనం పెట్టారా అంటూ ఫుడ్ కాంట్రాక్టర్‌ను ప్రశ్నించిన అయ్యన్నపాత్రుడు.. ఎమ్మెల్యేలు అంటే అంత తమాషాగా ఉందా అంటూ సీరియస్ అయ్యారు. ఇష్టానుసారం వ్యవహరిస్తే ఊరుకునేది లేదని.. పద్ధతి మార్చుకోవాలంటూ అయ్యన్నపాత్రుడు వారిని హెచ్చరించారు. మరోవైపు ఎన్డీఏ కూటమి ఎమ్మెల్యేలకు మంగళవారం శిక్షణా కార్యక్రమం నిర్వహించారు.

అసెంబ్లీ కమిటీ హాల్‌లో ఎమ్మెల్యేలకు అవగాహన సదస్సు నిర్వహించారు. ఈ కార్యక్రమానికి హాజరైన సీఎం నారా చంద్రబాబు నాయుడు.. ఎమ్మెల్యేలు నిరంతరం నేర్చుకుంటూనే ఉండాలని సూచించారు. బడ్జెట్‌లో కేటాయింపులపై అధ్యయనం చేయాలన్నారు. పఅసెంబ్లీలో ప్రతిపక్షం లేదనుకోవద్దన్న చంద్రబాబు.. ప్రజాప్రతినిధులుగా మనం ప్రజలకు జవాబుదారీగా ఉండాలని సూచించారు. అసెంబ్లీలో ఏం మాట్లాడతారనేదీ ప్రజలు గమనిస్తుంటారని.. బూతులు మాట్లాడేవారిని ప్రజలు స్వాగతించరని సూచించారు.