Dwaraka Tirumala Youtuber Flying Drone

ద్వారకా తిరుమల చిన్న వెంకన్న ఆలయంపై డ్రోన్ ఎగిరింది.. ఈ ఘటన కలకలంరేపగా.. ఆలయంపై డ్రోన్ ఎగరవేసిన యూట్యూబర్‌‌పై కేసు నమోదైంది. ఇటీవల ఓ యూట్యూబర్ చిన్న వెంకన్న ఆలయ పరిసరాలను డ్రోన్ కెమెరాతో వీడియోను రికార్డ్ చేశాడు. ఆ వీడియోలను తన యూట్యూబ్ ఛానల్, సోషల్ మీడియాలో పోస్టు చేయగా వైరల్ అయ్యాయి. ఈ డ్రోన్ వ్యవహారంపై ఆలయ అధికారులు సీరియస్‌గా స్పందించారు. యూట్యూబర్ తీరుతో ఆలయ భద్రతకు విఘాతం కలిగే అవకాశం ఉందని ఆలయ ఏఈవో పోలీసులకు ఫిర్యాదు చేశారు. దీంతో పోలీసులు కేసు నమోదు చేసే దర్యాప్తు చేస్తున్నారు.

 ద్వారకా తిరుమల ఆలయ పరిసరాల్లో డ్రోన్లతో షూటింగ్‌లపై నిషేధం ఉంది.. అయినా సరే పట్టపగలే యూట్యూబర్‌ డ్రోన్ ఎగురవేసి షూట్ చేసిన వీడియోను వైరల్ చేశాడు. అంతేకాదు ద్వారకా తిరుమల ఆలయ అభివృద్ధి పనులు కూడా వీడియో రికార్డు అయ్యాయి. అయితే నిషేధిత ప్రాంతంలో డ్రోన్ ఎగురవేస్తుంటే ఆలయ అధికారులు, సిబ్బంది ఏం చేస్తున్నారనే ప్రశ్నలు తెరపైకి వచ్చాయి. ఈ ఘటనపై విచారణ జరిపి బాధ్యులైన వారిపై కఠిన చర్యలు తీసుకోవాలని కోరుతున్నారు.

మీకోసంలో వినతుల స్వీకరణ

ఏలూరు జిల్లాలో ప్రజా సమస్యల పరిష్కారానికి కలెక్టరేట్‌లోని గోదావరి సమావేశ మందిరంలో ‘మీకోసం’ కార్యక్రమం నిర్వహించారు. కలెక్టర్‌ కె.వెట్రిసెల్వి, జేసీ పి.ధాత్రిరెడ్డి, డీఆర్వో విశ్వేశ్వరరావు, డీఆర్‌డీఏ పీడీ విజయరాజు, ఏలూరు ఆర్డీవో అచ్యుత అంబరీశ్, స్పెషల్ డిప్యూటీ కలెక్టర్లు ఎం.ముక్కంటి, కె.భాస్కర్, నగర పాలక సంస్థ కమిషనర్‌ భానుప్రతాప్‌ పాల్గొన్నారు. ఈ మేరకు ప్రజల నుంచి వినతులు స్వీకరించారు. ప్రజలు అందజేసే ప్రతి అర్జీని ఆడిటింగ్‌ చేస్తామన్నారు జిల్లా కలెక్టర్ వెట్రిసెల్వి. అర్జీల పరిష్కార ప్రగతిపై ప్రతి వారం సమీక్షిస్తామన్నారు. మీకోసం ద్వారా మొత్తం 248 అర్జీలు అందాయని తెలిపారు అధికారులు.

ఏలూరు రాజేశ్వరినగర్‌లో వర్షపునీరు, మురుగు పారేందుకు సదుపాయం లేక దోమలు వ్యాప్తి చెందుతున్నాయని స్థానికులు ఫిర్యాదు చేశారు. సమస్య పరిష్కారానికి తగిన చర్యలు తీసుకోవాలని కోరారు. అలాగే తమ వ్యవసాయభూమి పక్కన చేపల చెరువు తవ్వడంతో చేనుకు నష్టం వాటిల్లుతోందని నిడమర్రు మండలం చానమిల్లికి చెందిన రైతు ఫిర్యాదు చేశారు. వీటిపై తగిన చర్యలు తీసుకుని సమస్యను పరిష్కరించాలని అధికారుల్ని కోరారు.