హాస్టల్ గోడ దూకి విద్యార్థుల పరారీ

సినిమా.. మూడు అక్షరాల పదం.. రెండున్నర గంటల వినోదం.. అంతే, అంతకుమించి తీసుకుంటే.. జీవితాలు తలకిందులౌతాయి. రైలు ఎక్కి, దిగగానే కలెక్టర్ కావటం, సింగిల్ షాట్‌లో భిక్షపతి కాస్తా కరోడ్‌పతి కావటం అనేది కేవలం సినిమాల్లో సాధ్యం. నిజ జీవితంలోనూ అలాగే అవుతుందని ఊహించుకుంటే.. అది మన భ్రమ మాత్రమే. కానీ క్రికెటర్లను, హీరోలను దేవుళ్లుగా భావించే మనదేశంలో.. ఎంటర్‌టైన్‌మెంట్‌ను ఎంటర్‌టైన్ చేసేదిలా చూడట్లేదు. జీవితాలకు అన్వయించుకుంటున్నాం. అన్వయించుకునే క్రమంలో అది మంచిదైతే పర్లేదు కానీ.. చెడుగా అయితే.. పరిస్థితులు తలకిందులౌతాయి. అలాంటి ఘటనే విశాఖపట్నంలో చోటుచేసుకుంది. లక్కీ భాస్కర్ సినిమా చూసిన నలుగురు విద్యార్థులు తాము కూడా కార్లు, బంగ్లాలు సంపాదించాలనే ఆశతో హాస్టల్ నుంచి పారిపోయారు.

అసలు వివరాల్లోకి వెళ్తే.. విశాఖపట్నంలోని ఆంథోని బోర్డింగ్‌ హోమ్‌ నుంచి నలుగురు విద్యార్థులు అదృశ్యమయ్యారు. 9వ తరగతి చదువుతున్న జి.రఘు, బి.చరణ్‌తేజ, ఎన్‌.కిరణ్‌కుమార్, పి.కార్తీక్‌ అనే నలుగురు విద్యార్థులు సోమవారం సాయంత్రం వసతి గృహం నుంచి గోడ దూకి వెళ్లిపోయారు. అయితే విద్యార్థులు.. వారి ఇళ్లకు వెళ్లారేమోనని బోర్డింగ్ హోమ్ నిర్వాహకులు భావించారు. కానీ ఇళ్లకు రాలేదని తల్లిదండ్రులు చెప్పటంతో బోర్డింగ్ హోమ్ ఇన్‌ఛార్జి సోమవారం మహారాణిపేట పోలీసులకు ఫిర్యాదు చేశారు. దీంతో మిస్సింగ్ కేసు నమోదు చేసిన పోలీసులు విద్యార్థుల కోసం గాలిస్తున్నారు. బోర్డింగ్ హోమ్ సీసీటీవీ ఫుటేజీలను పరిశీలిస్తే సోమవారం సాయంత్రం నలుగురు విద్యార్థులు గోడ దూకి బయటకు వెళ్లినట్లు తెలిసింది.

మరోవైపు విద్యార్థులు నలుగురు ఇటీవల లక్కీ భాస్కర్ సినిమా చూసినట్లు తెలిసింది. అందులో హీరో సంపాదించిన విధంగానే తాము కూడా కోట్లు సంపాదించి కారులు, ఇళ్లు కొనుక్కోవాలని హాస్టల్ నుంచి పారిపోయినట్లు సమాచారం. విద్యార్థుల కోసం పోలీసులు రైల్వే స్టేషన్, బస్టాండ్‌లలో గాలించారు. ఇతర ప్రాంతాలకు వెళ్లారేమోననే అనుమానంతో రైల్వే స్టేషన్, బస్టాండ్లలోని సీసీటీవీ ఫుటేజీని కూడా పరిశీలిస్తున్నారు. విద్యార్థుల ఆచూకీ తెలిస్తే సమాచారం ఇవ్వాలంటూ పోస్టర్లు అతికించారు. వారి ఆచూకీని కనుగొనేందుకు తీవ్రంగా ప్రయత్నిస్తున్నారు.

మరోవైపు తమ పిల్లలు ఎక్కడకు వెళ్లారనేదీ తెలియక ఆ కుటుంబాలు విలపిస్తున్నాయి. ఎక్కడకు వెళ్లినా తిరిగి వచ్చేయాలని కోరుతున్నాయి. అయితే సినిమా చూసి విద్యార్థులు హాస్టల్ వదిలి వెళ్లిపోయారనే వార్త స్థానికంగా చర్చనీయాంశమైంది. వేగంగా వెళ్లే బండి.. వేగంగా వచ్చే రూపాయి.. ఎప్పుడో ఒక్కసారి పడిపోవాల్సిందే.. లక్కీ భాస్కర్‌ సినిమాలో ఇది కూడా ఓ డైలాగ్.. సినిమాను అంతగా ఫీల్ అయిన విద్యార్థులు.. ఇదే లైన్ ఎందుకు మర్చిపోయారోనని చాలా మంది అభిప్రాయపడుతున్నారు.