ఏపీ విద్యార్థులకు 'గోల్డెన్‌ అవర్‌ బీమా'.. ఉచితంగా రూ.50వేలు వరకు

డాక్టర్‌ బీఆర్ అంబేద్కర్ కోనసీమ జిల్లా కలెక్టర్‌ డాక్టర్‌ ఆర్‌ మహేష్ కుమార్ సరికొత్త ఆలోచన చేశారు. రాష్ట్రంలో తొలిసారి సంక్షేమ వసతిగృహాల్లోని విద్యార్థుల ఆరోగ్యానికి భరోసా ఇచ్చేందుకు విద్యార్థులకు ‘గోల్డెన్‌ అవర్‌ బీమా’ను కోనసీమ జిల్లాలో అమలుచేయాలని నిర్ణయించారు. ఈ మేరకు బీమా పథకంపై బ్యాంకర్లు, జిల్లా అధికారులతో సమీక్ష నిర్వహించారు. విద్యార్థులు చిన్నచిన్న అనారోగ్యాలు, దెబ్బలు తగిలినప్పుడు ఆలస్యం చేస్తే అవి దీర్ఘకాలిక సమస్యలుగా మారుతున్నాయన్నారు కలెక్టర్ మహేష్‌కుమార్. విద్యార్థులకు గోల్డెన్‌ అవర్‌లో నాణ్యమైన వైద్యం అందించాలనే లక్ష్యంతో ఈ బీమా పథకాన్ని అమలుచేయాలని భావించామని.. ఈ నిర్ణయంతో డ్రాపౌట్స్‌ తగ్గే అవకాశం ఉందని చెప్పారు. ఈ నెల 15 తర్వాత బీమాను అమలు చేయాలని నిర్ణయించినట్లు చెప్పారు.

సంక్షేమ వసతిగృహాల్లోని విద్యార్థులను ఆసుపత్రికి తీసుకెళ్తే ఆ ఖర్చు సంక్షేమ అధికారులపై పడుతోంది. దీంతో వారు వెనకాడాల్సిన పరిస్థితి.. అందుకే కలెక్టర్‌ వినూత్నంగా ఆలోచించారు. బీమా అంశాన్ని తెరపైకి తీసుకొచ్చి ముంబైలోని ఐసీఐసీఐ ప్రధాన కార్యాలయం అధికారులతో చర్చించారు.. తన ఆలోచనను వారికి వివరించారు. ఈ మేరకు ఏడాదికి రూ.200 ప్రీమియంతో రూ.50,000 వరకు బీమా సదుపాయం కల్పించేలా వారిని ఒప్పించారు. అంతేకాదు ప్రీమియం డబ్బులు కూడా విద్యార్థి, ప్రభుత్వంపై భారం పడకుండా చేశారు.. ఈ మేరకు కార్పొరేట్‌ సామాజిక బాధ్యత (సీఎస్‌ఆర్) కింద వేదాంత సంస్థ నుంచి నిధులు సమకూరేలా ఏర్పాటు చేశారు.

ఈ బీమాకు సంబంధించి ఏడాదికి గరిష్ఠంగా రూ.20లక్షల వరకు ఖర్చవుతుందని అంచనా వేశారు. కోనసీమ జిల్లాలో 94 వసతిగృహాల్లో మొత్తం 8,384 మంది విద్యార్థులు చదువుకుంటున్నారు.. వీరందరికీ ఈ బీమా అందనుంది. విద్యార్థులకు జ్వరాలు, ఆటల్లో దెబ్బలు, కుక్క, పాము, తేలు కాట్లు, యూరినరీ ఇన్‌ఫెక్షన్లు, టాన్సిల్స్, చర్మ సంబంధ సమస్యలు ఇలా 20 రకాల వ్యాధులను బీమాలో చేర్చారు. మొత్తానికి విద్యార్థులకు ఈ బీమాతో ప్రయోజనంకలగనుంది. డాక్టర్ బీఆర్ అంబేద్కర్ కోనసీమ జిల్లా కలెక్టర్ మహేష్‌కుమార్‌కు వచ్చిన ఈ ఆలోచనపై ప్రశంసలు వస్తున్నాయి.