విశాఖపట్నం పోర్టు నయా రికార్డు.. చరిత్రలో ఫస్ట్ టైమ్

విశాఖపట్నం పోర్టు సరికొత్త రికార్డు సృష్టించింది. సరుకు రవాణాకు సంబంధించి 2024-25 ఆర్థిక సంవత్సరంలో రికార్డ్ సృష్టించింది. ఈ ఆర్థిక సంవత్సరంలో 249 రోజులకు గానూ 55 మిలియన్ మెట్రిక్ టన్నుల సరుకు రవాణా చేసినట్లు విశాఖపట్నం పోర్టు అథారిటీ ఛైర్మన్ ఎం.అంగముత్తు చెప్పారు. 2023-24 ఆర్థిక సంవత్సరం మొత్తంలో 81.09 మిలియన్ మెట్రిక్ టన్నుల సరుకు రవాణా చేసినట్లు వెల్లడించారు. విశాఖపట్నం పోర్టు చరిత్రలో ఇదే ఇప్పటి వరకూ అత్యధికమని చెప్పారు. అయితే ఈ క్రమంలోనే 2024-25 ఆర్థిక సంవత్సరంలో 90 మిలియన్ మెట్రిక్ టన్నుల సరుకు రవాణా చేయాలని విశాఖపట్నం పోర్టు.. లక్ష్యంగా పెట్టుకుంది. అయితే 249 రోజులు పూర్తయ్యే సరికి 55 మిలియన్ మెట్రిక్ టన్నుల కార్గో రవాణా జరిగింది.దీంతో సరుకు రవాణాలో గత రికార్డులను బ్రేక్ చేసినట్లు పోర్టు అధికారులు చెప్తున్నారు. ఈ ఆర్థిక సంవత్సరం 90 మిలియన్ మెట్రిక్ టన్నుల లక్ష్యాన్ని చేరుకుని రికార్డు క్రియేట్ చేస్తామనే నమ్మకం ఉందంటున్నారు.

మరోవైపు 249 రోజుల్లోనే 55 మిలియన్ మెట్రిక్ టన్నుల సరుకు రవాణా అనేది విశాఖపట్నం పోర్టు చరిత్రలోనే రికార్డుగా పోర్టు ఛైర్మన్ అంగముత్తు వెల్లడించారు. పోర్ట్ విజయానికి రాష్ట్ర, జిల్లా అధికారులు, ప్రభుత్వ రంగ సంస్థలు, పరిశ్రమ భాగస్వామం కారణమని అంగముత్తు చెప్పారు. ప్రధానమంత్రి మారీటైమ్ ఇండియా విజన్ 2047, ముఖ్యమంత్రి స్వర్ణాంధ్ర ప్రదేశ్ 2047 లక్ష్యాలను సాధించేలా తమ వంతు సహకారం అందిస్తామని అంగముత్తు చెప్పారు. పారిశ్రామిక వృద్ధి కోసం 2025 ఫిబ్రవరి నాటికి మాస్టర్ ప్లాన్ ఫైనలైజ్ చేస్తామని చెప్పారు.. పారిశ్రామిక అభివృద్ధి కోసం విశాఖపట్నం పోర్టు అథారిటీ మాస్టర్ ప్లాన్ ద్వారా విశాఖతో పాటుగా దేశానికి కూడా ప్రయోజనం ఉంటుందన్నారు. మాస్టర్ ప్లాన్ కసరత్తు కోసం భాగస్వామ్యులు కూడా తమ సలహాలను పంచుకోవాలని కోరారు.

విశాఖపట్నం పోర్టు దేశంలోని ప్రధాన ఓడరేవుల్లో ఒకటి. అలాగే శుభ్రమైన పోర్టుగా గుర్తింపు పొందింది. ఇక ఆంధ్రప్రదేశ్‌లోని పెద్ద పోర్టు ఇదే. అలాగే సరుకు రవాణాలో దేశంలోనే మూడో స్థానంలో విశాఖపట్నం పోర్టు ఉంటుంది. ఇప్పుడు కార్గో రవాణా మరింత పెరిగిన నేపథ్యంలో.. టాప్ 2లో ఉండేలా అధికారులు చర్యలు తీసుకుంటున్నారు. ఈ క్రమంలోనే ఈ ఆర్థిక సంవత్సరంలో ఇప్పటికే కార్గో రవాణా రికార్డు స్థాయిలో నమోదైంది. ఇదే స్థాయిలో జరిగితే పోర్టు చరిత్రలోనే అత్యధిక సరుకు రవాణా జరిగిన సంవత్సరంగా 2024- 25 ఆర్థిక సంవత్సరం నిలుస్తుంది.