ఏపీలో కొత్త రేషన్ కార్డులు.. రేపటి నుంచే దరఖాస్తు ప్రక్రియ.. ఎలా చేసుకోవాలంటే

ఆంధ్రప్రదేశ్ ప్రభుత్వం మరో హామీ అమలుకు సిద్ధమైంది. 2024 ఏపీ ఎన్నికల సందర్భంగా తాము అధికారంలోకి రాగానే అర్హులైన వారికి కొత్త రేషన్ కార్డులు మంజూరు చేస్తామని టీడీపీ కూటమి అప్పట్లో హామీ ఇచ్చింది. ఇక ఇచ్చిన మాట ప్రకారం ఏపీ ప్రభుత్వం కొత్త రేషన్ కార్డులు మంజూరు ప్రక్రియ మొదలెట్టనుంది. సంక్రాంతి కానుకగా కొత్త రేషన్‌ కార్డులు జారీ చేయనున్నారు. కొత్త రేషన్‌ కార్డుల కోసం డిసెంబర్ 2వ తేదీ నుంచి దరఖాస్తు స్వీకరణ మొదలుకానుంది. డిసెంబర్ 2 నుంచి డిసెంబర్ 28వ తేదీ వరకూ కొత్త రేషన్ కార్డుల కోసం దరఖాస్తులు స్వీకరిస్తారు.

ప్రస్తుతం ప్రభుత్వం అమలు చేస్తున్న అనేక సంక్షేమ పథకాలకు రేషన్ కార్డులే ప్రామాణికం. పింఛన్ల దగ్గరి నుంచి ఉచిత గ్యాస్ సిలిండర్ల పథకం వరకూ రేషన్ కార్డులను ప్రామాణికంగా తీసుకుంటున్నారు. అయితే కొత్త రేషన్ కార్డుల జారీ చాలా కాలంగా జరగకపోవటంతో అనేక మంది కొత్త రేషన్ కార్డుల కోసం ఎదురుచూస్తున్నారు. ముఖ్యంగా కొత్తగా పెళ్లైన జంటలు, పిల్లలు కలిగిన దంపతులు, అలాగే మార్పులు, చేర్పుల కోసం ప్రభుత్వం ఎప్పుడు అవకాశం ఇస్తుందా అని ఎదురుచూస్తున్నారు. ఈ క్రమంలోనే ఏపీ సర్కారు కొత్త రేషన్ కార్డుల జారీకి అవకాశం కల్పించింది. కార్డుల విభజన, మార్పులు, చేర్పులకు అవకాశం కల్పించింది. అర్హులైనవారు తమ గ్రామ, వార్డు సచివాలయాల్లో కొత్త రేషన్ కార్డుల కోసం దరఖాస్తు చేసుకోవచ్చు.అలాగే ఏపీ పౌర సరఫరాల శాఖ అధికారిక వెబ్‌సైట్‌లో కూడా దరఖాస్తు చేసుకోవచ్చు. డిసెంబర్ 28వ తేదీ వరకూ రేషన్ కార్డుల దరఖాస్తుకు అవకాశం కల్పించారు.

 దరఖాస్తుల స్వీకరణ పూర్తైన తర్వాత వారిలో అర్హులైన వారిని గుర్తించి సంక్రాంతి పండుగ లోపు గుర్తించి కొత్తరేషన్‌ కార్డులు జారీ చేస్తారు. కొత్తగా పెళ్లైన జంటలతో పాటు తల్లిదండ్రుల నుంచి విడిపోయిన వారికి కూడా కొత్తగా బియ్యం కార్డులు అందనున్నాయి. మరోవైపు కొత్త రేషన్ కార్డుల జారీపై ఇప్పటికే మార్గదర్శకాలు విడుదల చేసిన ఏపీ ప్రభుత్వం.. కార్యాచరణ రూపొందించాలని అన్ని జిల్లాల కలెక్టర్లను ఆదేశించింది. కొత్త డిజైన్లతో, రాజముద్రతో కొత్త రేషన్ కార్డులు మంజూరు చేస్తారు. అధికారిక లెక్కల ప్రకారం సుమారుగా 1.50 లక్షల కొత్త రేషన్ కార్డులు మంజూరు చేయనున్నట్లు సమాచారం. మరోవైపు డిసెంబర్ మూడో తేదీన ఏపీ కేబినెట్ భేటీ జరగనుంది. ఈ భేటీలో ఏపీలో కొత్త రేషన్ కార్డులు గురించి చర్చించే అవకాశాలు ఉన్నాయి.