పరవాడ ఫార్మాసిటీలో ప్రమాదం.. లేబొరేటరీ నుంచి గ్యాస్ లీక్

అనకాపల్లి జిల్లా పరవాడ ఫార్మాసిటీలో ప్రమాదం జరిగింది. పరవాడలోని జవహర్‌లాల్ నెహ్రూ ఫార్మాసిటీలోని ఠాగూర్ ఫార్మా లేబరేటరీలో మంగళవారం రాత్రి విషవాయవులు లీక్ అయ్యాయి. ఈ ఘటనలో ఒక కార్మికుడు చనిపోయాడు. మరో 9 మంది అస్వస్థతకు గురయ్యారు. రాత్రివేళ ప్రమాదకర గ్యాస్ లీక్ కావటంతో పరిశ్రమలో పనిచేస్తున్న కార్మికులు ఉక్కిరిబిక్కిరి అయ్యారు. దీంతో వెంటనే వారందరినీ సమీపంలోని ఆస్పత్రికి తరలించారు. అయితే ఒడిశాకు చెందిన ఓ కార్మికుడు ప్రాణాలు కోల్పోయాడు. మరో 9 మంది కార్మికులు చికిత్స పొందుతున్నారు.

మరోవైపు పరవాడ ఫార్మాసిటీ గ్యాస్ లీక్ ఘటనపై ఆంధ్రప్రదేశ్ ముఖ్యమంత్రి నారా చంద్రబాబు నాయుడు స్పందించారు. అస్వస్థతకు గురైన కార్మికుల ఆరోగ్య పరిస్థితిని అధికారులను ఆడిగి తెలుసుకున్నారు. ఈ సందర్భంగా లేబొరేటరీ నుంచి హైడ్రోక్లోరిక్ ఆమ్లం విడుదల కావటంతో ప్రమాదం జరిగినట్లు అధికారులు ముఖ్యమంత్రికి తెలియజేశారు. ఈ ఘటనలో ఒడిశాకు చెందిన ఓ కార్మికుడు చనిపోయాడని.. ఇద్దరు తీవ్ర అస్వస్థతకు గురయ్యారని అధికారులు చంద్రబాబుకు వివరించారు. వీరిని ఐసీయూలో ఉంచి చికిత్స అందిస్తున్నట్లు తెలిపారు. మరో ఆరుగురి ఆరోగ్య సిబ్బంది పరిస్థితి నిలకడగా ఉన్నట్లు వివరించారు. అయితే బాధితులకు మెరుగైన వైద్యం అందేలా చూడాలని చంద్రబాబు అధికారులను ఆదేశించారు. బాధితులకు ప్రభుత్వం అండగా ఉంటుందని హామీ ఇచ్చారు. బాధితులకు అందుతున్న వైద్యం, సాయాన్ని పర్యవేక్షించాలని జిల్లా మంత్రులకు సూచించారు.

  మరోవైపు పరవాడ ఫార్మాసిటీలో ప్రమాదంపై ఆంధ్రప్రదేశ్ హోం మంత్రి వంగలపూడి అనిత సీరియస్ అయ్యారు. గతంలో జరిగిన ప్రమాదాల నుంచి కంపెనీలు ఎలాంటి పాఠాలు నేర్చుకోవడం లేదని.. నిర్లక్ష్యాన్ని విడిచిపెట్టాలని మండిపడ్డారు. ఫార్మాసిటీలో గ్యాస్ లీక్ ఘటనకు కారణమైన వారిపై, కంపెనీ యాజమాన్యం నిర్లక్ష్య వైఖరిపై దర్యాప్తు జరుపుతామన్న వంగలపూడి అనిత.. దర్యాప్తు నివేదిక అందిన తర్వాత చర్యలు తీసుకుంటామని తెలిపారు. మరోవైపు రియాక్టర్ కమ్ రిసీవర్ ట్యాంక్ నుంచి ద్రవరూప హైడ్రోక్లోరిక్ ఆమ్లం లీకైనట్లు అనకాపల్లి జిల్లా కలెక్టర్ విజయ్ కృష్ణన్ తెలిపారు. దీంతో అందులో పనిచేస్తున్న కార్మికులకు శ్వాస, దగ్గు సమస్యలు వచ్చాయన్నారు. వెంటనే వారిని గాజువాకలోని ఓ ప్రైవేట్ ఆస్పత్రికి తరలించి చికిత్స అందిస్తున్నట్లు వెల్లడించారు.