ట్రెండింగ్
Epaper    English    தமிழ்

సర్కారీ స్కూళ్లకు స్టార్ రేటింగ్‌లు.. ఏపీ ప్రభుత్వం వినూత్న ఆలోచన.. గేమ్ ఛేంజర్ అవుతుందా!

Andhra Pradesh Telugu |  Suryaa Desk  | Published : Sat, Nov 30, 2024, 07:15 PM

సినిమాలకు రేటింగ్ ఇవ్వడం చూసుంటాం. అలాగే ఏదైనా రెస్టారెంట్‌కు కానీ హోటల్‌కో వెళ్లినప్పుడు వారి సేవలకు రేటింగ్ ఇస్తుంటాం. ఇక ఈ మధ్యకాలంలో టెలికాం ఆపరేటర్లు అందించే సేవలకు కూడా రేటింగ్ ఇవ్వడం మొదలైంది. అయితే.. ఆంధ్రప్రదేశ్‌లో త్వరలోనే పాఠశాలలకు కూడా రేటింగ్ ఇవ్వనున్నారు. ప్రభుత్వ పాఠశాలలకు రేటింగ్ ఇవ్వాలని ఏపీ విద్యాశాఖ నిర్ణయం తీసుకుంది. సర్కారీ స్కూళ్లలోని మౌలిక సదుపాయాలు, విద్యార్థుల అభ్యసన సామర్థ్యాల ప్రకారం రెండు రకాలుగా వాటిని వర్గీకరించనున్నారు. ప్రభుత్వ పాఠశాలల్లో ఉన్న మౌలిక వసతులు. విద్యార్థుల ప్రతిభతో పాటుగా వివిధ పరిస్థితులను లెక్కలోకి తీసుకుని ఒకటి నుంచి ఐదు వరకూ స్టార్ రేటింగ్ ఇస్తారు.


ప్రభుత్వ పాఠశాలల్లో ఉన్న మౌలిక వసతులకు సంబంధించి 18 సూచికలను, ఆ పాఠశాలల్లోని విద్యార్థుల ప్రతిభ, ఎంతవరకూ నేర్చుకున్నారనే దానికి సంబంధించి 14 సూచికలను విద్యాశాఖ ప్రామాణికంగా తీసుకోనుంది. ఈ ప్రమాణాల ఆధారంగా 30 శాతం వరకూ వస్తే ఒక స్టార్.. 30 నుంచి 50 శాతం వరకూ రెండు స్టార్లు, 50 నుంచి 70 శాతం వరకూ వస్తే మూడు స్టార్లు, 70 నుంచి 90 వరకూ వస్తే నాలుగు స్టార్లు కేటాయిస్తారు. 90 నుంచి 100 శాతం ఉన్న ప్రభుత్వ పాఠశాలలకు ఫైవ్ స్టార్ రేటింగ్ ఇస్తారు. మరోవైపు డిసెంబర్ 7వ తేదీన ఏపీ వ్యాప్తంగా పేరెంట్స్, టీచర్స్ మీటింగ్ నిర్వహించనున్నారు. ఈ సమావేశంలోనే పాఠశాలకు వచ్చిన రేటింగ్‌లను ప్రకటించి.. విద్యార్థుల తల్లిదండ్రుల నుంచి అభిప్రాయాలు, సూచనలు తీసుకుంటారు.


పాఠశాలలకు రేటింగ్ ఇచ్చే సమయంలో ఆ ప్రభుత్వ పాఠశాలలో ఉపాధ్యాయులు, విద్యార్థుల హాజరు శాతం ఎలా ఉంది.. పదో తరగతి విద్యార్థుల ఉత్తీర్ణత శాతం ఎంత.. ఒకటో తరగతి నుంచి 9వ తరగతి వరకూ విద్యార్థుల మార్కులు, బడుల్లోని టాయిలెట్లు, ఫర్నీచర్, లైబ్రరీ వంటి మౌలిక వసతులను కూడా పరిగణనలోకి తీసుకుంటారు. అలాగే ఈ ప్రక్రియలో తక్కువ రేటింగ్‌ వచ్చిన పాఠశాలల మీద విద్యాశాఖ ప్రత్యేక దృష్టి సారించనుంది. విద్యార్థుల తల్లిదండ్రులు, ఉపాధ్యాయుల సమావేశంలో విద్యార్థుల చదువుసంధ్యలపై తల్లిదండ్రులకు ఉపాధ్యాయులు వివరిస్తారు. ఆటలపోటీల నిర్వహణతో పాటుగా.. విద్యార్థులకు స్ర్కీనింగ్ పరీక్షలు, ఆరోగ్యకార్డులు సైతం అందించనున్నారు.






SURYAA NEWS, synonym with professional journalism, started basically to serve the Telugu language readers. And apart from that we have our own e-portal domains viz,. https://www.suryaa.com/ and https://epaper.suryaa.com