పార్క్‌లో బాలుడు మృతి.. కుటుంబానికి రూ.2600 కోట్లు ఇవ్వాలని కోర్టు తీర్పు

ఎంజాయ్‌మెంట్ కోసం అమ్యూజ్‌మెంట్ పార్కుకు వెళ్లిన ఓ బాలుడికి ఊహించని పరిణామం చోటు చేసుకుంది. సరదాగా తన ఫ్రెండ్స్‌తో కలిసి ఓ అమ్యూజ్‌మెంట్ పార్కుకు వెళ్లిన 14 ఏళ్ల బాలుడు.. ఫ్రీ ఫాల్ టవర్ పైనుంచి పడి మృతి చెందాడు. అయితే అతడికి పెట్టిన సీట్‌బెల్ట్ ఊడిపోవడంతో పైనుంచి ఎగిరిపడ్డాడు. దీంతో అక్కడికక్కడే ప్రాణాలు కోల్పోయాడు. ఈ ఘటనపై ఆ బాలుడి తల్లిదండ్రులు.. కోర్టుకెక్కారు. 2 ఏళ్ల క్రితం ఘటన జరగ్గా.. అప్పటి నుంచి విచారణ జరిపిన కోర్టు తాజాగా తీర్పును వెలువరించింది. బాలుడి మృతికి పరిహారంగా అతడి కుటుంబానికి రూ.2624 కోట్లు నష్టపరిహారం చెల్లించాలని తీర్పునిచ్చింది.

2022లో అమెరికా ఓర్లాండ్‌లోని ఓ అమ్యూజ్‌మెంట్ పార్క్‌లో ఫ్రీ ఫాల్‌ టవర్‌ నుంచి పడి 14 ఏళ్ల టైర్ సాంప్సన్ అనే బాలుడు దుర్మరణం పాలయ్యాడు. తన ఫుట్‌బాల్‌ టీమ్‌తో కలిసి ఐకాన్‌ అమ్యూజ్‌మెంట్ పార్క్‌కు టైర్ సాంప్సన్ వెళ్లాడు. ఆ సమయంలో టైర్ సాంప్సన్ ఫ్రీ పాల్‌ టవర్‌ ఎక్కాడు. ఒక రైడ్‌లో కేవలం 129 కిలోల బరువు మాత్రమే ఆ టవర్‌ మోయగలదు. అయితే టైర్ సాంప్సన్‌ బరువు 173 కిలోలు అయినా పార్క్ సిబ్బంది అతడ్ని అనుమతించారు. బరువు ఎక్కువగా ఉన్నప్పటికీ ఆ బాలుడిని ఫ్రీ ఫాల్ రైడ్‌కు పంపించారు. అయితే రైడ్ సమయంలో టైర్ సాంప్సన్‌ పెట్టుకున్న సీటు బెల్టు ఒకక్సారిగా గాల్లో ఉన్నపుడు ఊడిపోవడంతో.. 70 అడుగుల దూరంలో ఎగిరిపడి పడ్డాడు. దీంతో టైర్ సాంప్సన్ అక్కడే ప్రాణాలు కోల్పోయాడు.

ఈ క్రమంలోనే టైర్ సాంప్సన్ తల్లిదండ్రులు.. ఫ్లోరిడా కోర్టును ఆశ్రయించారు. కార్పొరేషన్ల నిర్లక్ష్యం వల్లే టైర్ సాంప్సన్‌ మృతి చెందాడని బాధితుల తరఫు లాయర్ వాదించారు. ఆ ఫ్రీ ఫాల్ రైడ్‌కు సంబంధించి.. సదరు పార్క్ యాజమాన్యం అక్కడికి వచ్చే వారి భద్రత కంటే డబ్బులపైనే ఎక్కువ దృష్టి సారించారని ఆరోపించారు. వారి నిర్లక్ష్యం కారణంగానే టైర్ సాంప్సన్ మృతి చెందాడని.. దీనికి తగిన బాధ్యత సదరు పార్కు వహించాలని లాయర్లు తెలిపారు. దీనిపై విచారణ జరిపిన ఫ్లోరిడా కోర్టు తాజాగా తీర్పు వెలువరించింది. మృతుడి కుటుంబసభ్యులకు 310 మిలియన్‌ డాలర్లు అంటే మన భారత కరెన్సీలో ఏకంగా రూ.2624 కోట్ల పరిహారం చెల్లించాలని ఆదేశించింది. అయితే సదరు పార్కులు.. పర్యాటకుల భద్రత విషయంలో మరింత జాగ్రత్తగా ఉండాలనే ఇలాంటి తీర్పును ఇస్తున్నట్లు కోర్టు వెల్లడించింది. దీంతో రైడ్‌ తయారీ, నిర్వాహక సిబ్బంది.. టైర్ సాంప్సన్ తల్లిదండ్రులకు ఒక్కొక్కరికి 155 మిలియన్‌ డాలర్లు అంటే రూ.1312 కోట్ల చొప్పున అందించాలని తెలిపింది.