తిరుచానూరు అమ్మవారికి కానుకగా గొడుగులు.. వాహన సేవకులుగా సాఫ్ట్‌వేర్ ఉద్యోగులు..

తిరుచానూరు శ్రీ పద్మావతి అమ్మవారి కార్తీక బ్రహ్మోత్సవాలు ఘనంగా జరుగుతున్నాయి. ఉత్సవాల్లో భాగంగా సోమవారం సాయంత్రం వసంతోత్సవం నిర్వహించారు. ఈ సందర్భంగా అమ్మవారు మాడ వీధుల్లో విహరించారు. వసంతోత్సవంలో భాగంగా సుగంధ ద్రవ్యాలతో అమ్మవారికి అభిషేకం నిర్వహించారు. ఆ తర్వాత.. ఆ చందన జలాన్ని భక్తులు ఒకరిపై ఒకరు చల్లుకుంటూ వసంతోత్సవం జరుపుకున్నారు. మరోవైపు తిరుచానూరు పద్మావతి అమ్మవారికి సోమవారం ఏడు గొడుగులు కానుకగా అందాయి. తమిళనాడు రాష్ట్రానికి చెందిన తిరునిన్రవూరు శ్రీమద్ రామానుజ కైంకర్య ట్రస్టు రెండు గొడుగులను అమ్మవారికి సమర్పించింది. ట్రస్టు ప్రతినిధులు టీటీడీ ఛైర్మన్ బీఆర్ నాయుడు చేతికి ఈ గొడుగులను అందజేశారు.

తిరుచానూరు పద్మావతి అమ్మవారి బ్రహ్మోత్సవాల్లో గజ వాహన సేవ రోజున శ్రీమద్ రామానుజ కైంకర్య ట్రస్టు గొడుగులను కానుకగా సమర్పించడం ఆనవాయితీ. ఈ ఆనవాయితీ ప్రకారమే ఈ ఏడాది కూడా రెండు గొడుగులను అమ్మవారికి కానుకగా సమర్పించారు. అలాగే చెన్నైకి చెందిన హిందూ ధర్మార్థ సమితి ఐదు గొడుగులను తిరుచానూరు పద్మావతి అమ్మవారి ఆలయానికి కానుకగా సమర్పించింది. ఆలయ డిప్యూటీ ఈవో గోవిందరాజన్‌కు ఈ గొడుగులను సమితి ప్రతినిధులు సోమవారం అందజేశారు.

 మరోవైపు తిరుచానూరు పద్మావతి అమ్మవారి బ్రహ్మోత్సవాల్లో తమిళనాడు శ్రీరంగానికి చెందిన శ్రీవైష్ణవులు వాహనసేవల్లో పాల్గొంటున్నారు. తిరుచానూరు బ్రహ్మోత్సవాల సమయంలో వాహనసేవల్లో శ్రీవైష్ణ సంప్రదాయకులు పాల్గొనడం ఆనవాయితీ. శ్రీరంగంతో పాటు పరిసర ప్రాంతాలకు చెందిన పలువురు శ్రీవైష్ణవ సంప్రదాయపరులు గత 32 ఏళ్లుగా ఈ సేవలు చేస్తున్నారు. శ్రీకాంతన్ నేతృత్వంలో 32 ఏళ్లుగా వీరు అమ్మవారి వాహన సేవకులుగా వ్యవహరిస్తున్నారు.

ఈ బృందంలో మొత్తం 52 మంది ఉండగా.. వీరంతా చెన్నై, బెంగళూరు, హైదరాబాద్ ప్రాంతాల్లో సాఫ్ట్‌వేర్ ఉద్యోగులు, రైల్వే, బ్యాంక్, ప్రభుత్వ ఉద్యోగులుగా స్థిరపడ్డారు. అయితే ఆనవాయితీని పక్కనపెట్టకుండా ప్రతి ఏటా బ్రహ్మోత్సవాల్లో వాహన సేవకులుగా పనిచేస్తుండటం విశేషం. బ్రహ్మోత్సవాల సమయంలో వీరంతా తమ విధులకు సెలవులు పెట్టి తిరుపతి చేరుకుంటారు. టీటీడీ సైతం వీరికి ఉచితంగా భోజనం, వసతి ఏర్పాట్లు చేస్తుంది. అలాగే బ్రహ్మోత్సవాలు పూర్తైన తర్వాత బహుమానం అందించడంతో పాటుగా ప్రయాణ ఖర్చులు చెల్లిస్తూ వస్తోంది.

బ్రహ్మోత్సవాల్లో ఉపయోగించే ఒక్కో వాహనం సుమారుగా రెండున్నర టన్నులకు పైగా బరువు ఉంటుంది. ఉదయం, రాత్రి వాహనసేవలు కలిపి మూడు గంటలు పాటు ఈ బరువును మోయాల్సి ఉంటుంది. అయితే పెద్ద కొలువుల్లో స్థిరపడినప్పటికీ వీరంతా బ్రహ్మోత్సవాల సమయానికి తిరుపతికి చేరుకుని వాహ‌న‌సేవ‌కులు సేవ చేస్తున్నారు. పద్మావతి అమ్మవారిని తమ భుజస్కంధాలపై మోయడం పూర్వజన్మ సుకృతమని.. అమ్మవారి కృపతో తమ జీవితాలు సుఖసంతోషాలతో ఉన్నాయని వీరంతా చెప్తున్నారు.