బోట్లేసుకుని హడావిడి చేయడం కాదు.. ముందు ఆ పని చేయండి: వైఎస్ షర్మిల

రేషన్ బియ్యం అక్రమ రవాణాపై ఏపీ కాంగ్రెస్ చీఫ్ వైఎస్ షర్మిల తీవ్ర వ్యాఖ్యలు చేశారు. ఈ విషయంలో సీబీఐ విచారణ చేయించాలని ఆంధ్రప్రదేశ్ ప్రభుత్వా్న్ని డిమాండ్ చేశాకు. ఆంధ్రప్రదేశ్‌లోని రేషన్ బియ్యాన్ని విదేశాలకు తరలించడం పెద్ద మాఫియాగా వైఎస్ షర్మిల ఆరోపించారు. దీనిని జాతీయ స్థాయి కుంభకోణంగా అభివర్ణించారు. ఈ మేరకు ఎక్స్ వేదికగా వైఎస్ షర్మిల సుదీర్ఘ ట్వీట్ చేశారు. దీని వెనుక ప్రజా ప్రతినిధుల హస్తం ఉందని ఆరోపించిన వైఎస్ షర్మిల.. సముద్రంలో బోట్లు వేసుకుని హడావిడి చేయడం కాకుండా.. రేషన్ బియ్యం అక్రమ రవాణాపై సీబీఐ దర్యాప్తునకు ఆదేశించాలని డిమాండ్ చేశారు.

"పేదల పొట్టకొట్టి 48 వేల కోట్ల రూపాయల ప్రజల డబ్బును పందికొక్కుల్లా తినేసిన దోపిడీ. తిలా పాపం తలా పిడికెడు అన్నట్లు.. రేషన్ బియ్యం స్మగ్లింగ్ వెనుక ప్రజా ప్రతినిధుల ప్రమేయం ఉంది. కింద నుంచి ఉన్నత స్థాయి వరకు కొంతమంది అవినీతి అధికారుల పాత్ర ఉంది. ఎవరికి దక్కాల్సిన వాట వాళ్లకు చేరుతుండటంతో నిఘా వ్యవస్థ పూర్తిగా కళ్ళుమూసుకుంది. గడిచిన మూడేళ్లలో రాష్ట్రంలోని పోర్టుల నుంచి 2 కోట్ల టన్నుల రేషన్ బియ్యం అక్రమంగా రవాణా అయ్యిందంటే మన చెక్ పోస్టుల పని తీరు ఏంటో అంచనా వేయొచ్చు. ఏ స్థాయిలో అవినీతి జరుగుతుందో అర్థం చేసుకోవచ్చు. కూటమి ప్రభుత్వాన్ని కాంగ్రెస్ పార్టీ డిమాండ్ చేస్తోంది. అక్రమ బియ్యాన్ని పట్టేందుకు మీరు బోట్లు వేసుకొని సముద్రంలో హడావిడి చేయడం కాదు. నిజాలు నిగ్గు తేల్చండి." అంటూ వైఎస్ షర్మిల ట్వీట్ చేశారు.

మరోవైపు పేదలకు దక్కాల్సిన రేషన్ బియ్యం అక్రమంగా కాకినాడ పోర్టుకు ఎలా చేరుతోందని వైఎస్ షర్మిల ప్రశ్నించారు. మూడేళ్లలో 2 కోట్ల టన్నుల బియ్యం ఎలా చేరిందని.. దీని వెనుక ఉన్న బియ్యం దొంగలు ఎవరంటూ నిలదీశారు. 48 వేలకోట్ల రూపాయలు ఎవరెవరు తిన్నారో.. ఈ బియ్యం మాఫియాకు ఎవరెవరితో సంబంధాలు ఉన్నాయనే దానిపై దర్యాప్తు జరిపించాలని డిమాండ్ చేశారు. తీగ లాగితే వెనకున్న డొంక ఎక్కడ ? మిల్లర్ల చేతివాటం ఉందా ? రేషన్ డీలర్ల మాయాజాలమా? అనునిత్యం తనిఖీల సంగతి ఏంటి? నిజాలు నిగ్గు తేల్చాల్సిన అవసరం ఉందంటూ వైఎస్ షర్మిల ట్వీట్ చేశారు.

మరోవైపు రేషన్ బియ్యం అక్రమ రవాణాపై ఆంధ్రప్రదేశ్ ప్రభుత్వం ప్రత్యేక దర్యాప్తు కమిటీని ఏర్పాటు చేయాలని వైఎస్ షర్మిల డిమాండ్ చేశారు. లేదంటే కేంద్ర ప్రభుత్వ దర్యాప్తు సంస్థ.. సీబీఐతో విచారణ జరిపించాలన్నారు. ఆంధ్రప్రదేశ్ అంటే అన్నపూర్ణమ్మ. ధాన్యాగారానికి భాండాగారం అని చెప్పిన వైఎస్ షర్మిల.. ప్రపంచానికి అన్నం పెట్టే మన రాష్ట్రాన్ని రేషన్ బియ్యం మాఫియాకు అడ్డాగా మార్చారంటూ మండిపడ్డారు. కష్టించి పడించే రైతుకు దక్కేది కన్నీళ్లు అయితే... బియ్యం అక్రమార్కులకు దక్కుతున్నవి కాసులు..ఇదీ మన రాష్ట్ర దుస్థితి అంటూ ట్వీట్ చేశారు.