అప్పటికల్లా భోగాపురం ఎయిర్‌పోర్టు పూర్తి.. కేంద్ర మంత్రి ప్రకటన

విజయనగరం జిల్లా భోగాపురంలో నిర్మిస్తున్న అల్లూరి సీతారామరాజు అంతర్జాతీయ విమానాశ్రయం ఎప్పటికి పూర్తవుతాయనే విషయంలో కేంద్ర పౌరవిమానయాన శాఖ మంత్రి కింజరాపు రామ్మోహన్ నాయుడు క్లారిటీ ఇచ్చారు. ప్రస్తుతం భోగాపురం విమానాశ్రయం పనులు జెట్‌స్పీడ్‌తో జరుగుతున్నాయి. అయితే 2026 జూన్ నాటికి భోగాపురం ఎయిర్‌పోర్టు పనులను పూర్తి చేస్తామని కేంద్ర మంత్రి రామ్మోహన్ నాయుడు వెల్లడించారు. హైదరాబాద్‌లోని శంషాబాద్ నోవాటెల్‌లో జరిగిన ఎయిర్‌పోర్టు ప్రిడిక్టివ్ ఆపరేషన్ సెంటర్ ప్రారంభోత్సవంలో కేంద్ర మంత్రి రామ్మోహన్ నాయుడు పాల్గొన్నారు. ఈ సందర్భంగా మాట్లాడిన రామ్మోహన్ నాయుడు.. వరంగల్, భోగాపురం ఎయిర్‌పోర్టుల గురించి ప్రస్తావించారు. మరో ఐదేళ్లలో 50 విమానాశ్రయాలు నిర్మించాలని కేంద్రం లక్ష్యంగా పెట్టుకున్నట్లు చెప్పారు.

భోగాపురం విమానాశ్రయం విషయానికి వస్తే.. ఇటీవలే ఈ ఎయిర్‌‍పోర్టు పేరును అల్లూరి సీతారామరాజు అంతర్జాతీయ విమానాశ్రయంగా మార్చారు. జీఎంఆర్ సంస్థ భోగాపురం ఎయిర్‌పోర్టు నిర్మాణ పనులను దక్కించుకుంది. ఎల్‌అండ్‌టీ సంస్థతో కలిసి పనులు చేపడుతోంది. మూడు దశలలో ఈ ప్రాజెక్టు పనులు పూర్తి చేయనున్నారు. 2203 ఎకరాల విస్తీర్ణంలో రూ.4,592 కోట్లతో తొలి దశ పనులకు శ్రీకారం చుట్టారు. ఇప్పటికే విమానాశ్రయం టెర్మినల్‌ భవనం, రన్‌వే వంటి నిర్మాణాలను వేగంగా పూర్తి చేస్తున్నారు. భోగాపురం ఎయిర్ పోర్టు నిర్మాణ పనులకు శంకుస్థాపన జరిగిన ఏడాదిలోనే యాభైశాతానికి పైగా పనులు పూర్తి చేశారు. దీంతో నిర్దేశించుకున్న గడువు కంటే ముందే భోగాపురం విమానాశ్రయం పూర్తి అవుతుందని అంచనా.

మరోవైపు భోగాపురం ఎయిర్‌పోర్టును అనుసంధానించేలా రోడ్ల నిర్మాణం కూడా జరుగుతోంది. ఎయిర్‌పోర్టు ట్రంపెట్‌ నుంచి విమానాశ్రయం వరకు రోడ్డు పనులు చేపడుతున్నారు. అలాగే అనకాపల్లి జిల్లా అగనంపూడి నుంచి విశాఖపట్నం జిల్లా ఆనందపురం వరకు 12 ఫ్లై ఓవర్లు ఏర్పాటు చేయనున్నారు. ఇప్పటికే విశాఖపట్నంలో అంతర్జాతీయ విమానాశ్రయం ఉండగా.. భోగాపురం ఎయిర్‌పోర్టు కూడా పూర్తి అయితే ఉత్తరాంధ్ర రూపురేఖలు మారిపోతాయని అధికారులు చెప్తున్నారు. ఎయిర్‌పోర్టు నిర్మాణం పూర్తి అయితే ప్రత్యక్షంగా, పరోక్షంగా పలువురుకి ఉపాధి అవకాశాలు లభిస్తాయని.. అలాగే టూరిజం కూడా అభివృద్ధి చెందుతుందంటున్నారు. లాజిస్టిక్ హబ్‌గా మారే అవకాశాలు ఉన్నాయని చెప్తున్నారు. దీంతో భోగాపురం ఎయిర్ పోర్టు పనులకు రాష్ట్ర ప్రభుత్వం కూడా అధిక ప్రాధాన్యం ఇస్తోంది.