పెళ్లి బరాత్‌లో రూ.500 నోట్ల వర్షం.. ఏకంగా రూ.20 లక్షలు చల్లిన బంధువులు

పెళ్లి అంటే జీవితంలో ఒక మరపురాని ఘట్టం. పెళ్లి ఇలా చేసుకోవాలి.. అలా చేసుకోవాలి అని చాలా మంది చాలా కలలు కంటూ ఉంటారు. అందుకోసం భారీగా డబ్బులు ఖర్చు పెడుతూ ఉంటారు. ఇక డబ్బులు లేకపోతే అప్పులు చేసి మరీ గ్రాండ్‌గా వెడ్డింగ్ చేసుకుంటారు. ఇక పెళ్లిలో జరిగే ఒక్కో ఘట్టాన్ని ఒక్కో రకంగా గ్రాండ్‌గా చేసుకుంటూనే ఉంటారు. అయితే తాజాగా ఓ పెళ్లిలో బంధువులు చేసిన హడావుడి ప్రస్తుతం నెట్టింట తెగ చర్చకు దారి తీసింది. ఎందుకంటే పెళ్లి బరాత్‌లో డబ్బుల వర్షం కురిపించడంతో.. ఈ ఘటనకు సంబంధించిన వీడియోలు సోషల్ మీడియాలో తెగ చక్కర్లు కొడుతున్నాయి. ఉత్తర్‌ప్రదేశ్‌లో జరిగిన ఈ సంఘటన ఇప్పుడు హాట్ టాపిక్‌గా మారింది.

ఉత్తర్‌ప్రదేశ్‌లోని సిద్ధార్థనగర్‌లో ఓ పెళ్లి జరిగింది. అఫ్జల్, అర్మాన్ జంట పెళ్లి చేసుకున్న తర్వాత.. ఘనంగా ఊరేగింపు నిర్వహించారు. ఇక అఫ్జల్, అర్మాన్ వివాహ బరాత్‌లో ఇరు కుటుంబాల సభ్యులు, బంధువులు, అతిథులు చేసిన హల్‌చల్ ఇప్పుడు సోషల్ మీడియాలో తెగ వైరల్ అవుతోంది. ఇక ఈ బరాత్ సందర్భంగా వాళ్లు డబ్బులు వెదజల్లడం స్థానికులు వీడియోలు తీసి సోషల్ మీడియాలో పోస్ట్ చేయడంతో తెగ చక్కర్లు కొడుతున్నాయి. పెళ్లి ఊరేగింపు సందర్భంగా వరుడి బంధువులు కొంతమంది ఇళ్లు, జేసీబీలపైకి ఎక్కి.. అక్కడికి వచ్చిన వారిపై నోట్ల వర్షం కురిపించారు.

మొత్తం రూ.100, రూ.200, రూ.500 నోట్లను వారిపై చల్లారు. ఇక ఇందుకోసం మొత్తం రూ.20 లక్షలను ఖర్చు చేసినట్లు సమాచారం. ఇక వరుడి బంధువులు విసిరిన నోట్లను దక్కించుకునేందుకు గ్రామస్థులు, పెళ్లికి హాజరైన వారు ఎగబడటం ఆ వీడియోలో స్పష్టంగా కనిపిస్తోంది. ఇక ఈ వీడియో చూసిన నెటిజన్లు పలు రకాలుగా స్పందిస్తున్నారు.

కొందరు వారికి మద్దతుగా కామెంట్లు పెడుతుండగా.. మరికొందరు మాత్రం తీవ్రంగా మండిపడుతున్నారు. అలా డబ్బులను రోడ్లపై చల్లే బదులు.. నిరుపేదలకు అందిస్తే వారికి సహాయంగా ఉంటుంది కదా అని సూచిస్తున్నారు. రూ.20 లక్షలు అంటే ఆ డబ్బుతో నలుగురు పేద అమ్మాయిల పెళ్లిళ్లు జరిపించవచ్చు కదా అని మరొకరు వ్యాఖ్యానించారు. ఇక వారికి ఆ డబ్బులు ఎక్కడి నుంచి వచ్చాయి.. వాటికి పన్ను కడుతున్నారో లేదో తెలుసుకునేందుకు ఇన్‌కమ్ ట్యాక్స్ అధికారులకు ఫిర్యాదు చేయాలని మరికొందరు కామెంట్లు పెడుతున్నారు. అయితే ఈ వీడియో తెగ వైరల్ అవుతున్నా ఇప్పటివరకు యూపీ పోలీసుల నుంచి ఎలాంటి స్పందన లేకపోవడం గమనార్హం.