సూర్యలంక బీచ్ ఘటన..! మాజీ మంత్రి రోజాపై ఫిర్యాదు.. అసలేం జరిగిందంటే

మాజీ మంత్రి, వైసీపీ అధికార ప్రతినిధి ఆర్కే రోజాపై దళిత సంఘాలు కర్నూలు పోలీసులకు ఫిర్యాదు చేశాయి. రోజా మంత్రిగా పనిచేసిన సమయంలో జరిగిన ఓ ఘటనకు సంబంధించి దళిత సంఘాలు.. కర్నూలు త్రీటౌన్ పోలీస్ స్టేషన్‌లో ఫిర్యాదు చేశాయి.. దళితులను అవమానించారంటూ రోజాపై దళిత సంఘాలు ఫిర్యాదు చేశాయి. వైసీపీ ప్రభుత్వంలో ఆర్కే రోజా పర్యాటక శాఖ మంత్రిగా పనిచేసిన సంగతి తెలిసిందే. ఇక పర్యాటక శాఖ మంత్రిగా ఉన్న సమయంలో రోజా 2023, ఫిబ్రవరిలో బాపట్ల జిల్లా సూర్యలంక బీచ్‌ను సందర్శించారు. బీచ్‌లో కాసేపు సరదాగా గడిపారు. అయితే ఈ సమమయంలో ఓ ఉద్యోగి.. రోజా చెప్పులు పట్టుకోవడం అప్పట్లో విమర్శలకు తావిచ్చింది. ఈ నేపథ్యంలోనే మాజీ మంత్రి రోజా దళితులను అవమానించారంటూ కర్నూలు త్రీటౌన్ పోలీస్ స్టేషన్‌లో దళిత సంఘాలు ఫిర్యాదు చేశాయి.

అసలేం జరిగిందంటే

పర్యాటక శాఖ మంత్రిగా ఉన్న రోజా.. అప్పట్లో బాపట్లలోని సూర్యలంక బీచ్ సందర్శించారు. ఈ సందర్భంగా టూరిజం అధికారులు రోజాకు స్వాగతం పలికి బీచ్‌ వద్దకు తీసుకెళ్లారు. అయితే బీచ్‌లో సరదాగా తిరిగిన రోజా.. తన చెప్పులను బయట వదిలి.. అలా సముద్రపు ఒడ్డున నీటిలో కాసేపు విహరించారు. అయితే ఈ సమయంలో రోజా వ్యక్తిగత సహాయకుడు.. ఆమె చెప్పులను మోయటం అప్పట్లో వివాదాస్పదమైంది. ఈ వీడియో వైరల్ కావటంతో దీనిపై విపక్షాలు కూడా విమర్శలు, ఆరోపణలు గుప్పించాయి. అయితే గతేడాదిలో జరిగిన ఈ ఘటనపై ఇప్పుడు కర్నూలు పోలీస్ స్టేషన్‌లో దళిత సంఘాలు ఫిర్యాదు చేయడం ప్రాధాన్యం సంతరించుకుంది.

 మరోవైపు ఏపీ ప్రభుత్వం అనవసర కేసులు పెడుతోందంటూ ఇప్పటికే వైసీపీ నేతలు మండిపడుతున్నారు. అధికారం ఎల్లకాలం శాశ్వతం కాదంటూ హెచ్చరిస్తున్నారు. వైసీపీ నేతలు, కార్యకర్తలను అక్రమ కేసులతో వేధిస్తున్నారంటూ వైసీపీ అధినేత వైఎస్ జగన్ మోహన్ రెడ్డి దగ్గర నుంచి ముఖ్య నేతల వరకూ ప్రతిరోజూ విమర్శలు చేస్తున్నారు. ఈ క్రమంలో మాజీ మంత్రి రోజాపై దళిత సంఘాలు ఫిర్యాదు చేయడం ప్రాధాన్యం సంతరించుకుంది. దీనిపై కర్నూలు త్రీటౌన్ పోలీసులు ఎలాంటి చర్యలు తీసుకుంటారనేదీ ఆసక్తికరంగా మారింది.