రాజధాని అమరావతి నిర్మాణం ఇక రయ్ రయ్.. తొలుత చేపట్టే పనులివే

ఏ ఫర్ అమరావతి.. పీ ఫర్ పోలవరం.. ఇదీ ఆంధ్రప్రదేశ్ ప్రభుత్వం రాజధాని అమరావతి నిర్మాణానికి ఇస్తున్న ప్రాధాన్యం. అమరావతిని అంతర్జాతీయ నగరాల స్థాయిలో నిర్మించాలని ప్రభుత్వం ప్రణాళికలు రచిస్తోంది. ఆ దిశగానే అడుగులు వేస్తోంది. అధికారంలోకి రాగానే అమరావతిలో జంగిల్ క్లియరెన్స్ పనులు చేపట్టిన ఆంధ్రప్రదేశ్ ప్రభుత్వం.. ఈ పనులను ఇప్పటికే పూర్తి చేసింది. ఇప్పుడు అమరావతిలో నిర్మాణాల దిశగా కసరత్తు జరుగుతోంది. ఇందులో భాగంగా అమరావతిలో చేపట్టాల్సిన పనులను ఆంధ్రప్రదేశ్ ప్రభుత్వం, సీఎం నారా చంద్రబాబు నాయుడు ఆమోదం తెలిపారు. ఈ మేరకు రాష్ట్ర ప్రభుత్వం నుంచి ఉత్తర్వులు జారీ అయ్యాయి.

అమరావతి నిర్మాణంలో భాగంగా తొలుత ఏయే పనులు చేపట్టాలనే విషయమై ఇటీవల సీఆర్‌డీఏ సమావేశమైన సంగతి తెలిసిందే. ముఖ్యమంత్రి నారా చంద్రబాబు నాయుడు అధ్యక్షతన జరిగిన ఆ భేటీలో 20 రకాల పనులను చేపట్టాలని నిర్ణయించారు. ఆ నిర్ణయానికి ఆమోదముద్ర వేస్తూ ఏపీ ప్రభుత్వం మంగళవారం ఉత్తర్వులు జారీ చేసింది. రూ.11,467 కోట్ల ఖర్చుతో 20 రకాల పనులను తొలుత చేపట్టనున్నారు. అమరావతి నిర్మాణం కోసం రూ.15000 కోట్లు ఇచ్చేందుకు ఇప్పటికే ప్రపంచబ్యాంకు, ఆసియన్ డెవలప్‌మెంట్ బ్యాంక్ ముందుకు వచ్చిన సంగతి తెలిసిందే. ఆ రుణం నిధులతో ఈ 20 రకాల పనులు చేపడతారు.

గెజిటెడ్, నాన్ గెజిటెడ్ ఆఫీసర్ల అపార్టుమెంట్లు, ఐఏఎస్ అధికారులు, ఎమ్మెల్యే, ఎమ్మెల్సీ నివాస సముదాయాలు, ఉద్యోగుల నివాస భవనాల నిర్మాణాలను ఈ నిధుల సాయంతో పూర్తి చేయనున్నారు. అలాగే మంత్రులు, సీనియర్ ఐఏఎస్ అధికారుల బంగ్లాలు, మంత్రుల క్వార్టర్స్‌ కోసం నిధులు విడుదలకు ప్రభుత్వం ఆమోదం తెలిపింది.

అలాగే సెక్రటేరియట్ టవర్లు, అసెంబ్లీ, మౌలిక సదుపాయాల నిర్మాణం కోసం ఈ నిధులను ఖర్చు చేసేందుకు ప్రభుత్వం ఆమోదం తెలిపింది. అమరావతిలో వరదనీటి నిర్వహణ కోసం కాల్వలు, రిజర్వాయర్ల నిర్మాణానికి కూడా నిధులు కేటాయించారు. ఇందుకోసం సీఆర్డీఏ రూ.1585 కోట్లు వెచ్చించనుంది. హ్యాపీనెస్ట్ ప్రాజెక్టు కోసం రూ.984 కోట్లు ఖర్చు చేయనున్నారు. వీటితో పాటుగా అమరావతి రాజధాని పరిధిలో కాలువలు, డ్రెయిన్లు, సైక్లింగ్ ట్రాకులు, వాకింగ్ ట్రాకులు, నీటి సరఫరా నెట్‌వర్క్‌, సీవరేజీ, యుటిలిటీ డక్టులు ఏర్పాటు చేయనున్నారు. ఈ పనులు చేపట్టేందుకు ఆంధ్రప్రదేశ్ ప్రభుత్వం ఆమోదం తెలిపింది.