అయ్యప్ప భక్తులకు తప్పిన ప్రమాదం.. మంటల్లో కాలిపోయిన బస్సు

ఆంధ్రప్రదేశ్‌లోని శ్రీకాకుళం జిల్లాకు చెందిన అయ్యప్ప భక్తులకు పెను ప్రమాదం తప్పింది. అయ్యప్ప భక్తులు వెళ్లిన బస్సుకు ప్రమాదం జరిగింది. బస్సులో మంటలు చెలరేగి బస్సు పూర్తిగా కాలిపోయింది. అయితే ఈ ఘటనలో అయ్యప్ప భక్తులకు ఎలాంటి గాయాలు కాకపోవటంతో అందరూ ఊపిరి పీల్చుకున్నారు. వివరాల్లోకి వెళ్తే శ్రీకాకుళం జిల్లా రేగిడి మండలం మజ్జిరాముడుపేటకు చెందిన 41 మంది అయ్యప్ప స్వాములు ఓ ప్రైవేట్ ట్రావెల్ బస్సును అద్దెకు తీసుకుని శబరిమలకు వెళ్లారు. నవంబర్ 25వ తేదీన శబరిమలకు బయల్దేరారు. శబరిమల అయ్యప్ప దర్శనం పూర్తి చేసుకున్న తర్వాత తిరుగు ప్రయాణమయ్యారు. అయితే తమిళనాడులోని కంచి సమీపంలో వంట చేసుకోవడానికి బస్సును ఆపారు. బస్సును ఆపి రోడ్డు పక్కన వంట చేసుకుంటున్న సమయంలో.. అకస్మాత్తుగా బస్సులో మంటలు చెలరేగాయి.

ఈ ప్రమాదంలో బస్సు పూర్తిగా కాలిపోయింది. బస్సులోపల ఉంచిన అయ్యప్ప స్వాముల సామాగ్రి, దుస్తులు, ప్రసాదాలు అన్ని బూడిదయ్యాయి. అయితే ప్రమాద సమయంలో అయ్యప్ప స్వాములు అందరూ బయటే ఉండటంతో పెను ప్రమాదం తప్పింది. ఇక మంటల్లో బస్సు కాలిపోయిన విషయాన్ని స్వాములు.. సదరు ప్రైవేట్ ట్రావెల్ ఏజెన్సీకి తెలియజేశారు. దీంతో కంచి నుంచి వారికి ప్రత్యేక బస్సు ఏర్పాటు చేశారు. ప్రైవేట్ ట్రావెల్ ఏజెన్సీ ఏర్పాటు చేసిన ప్రత్యేక బస్సులో స్వాములు అందరూ శ్రీకాకుళానికి తిరుగు పయనమయ్యారు.

అయితే వంట చేస్తున్న సమయంలో నిప్పు రవ్వలు ఎగసిపడటంతో బస్సుకు ప్రమాదం జరిగిందనే వార్తలు కూడా వస్తున్నాయి. వంట చేస్తున్న సమయంలో ఎగసిపడిన నిప్పురవ్వలు.. బస్సుపై పడటంతోనే బస్సులో మంటలు చెలరేగాయన్న ప్రచారం జరుగుతోంది. అయితే దీనిపై ఎలాంటి క్లారిటీ లేదు. మంటలు చెలరేగిన వెంటనే ఆర్పడానికి ఎంతగా ప్రయత్నించినా ఫలితం లేకుండా పోయింది. బస్సుతో పాటుగా అందులోని వస్తువులు అన్నీ కూడా కాలి బూడిద అయ్యాయి. దీంతో స్వాములందరూ కట్టుబట్టలతోనే తిరుగు ప్రయాణం కావాల్సి వచ్చింది. ప్రైవేట్ ట్రావెల్ ఏజెన్సీ కంచి నుంచి ఏర్పాటు చేసిన ప్రత్యేక బస్సులో స్వస్థలాలకు తిరుగు ప్రయాణమయ్యారు.