శ్రీశైలం వెళ్లే సామాన్య భక్తులకు తీపికబురు.. దర్శనాలపై కీలక నిర్ణయం

శ్రీశైలం మల్లన్న దర్శనం కోసం వెళ్లే భక్తులకు ముఖ్యగమనిక. దర్శనాలకు సంబంధించి ఆలయ ఈవో చంద్రశేఖర్ ఆజాద్ కీలక నిర్ణయం తీసుకున్నారు. శ్రీశైలంలో రద్దీ రోజుల్లో వీఐపీ బ్రేక్‌ దర్శనాలను రద్దు చేస్తూ నిర్ణయం తీసుకున్నారు. ముఖ్యంగా శని, ఆది, సోమవారాల్లో.. ప్రభుత్వ సెలవు రోజుల్లో అలంకార దర్శనం మాత్రమే ఉంటుందన్నారు. శని, ఆది, సోమ వారాల్లో, రద్దీ రోజుల్లో ఉదయాస్తమాన, ప్రాతకాల, గర్భాలయ, ప్రదోషకాల, సామూహిక అభిషేకాలు, స్పర్శ దర్శనం, వీఐపీ బ్రేక్ దర్శనాలు రద్దు చేస్తూ నిర్ణయం తీసుకున్నారు.

రద్దీ రోజుల్లో సామాన్య భక్తులకు ఇబ్బంది కలగకుండా ఈ నిర్ణయం తీసుకున్నట్లు తెలిపారు. ఈ మేరకు స్పర్శదర్శనం, అభిషేకాలు రద్దు వివరాలను వార్షిక క్యాలెండర్‌గా విడుదల చేయాలనే ఆలోచనలో ఉన్నారు.అలాగే వైదిక కమిటీ సూచించిన విశేష రోజుల్లో రూ.500 రుసుంతో మల్లన్న సర్పదర్శనం.. రూ.5 వేల రుసుంతో నిర్వహిస్తున్న గర్భాలయ ఆర్జిత అభిషేకాలు.. రూ.1500 రుసుంతో నిర్వహిస్తున్నసామూహికార్జిత అభిషేకాలు పూర్తిగా నిలిపివేస్తున్నట్లు చెప్పారు. భక్తులందరూ ఈ మార్పును గమనించాలన్నారు.

శ్రీశైల దేవస్థానంలో లోక కల్యాణం కోసం కార్తీకమాసం పొడవునా నిర్వహించిన శివచతుస్సప్తాహ భజనలు మార్గశిర శుద్ద పాడ్యమితో ముగిశాయి. కార్తీక శుద్ద పాడ్యమి (గత నెల 2) నుంచి ఈ భజన కార్యక్రమం ప్రారంభమైంది.. కార్తీక మాసం మొత్తం నిరంతరంగా రేయింబవళ్లు అఖండ శివ పంచాక్షరి నామ భజన జరిగింది. కర్నూలు జిల్లాకు చెందిన రెండు భజన బృందాలు, కర్ణాటకలోని నాలుగు భజన బృందాలకు ఈ భజనల్లో అవకాశం దక్కింది. కర్నూలు శ్రీ గురు నిమిషాంబ దేవి భజనమండలికి నవంబర్ 2 నుంచి 7 వరకు.. కర్నూలు చెన్నకేశవ నాటక కళా భజన మండలికి గత నెల 7 నుంచి 12 వరకూ భజనలకు అవకాశం కల్పించారు ఆలయ అధికారులు.

కర్ణాటకలోని బళ్లారి శ్రీశైల మల్లికార్జున భజన సంఘం నవంబర్ 12నుంచి 17 వరకు భజన కార్యక్రమంలో పాల్గొన్నారు. అలాగే రాయచూర్ జిల్లా గోపన దేవరహళ్లి శ్రీ మౌళి బసవేశ్వర భజన్ సంఘ్ వారు గత నెల 17 నుంచి 22 వరకు.. రాయచూర్ జిల్లా సుమ్కేశ్వరాహాల్ శ్రీ మల్లికార్జున భజన మండలి ఆధ్వర్యంలో గత నెల 22 నుంచి 27 వరకు భజన కార్యక్రమంలో పాల్గొన్నారు. గత నెల 27 నుంచి ఈ నెల 2 వరకు రాయచూర్ జిల్లా గోపన దేవరహళ్లి శ్రీ ప్రభులింగ్ సేవా సంఘ్‌ ఆధ్వర్యంలో భజనలు చేశారు. ముగింపు కార్యక్రమంలో దేవస్థానం ఈవో చంద్రశేఖర్ ఆజాద్, అర్చక స్వాములు పాల్గొన్నారు.