కెమికల్స్‌తో పాలు తయారీ.. లీటర్ రసాయనాలతో 500 లీటర్ల పాలు

కల్తీ.. కల్తీ.. కల్తీ. ఇప్పుడు ఎక్కడ చూసినా, ఏ వస్తువు చూసినా అంతా కల్తీమయం అవుతోంది. దీంతో ఏది తినాలన్నా, తాగాలన్నా కల్తీల భయంతో జనం వణికిపోతున్నారు. పసి పిల్లలు తాగే పాల దగ్గరి నుంచి మొదలుపెడితే.. పండు ముసలి వాళ్లు వాడే వస్తువుల వరకు అన్నింటినీ కొందరు కేటుగాళ్లు కల్తీలు చేస్తూ.. ప్రజల ప్రాణాలతో చెలగాటం ఆడుతున్నారు. ఇలా కల్తీ అయిన పదార్థాలతో తయారు చేసిన భోజనం తిని అస్వస్థతకు గురి కావడం, ఆస్పత్రిలో చేరి ప్రాణాలు కోల్పోయిన ఘటనలు ఎన్ని వెలుగులోకి వస్తున్నా.. ఈ కల్తీ కేటుగాళ్లు మాత్రం తగ్గడం లేదు. అతి తక్కువ ఖర్చుతో అత్యధిక లాభాలు పొందాలనే డబ్బు ఆశతో కొందరు అత్యాశపరులు చేస్తున్న పనులకు ప్రాణాలే పోతున్నాయి. తాజాగా ఓ వ్యక్తి కల్తీపాలను తయారు చేస్తూ అధికారులకు రెడ్ హ్యాండెడ్‌గా పట్టుబడ్డాడు.

ఉత్తర్‌ప్రదేశ్‌లోని బులంద్ షహర్‌కు చెందిన అజయ్ అగర్వాల్ అనే వ్యక్తి చేస్తున్న కల్తీ పాల బిజినెస్ ఇప్పుడు సర్వత్రా తీవ్ర విమర్శలకు గురి చేస్తోంది. అతడు ప్రమాదకరమైన కెమికల్స్ నుంచి స్వచ్ఛమైన పాల లాగా కనిపించే పాలను తయారు చేస్తుండగా అధికారులు పట్టుకుని.. వీడియో తీయగా.. అది ఇప్పుడు సోషల్ మీడియాలో వైరల్ అవుతుండటంతో.. అది చూసి జనం భయభ్రాంతులకు గురవుతున్నారు. ఒక లీటర్ కెమికల్‌తో అజయ్ అగర్వాల్ 500 లీటర్ల పాలు తయారు చేస్తున్నాడు. స్థానికంగా అగర్వాల్ ట్రేడర్స్ పేరుతో వ్యాపారం చేస్తున్న అజయ్ అగర్వాల్.. సింథటిక్ మిల్క్, పన్నీర్‌ను గత 20 ఏళ్లుగా విక్రయిస్తున్నట్లు పోలీసులు, అధికారులు గుర్తించారు.

ఇక ఆ కెమికల్స్ నుంచి పాలను తయారు చేస్తున్న ఆ కేటుగాడు.. ఎవరికీ అనుమానం రాకుండా జాగ్రత్తలు తీసుకున్నాడు. ఇక ఆ కల్తీ పాలకు అసలైన పాల రుచి వచ్చేలా కృత్రిమ తీపి పదార్థాలు, ఇతర ఫ్లేవర్లను ఉపయోగిస్తున్నట్లు తేలింది. ఫుడ్ సేఫ్టీ స్టాండర్డ్స్ అథారిటీ ఆఫ్ ఇండియా అధికారులు తనిఖీలు చేయగా.. ఈ కల్తీ పాల బాగోతం బయటికి వచ్చింది. ఇక ఈ తనిఖీల్లో అజయ్ అగర్వాల్‌కు చెందిన 4 గోడౌల నుంచి భారీగా కల్తీ పాలు తయారు చేసే రసాయనాలను అధికారులు స్వాధీనం చేసుకున్నారు. ఇప్పుడు ఈ కల్తీ పాల తయారీకి సంబంధించిన వీడియో సోషల్ మీడియాలో తెగ వైరల్ కావడంతో.. ప్రజల్లో తీవ్ర భయం నెలకొంది.

 అయితే కల్తీ పాల తయారీకి వాడిన కెమికల్స్ ఏంటనేది మాత్రం ఇప్పటివరకు నిందితుడు అజయ్ అగర్వాల్ వెల్లడించలేదని ఫుడ్ సేఫ్టీ స్టాండర్డ్స్ అథారిటీ ఆఫ్ ఇండియా అధికారులు తెలిపారు. కానీ 5 మిల్లీలీటర్ల కెమికల్‌తో 2 లీటర్ల సింథటిక్ పాలను తయారు చేసే వాడని గుర్తించారు. ఇక ఆ కల్తీ పాలకు స్వచ్ఛమైన పాల రుచి వచ్చేందుకు కొంతమంది ఫ్లేవరింగ్ ఏజెంట్లను కూడా అజయ్ అగర్వాల్ నియమించుకున్నట్లు తేల్చారు. దీంతో వీరు తయారు చేసిన సింథటిక్ మిల్క్ స్వచ్ఛమైన పాల రుచి, వాసన ఉండి.. ఎవరికీ అనుమానం రాకుండే ఉండేవని అధికారులు వెల్లడించారు.