తిరుపతి వాసులకు శ్రీవారి దర్శనం.. టీటీడీ మార్గదర్శకాలు జారీ.. ఆ కార్డు ఉంటే చాలు

తిరుపతి వాసులకు శ్రీవారి దర్శనం కల్పించాలని టీటీడీ ఇటీవల నిర్ణయించిన సంగతి తెలిసిందే. కొత్తగా నియామకమైన టీటీడీ ధర్మకర్తల మండలి ఈ మేరకు నిర్ణయం తీసుకుంది. ప్రతి నెలా మొదటి మంగళవారం తిరుపతి వాసులకు శ్రీవారి దర్శనం కల్పించాలని టీటీడీ పాలకమండలి భేటీలో నిర్ణయం తీసుకున్నారు. ఈ నిర్ణయం ఈ నెల నుంచే అమల్లోకి వస్తోంది. డిసెంబర్ 3వ తేదీ మంగళవారం తిరుపతివాసులకు శ్రీవారి దర్శన భాగ్యం కల్పించనున్నారు. ఈ నేపథ్యంలో స్థానికులకు శ్రీవారి దర్శనం కోటాకు సంబంధించిన మార్గదర్శకాలను టీటీడీ వెల్లడించింది. శ్రీవారి దర్శనం కోసం డిసెంబర్ 2వ తేదీ తిరుపతిలోని మహతి ఆడిటోరియం, తిరుమలలోని బాలాజీనగర్‌లో ఉన్న కమ్యూనిటీ హాల్‌లో దర్శనం టోకెన్లను తిరుపతివాసులకు టీటీడీ ఉచితంగా జారీ చేయనుంది.

తిరుపతి మహతి ఆడిటోరియంలో 2,500 టోకెన్లు, తిరుమ‌ల‌ బాలాజీ న‌గ‌ర్ క‌మ్యూనిటీ హాల్‌లో 500 టోకెన్లు తిరుపతి వాసులకు ఉచితంగా జారీ చేస్తారు. ఉదయం మూడు 3 గంటల నుంచి ఉదయం ఐదు గంటల వరకూ ఈ టోకెన్లు జారీ చేస్తారు. ఫస్ట్ కమ్ ఫస్ట్ సర్వ్ ప్రకారం ముందుగా వచ్చిన వారికి తొలి ప్రాధాన్యం ఆధారంగా టోకెన్ల కేటాయింపు ఉంటుందని టీటీడీ స్పష్టం చేసింది. దర్శన టోకెన్ పొందడానికి స్థానికులు తమ ఒరిజినల్ ఆధార్ కార్డును తప్పనిసరిగా తీసుకురావాలని సూచించింది. టోకెన్లు పొందిన భ‌క్తులు దర్శన స‌మ‌యంలోనూ ఒరిజిన‌ల్ ఆధార్ కార్డును తీసుకురావాల్సి ఉంటుందని స్పష్టం చేసింది. ఈ టోకెన్లు పొందిన భక్తులను వైకుంఠం క్యూకాంప్లెక్స్‌లోని ఫుట్ పాత్ హాల్‌ దివ్యదర్శనం క్యూలైన్‌లో దర్శనాలకు అనుమతిస్తారు.

ఇతర దర్శనాల్లో శ్రీవారిని దర్శించుకున్న వారికి ఇచ్చే విధంగానే స్థానికుల దర్శన కోటా భక్తులకు కూడా ఉచితంగా ఒక లడ్డూను అందజేయనున్నట్లు టీటీడీ తెలిపింది. అయితే స్థానికుల కోటాలో ఒకసారి దర్శనం చేసుకున్న వారికి .. మరో 90 రోజులు ( 3 నెలలు) మరోసారి ఆ కోటాలో దర్శనం చేసుకునే అవకాశం ఉండదని తిరుమల తిరుపతి దేవస్థానం ఒక ప్రకటనలో స్పష్టం చేసింది. మరోవైపు డిసెంబర్ రెండో తేదీ.. అంటే రేపటి నుంచే మంగళవారం దర్శనాల కోసం టోకెన్లు జారీ చేస్తారు. మూడు వేలమందికి టోకెన్లు ఇవ్వనున్నారు. దీంతో మహతి ఆడిటోరియం, తిరుమలలోని కమ్యూనిటీ హాల్ వద్ద భక్తుల రద్దీ ఉండే అవకాశం ఉంది. అందుకు అనుగుణంగా టీటీడీ అధికారులు ఏర్పాట్లు చేస్తున్నారు.