రూ.60 దొంగతనం, 27 ఏళ్ల తర్వాత దొరికిన నిందితుడు

తప్పు చేసిన వాడు ఎప్పటికైనా దొరుకుతాడు అనే సామెత ఉంది. అయితే దొంగతనాలు, హత్యలు, ఇతర నేరాలు చేసి.. పోలీసులకు దొరక్కుండా తప్పించుకుని తిరిగేవారు చాలా మంది ఉంటారు. వాళ్లు తమ పేరు, ఊరు, వేషం మార్చేసి.. ఏళ్లకేళ్లు తమ అడ్రస్ తెలియకుండా జాగ్రత్త పడుతూ ఉంటారు. అలాంటి వారు చాలా ఏళ్లకు దొరికిన సంఘటనలు ఉన్నాయి. తాజాగా గతంలో దొంగతనం చేసి పరారైన ఓ వ్యక్తి.. ఏకంగా 27 ఏళ్ల తర్వాత పోలీసులకు చిక్కాడు. అయితే అతడు దొంగతనం చేసింది 27 ఏళ్లు కాగా ఇప్పుడు పోలీసులు పట్టుకోవడం గమనార్హం. తమిళనాడులోని మధురైలో జరిగిన ఈ ఘటన ప్రస్తుతం తెగ చర్చనీయాంశంగా మారింది.

మధురైలో 1997లో జరిగిన దొంగతనం కేసులో తాజాగా నిందితుడిని పోలీసులు అరెస్ట్ చేశారు. శివకాశికి చెందిన 55 ఏళ్ల పన్నీర్ సెల్వంను అరెస్ట్ చేసేందుకు మధురై పోలీసులు స్పెషల్ టీమ్‌ను ఏర్పాటు చేశారు. 27 ఏళ్లుగా పెండింగ్‌లో ఉన్న ఈ కేసులో పరారీలో ఉన్న నిందితుడిని పట్టుకునేందుకు అసిస్టెంట్ కమిషనర్ ఆఫ్ పోలీస్ సూర్యకుమార్ ఆధ్వర్యంలో ఏర్పాటైన ప్రత్యేక బృందం.. ఎట్టకేలకు అతడి జాడను పసిగట్టింది.

1997లో తెప్పకులం అనే పోలీస్ స్టేషన్ పరిధిలో ఈ దొంగతనం జరిగింది. ఇక వివిధ కేసుల్లో పరారీలో ఉన్న నిందితులపై ప్రత్యేక ఎస్సైలు సంతాన పాండియన్‌, పన్నీర్‌ సెల్వన్‌ నేతృత్వంలోని స్పెషల్ టీమ్ దృష్టి సారించింది. ఈ క్రమంలోనే తెప్పకులంలో ఓ వ్యక్తి నుంచి పన్నీర్ సెల్వం రూ.60 దొంగిలించి పరారయ్యాడు. ఆ తర్వాత బాధితుడి ఫిర్యాదుతో కేసు నమోదు చేసుకున్న పోలీసులు.. నిందితుడి కోసం గాలింపు చేపట్టారు. అయితే అతడు దొరక్కపోవడంతో ఈ కేసు పెండింగ్‌లోనే ఉండిపోయింది. దీంతో దీర్ఘకాలంగా పెండింగ్‌లో ఉన్న ఆ కేసును విచారణ జరిపిన స్పెషల్ టీమ్.. జక్కతొప్పును సందర్శించిన సమయంలో.. పన్నీర్ సెల్వం శివకాశి వెళ్లినట్లు గుర్తించారు.

అయితే శివకాశిలో స్థిరపడి అక్కడే పెళ్లి చేసుకున్న నిందితుడు పన్నీర్ సెల్వం.. రహస్య జీవితాన్ని గడిపినట్లు గుర్తించారు. పన్నీర్ సెల్వం ఆచూకీ కనిపెట్టిన పోలీసులు.. జనాభా సర్వేయర్ల ముసుగులో వెళ్లి.. అతడి కుటుంబం నుంచి వివరాలు సేకరించారు. అతడు పన్నీర్ సెల్వం అని నిర్ధారించుకున్న తర్వాత అరెస్ట్ చేశారు. దీంతో నేరం జరిగిన 27 ఏళ్ల తర్వాత పన్నీర్ సెల్వంను అరెస్ట్ చేశారు.