ట్రాన్స్‌జెండర్ల లీడర్ హాసిని హత్య కేసులో రౌడీషీటర్లు, పాత నేరస్థులు

ఆంధ్రప్రదేశ్‌లో సంచలనం రేపిన ట్రాన్స్‌జెండర్ హాసిని హత్య కేసును నెల్లూరు జిల్లా పోలీసులు ఛేదించారు. ట్రాన్స్‌జెండర్ల మధ్య ఆధిపత్య పోరే హత్యకు కారణమని గుర్తించారు. అలేఖ్య అనే మరో ట్రాన్స్‌జెండర్ల లీడర్‌కు, హాసినికి మధ్య ఆధిపోత్య పోరు నడుస్తోందన్న నెల్లూరు పోలీసులు.. ఈ కారణంతోనే ట్రాన్స్‌జెండర్ల నాయకురాలిగా ఉన్న హాసినిని కాపు కాచి హత్య చేసినట్లు తెలిపారు. ఈ కేసు వివరాలను నెల్లూరు జిల్లా ఎస్పీ కృష్ణకాంత్ విలేకర్ల సమావేశంలో వెల్లడించారు. పోలీసులు వెల్లడించిన వివరాల ప్రకారం..

నెల్లూరు దీన్‌దయాళ్‌నగర్‌కు చెందిన ట్రాన్స్‌జెండర్ హాసిని గత కొన్ని రోజులుగా తిరుపతిలోని మంగళం ప్రాంతంలో నివశిస్తున్నారు. హాసిని దక్షిణ కోస్తా, రాయలసీమ.. కర్ణాటక, మద్రాస్ వంటి ప్రాంతాల్లో ఉన్న ట్రాన్స్‌జెండర్లకు లీడర్‌గా ఉన్నారు. అలాగే తిరుపతి, ప్రకాశం, నెల్లూరు జిల్లాలలో హాసినికి బలమైన వర్గం ఉంది. ఇదే సమయంలో అలేఖ్య అనే ట్రాన్స్‌జెండర్ నేతృత్వంలో మరో గ్రూపు ఉంది. అలేఖ్యకు, హాసినికి మధ్య గత కొంతకాలంగా ఆధిపత్య పోరు సాగుతోంది.

రాయలసీమ, కోస్తాంధ్రతో పాటుగా, రాయచూర్, ధార్వాడ్, హుబ్లీ, చిక్‌మగలూరు వంటి చోట్ల హాసిని ప్రాబల్యం పెరగడం అలేఖ్య వర్గం జీర్ణించుకోలేకపోయింది. అలేఖ్యతో పాటుగా షీలా, సులోచన అనే ట్రాన్స్‌జెండర్లతోనూ హాసినికి విభేదాలు ఉన్నాయి. అలేఖ్య, హాసిని మీద తిరుపతి, నెల్లూరు జిల్లాలలోనూ కేసులు నమోదయ్యాయి. ఈ నేపథ్యంలో షీలా, అలేఖ్య కలిసి హాసిని హత్య కోసం సుపారీ ఇచ్చినట్లు నెల్లూరు జిల్లా ఎస్పీ తెలిపారు.

నవంబర్ 26వ తేదీ పార్లపల్లిలో జరిగిన ఓ విగ్రహ ప్రతిష్ట కార్యక్రమంలో పాల్గొని.. అర్ధరాత్రి తన కారులో తిరిగి వస్తున్న హాసినిని పక్కా పథకం ప్రకారం హత్య చేశారని ఎస్పీ కృష్ణకాంత్ వెల్లడించారు. కొడవలూరు మండలం టపాతోపు రైల్వే అండర్‌ బ్రిడ్జి వద్దకు కారు చేరుకోగానే.. ఆమె కారును ఢీకొట్టారని.. హాసిని కారు అద్దాలు పగలగొట్టి బయటకు లాగి కత్తులతో దాడి చేశారని వివరించారు.

ట్రాన్స్‌జెండర్ హాసిని హత్య కేసులో పాత నేరస్థులు, రౌడీషీటర్లతో పాటుగా మొత్తం 15 మందికి సంబంధం ఉందన్న నెల్లూరు పోలీసులు.. వారిలో 12 మందిని అరెస్ట్ చేసినట్లు చెప్పారు. పరారీలో ఉన్న ముగ్గురి కోసం గాలిస్తున్నారు. హాసిని హత్యలో పాల్గొన్న వారంతా నెల్లూరు జిల్లాకు చెందిన వారేనని ఎస్పీ కృష్ణకాంత్ వెల్లడించారు. కేసును త్వరగా ఛేదించిన పోలీసులను ఎస్పీ కృష్ణకాంత్ అభినందించారు.