దొంగతనం చేస్తే ఆత్మహత్య చేసుకోవాలి.. ఉద్యోగులకు ఆ బ్యాంక్ వింత రూల్

సాధారణంగా ఏ ఉద్యోగంలోనైనా దొంగతనం చేస్తే.. ఉద్యోగం నుంచి తీసేస్తారు. అది పెద్ద దొంగతనం అయితే వారిని పోలీసులకు అప్పగించి కేసులు పెడతారు. కానీ ఒక బ్యాంకులో మాత్రం చాలా కఠినమైన రూల్స్ పెట్టారు. ఎవరైనా ఉద్యోగి బ్యాంక్‌లో దొంగతనం చేస్తే.. ఎంత డబ్బు అయితే దొంగిలిస్తాడో అంత డబ్బును చెల్లించాల్సి ఉంటుంది. అంతేకాకుండా దొంగతనం చేసినందుకు శిక్షగా ఆత్మహత్య చేసుకోవాలి. ఇక ఉద్యోగంలో చేరే ముందు ఆ ఉద్యోగులకు ఈ నిబంధనలు చెప్పి.. ఒప్పందంపై సంతకం చేయించుకుంటారు. ఈ సంతకం కూడా సదరు ఉద్యోగి రక్తంతో చేయాల్సి ఉంటుంది. ఈ నేపథ్యంలోనా ఉద్యోగులకు ఆ బ్యాంకు పెట్టిన చిత్రవిచిత్రమైన ఈ నిబంధనలు ఇప్పుడు సోషల్ మీడియాలో తెగ వైరల్ అవుతున్నాయి.

జపాన్‌లోని షికోకు బ్యాంక్ ఉద్యోగులకు పెట్టిన ఈ నిబంధనలు ఇప్పుడు తీవ్ర చర్చనీయాంశంగా మారాయి. తమ బ్యాంకులో ఎలాంటి దొంగతనాలు, అవినీతి, తప్పులు జరగకుండా ఉండేందుకు షికోకు బ్యాంకు పెట్టిన రూల్స్.. ఉద్యోగులను భయభ్రాంతులకు గురి చేస్తున్నాయి. ఈ షికోకు బ్యాంకులో పనిచేసే ఉద్యోగులు.. బ్యాంకులోని డబ్బులను దుర్వినియోగం చేస్తే ఆత్మహత్య చేసుకుంటామని అగ్రిమెంట్‌పై.. వారి రక్తంతో సంతకం చేయాలని నిబంధన పెట్టింది. బ్యాంకులో పనిచేసే ఉద్యోగులు.. బ్యాంకులోని డబ్బు దొంగతనం చేసినా.. ఇతరులు దొంగతనం చేస్తే వారికి సహకరించినా ఆ చోరీ అయిన మొత్తాన్ని చెల్లించాల్సి ఉంటుంది. అంతేకాకుండా అలా చేసినందుకు గానూ వారు ఆత్మహత్య చేసుకోవాల్సి ఉంటుందని షికోకు బ్యాంకు తమ అధికారిక వెబ్‌సైట్‌లో వెల్లడించింది.

ఈ షికోకు బ్యాంకును చాలా సంవత్సరాల క్రితం ప్రారంభించారు. మొదట ఈ బ్యాంకును 37వ జాతీయ బ్యాంకు అనే పేరుతో స్థాపించారు. దీన్ని ప్రారంభించిన సమయంలోనే ఈ బ్యాంకు ప్రెసిడెంట్‌ మియురాతో పాటు అందులో ఉద్యోగులుగా చేరిన మొత్తం 23 మంది ఇదే రకంగా తమ రక్తంతో సంతకం చేశారని సంబంధిత అధికారులు వెల్లడించారు. ఇలాంటి కఠినమైన రూల్స్ పెట్టడం వల్ల ఉద్యోగుల్లో నైతిక ప్రవర్తన, సామాజిక బాధ్యత మరింత పెరుగుతుందని బ్యాంకు వర్గాలు పేర్కొంటున్నాయి.

ఈ నిబంధనల కారణంగా కేవలం ఉద్యోగులుగానే కాకుండా సమాజం బాధ్యత కలిగిన వారిగా ఉండేందుకు ఉపయోగపడుతున్నాయని వెల్లడించింగి. అయితే ఈ రూల్స్‌ను ఇటీవల తీసుకువచ్చినవి కావని.. చాలా కాలంగా వీటిని బ్యాంకు వారసత్వంగా కొనసాగిస్తోందని బ్యాంకు అధికారులు తెలిపారు. ఇక ముందు కూడా ఈ నిబంధనలు అమల్లో ఉంటాయని బ్యాంకు తన వెబ్‌సైట్‌లో వెల్లడించింది.

అయితే జపాన్‌లోని షికోకు బ్యాంకు పెట్టిన ఈ రూల్స్‌ను ఓ వ్యక్తి సోషల్‌ మీడియాలో పోస్ట్‌ చేయడంతో తెగ వైరల్‌గా మారింది. అది చూసిన నెటిజన్లు షాక్ అవుతున్నారు. ఈ రూల్స్‌ను కొంతమంది సమర్థిస్తుండగా.. మరికొందరు మాత్రం తీవ్రంగా వ్యతిరేకిస్తున్నారు. ఇలా చేయడం వల్ల బ్యాంకులో చోరీలు, అవినీతిని అరికట్టవచ్చని.. కొందరు నెటిజన్లు చెబుతున్నారు. అయితే ఇలా చేసి.. ఉద్యోగుల పట్ల కర్కశంగా ప్రవర్తిస్తున్నారని మరికొంతమంది నెటిజన్లు తీవ్రంగా తిట్టిపోస్తున్నారు.