వైన్స్, బార్ల వద్ద రూల్స్, మరింత పక్కాగా అమలు.. కేంద్రానికి సుప్రీంకోర్టు నోటీసులు

సాధారణంగా ఏదైనా వైన్స్ గానీ, బార్ గానీ ఏర్పాటు చేయాలంటే ప్రభుత్వ అనుమతితోపాటు నిబంధనలు కూడా పాటించాల్సి ఉంటుంది. అయితే కొన్ని బార్లు, వైన్స్‌లు అలాంటివేమీ పాటించకుండా.. ఇష్టారీతిన వ్యవహారిస్తూనే ఉంటాయి. ఇక 18 ఏళ్ల లోపు వయసు ఉన్నవారికి మద్యం విక్రయించకూడదనే ప్రధానమైన నిబంధన ఉంటుంది. కానీ కొందరు వ్యాపారులు అవేమీ పట్టించుకోకుండా డబ్బులు ఇచ్చిన వారికి మద్యం బాటిళ్లు అమ్ముతూనే ఉంటారు. దీనిపైనే తాజాగా సుప్రీంకోర్టులో ఒక ప్రజా ప్రయోజన వ్యాజ్యం దాఖలైంది. ఈ నేపథ్యంలోనే దేశవ్యాప్తంగా మద్యం విక్రయ కేంద్రాల వద్ద వయసు తనిఖీలు చేపట్టేందుకు పటిష్ఠమైన విధానం అమలు చేసేలా ప్రభుత్వాలకు ఆదేశాలు ఇవ్వాలని సుప్రీంకోర్టులో పిల్ నమోదైంది.

బార్లు, పబ్బులు, వైన్స్‌లు, ఇతర మద్యం అమ్మే ప్రాంతాల్లో కస్టమర్ల వయసును నిర్ధారించేందుకు ఇప్పుడు ఉన్న విధానం సరిగా అమలు కావడం లేదని కమ్యూనిటీ ఎగైనెస్ట్ డ్రంకెన్ డ్రైవ్ అనే స్వచ్ఛంద సంస్థ.. ప్రజా ప్రయోజన వ్యాజ్యాన్ని సుప్రీంకోర్టులో దాఖలు చేసింది. ఈ కేసులో కేంద్ర ప్రభుత్వంతోపాటు అన్ని రాష్ట్రాలు, కేంద్ర పాలిత ప్రాంతాలను కమ్యూనిటీ ఎగైనెస్ట్ డ్రంకెన్ డ్రైవ్ సంస్థ ప్రతివాదులుగా చేర్చింది. ఈ నేపథ్యంలో ఆ పిల్‌పై సోమవారం విచారణ చేపట్టిన జస్టిస్ బీఆర్ గవాయ్, జస్టిస్ కేవీ విశ్వనాథన్‌లతో కూడిన ద్విసభ్య ధర్మాసనం.. దీనిపై స్పందన తెలియజేయాలని కేంద్ర ప్రభుత్వానికి నోటీసులు ఇచ్చింది. అందుకోసం 3 వారాల పాటు సమయం ఇచ్చిన కోర్టు.. అప్పటివరకు దీనిపై విచారణను వాయిదా వేసింది.

18 ఏళ్ల లోపు వయసు ఉన్న వారికి మద్యం విక్రయంచడం చట్టరీత్యా నేరమని తెలిపింది. మైనర్లకు కూడా మద్యం విక్రయించడంతో వారు డ్రంక్ అండ్ డ్రైవ్ చేసి దేశవ్యాప్తంగా ప్రమాదాలకు కారణం అవుతున్న ఘటనలు పెరుగుతున్నాయని కమ్యూనిటీ ఎగైనెస్ట్ డ్రంకెన్ డ్రైవ్ సంస్థ పేర్కొంది. ఇందుకోసం 25 ఏళ్లలోపు ఉన్న వారి వయసును నిర్ధారించేందుకు మద్యం విక్రయించే సమయంలో వారి గుర్తింపు కార్డులను చెక్ చేయాలని సూచించింది. 18 ఏళ్లలోపు వారు మద్యం కొనుగోలు చేయడానికి వస్తే వారికి రూ.10 వేలు జరిమానా విధించాలని పేర్కొంది.

అంతేకాకుండా ఇంటివద్దకే మద్యం డెలివరీ చేయడాన్ని కూడా ఈ సంస్థ తీవ్రంగా తప్పుపట్టింది. ఇలా మద్యాన్ని డోర్ డెలివరీ చేస్తే.. మైనర్లు తాగడం అలవాటు చేసుకుని.. మద్యానికి బానిసలు అవుతారని పేర్కొంది. అలా చేసే మద్యం విక్రయదారులకు రూ.50 వేల వరకు జరిమానాలు వేయాలని తెలిపింది. బార్లు, వైన్స్‌లు, పబ్‌ల వద్ద కస్టమర్ల వయసు నిర్ధారణ చేయకపోవడం వల్ల.. మద్యం సేవించి మైనర్లు వాహనాలు నడిపి భారీగా ప్రమాదాలకు కారణం అవుతున్నారని వివరించింది. దీనిపై విచారణ జరిపిన జస్టిస్ బీఆర్ గవాయ్, జస్టిస్ కేవీ విశ్వనాథన్ బెంచ్.. మైనర్లు వారు నేరుగా వెళ్లి మద్యం కొనుగోలు చేయకుండా వారి పనివాళ్లను పంపించి తెప్పించుకుంటే ఏం చేయాలి అని ప్రశ్నించింది.