వేసుకున్న బట్టలు చూసి అమ్మాయి ఎలాంటిదో చెప్పడం సరికాదు: కేరళ హైకోర్టు

స్త్రీ వేసుకున్న బట్టలు చూసి ఆమె ఎలాంటిదో జడ్డ్ చేయడం క్షమించరాని తప్పు అని కేరళ హైకోర్టు తెలిపింది. దీన్ని ఏ నాగరిక సమాజం కూడా అనుమతించదని వెల్లడించింది. ముఖ్యంగా అక్కడి ఓ కుటుంబ న్యాయస్థానం స్త్రీ వేష ధారణ, లైఫ్‌స్టైల్ చూసి ఆమె పిల్లల సంరక్షణ బాధ్యతలకు అనర్హురాలని పేర్కొంది. దీనిపై స్పందిస్తూనే.. న్యాయమూర్తులు దేవన్ రామచంద్రన్, ఎంబీ స్నేహలతలతో కూడిన ధర్మాసనం ఈ వ్యాఖ్యలు చేసింది.

కేరళలోని ఓ కుటుంబ న్యాయస్థానం ఇటీవలే ఓ జంటకు విడాకులు మంజూరు చేసింది. ఈక్రమంలోనే పిల్లల సంరక్షణ బాధ్యతలను తండ్రికి అప్పగించింది. తల్లి పిల్లల సంరక్షణకు అనర్హులాని ప్రకటించింది. అలా ప్రకటించడానికి కారణం ఆమె భర్త చేసిన ఆరోపణలు. తన భార్య ఎప్పుడూ మోడ్రన్ డ్రెస్‌లు వేసుకుంటుందని.. అలాగే డేటింగ్ యాప్‌లలో ఆమె ఫొటోలు పెడుతుందని చెప్పారు. మగ స్నేహితులతో తరచుగా మాట్లాడుతుందని, అలాగే తనపై కోపం వచ్చినప్పుడు అసభ్య పదజాలం ఉపయోగిస్తుందంటూ కోర్టులో చెప్పాడు.

ఇదంతా విన్న కుటుంబ న్యాయస్థానం.. ఆమె పిల్లల సంరక్షణకు అనర్హురాలంటూ.. పిల్లల సంరక్షణ బాధ్యతను తండ్రికి అప్పగించింది. దీనిపై కేరళ హైకోర్టు తీవ్ర ఆగ్రహం వ్యక్తం చేసింది. ఒక మహిళ వేశధారణ చూసి కోర్టు తీర్పులు ఇవ్వడం సరైన పద్ధతి కాదని పేర్కొంది. వ్యక్తిగత అభిప్రాయాలు ఎప్పుడూ తీర్పులను ప్రభావితం చేయకూడదని తెలిపింది. అలాగే పితృస్వామ్య సమాజంలో.. స్త్రీలు, పురుషులు ఇలాగే జీవించాలని ఉన్న కట్టుబాట్లు మనిషి నరనరాల్లో వ్యాపించాయని బెంచ్ అంగీకరించింది.

మహిళలు ఇలాంటి బట్టలు మాత్రమే వేసుకోవాలని చెప్పడం, వారు వేసుకున్న బట్టలు చూసి నీవు ఇలాంటి దానివని చెప్పడం వల్ల వారిపై చిన్నప్పటి నుంచే ప్రభావం పడుతుందని తెలిపింది. దుస్తులు అనేవి ఆమె గుర్తింపు, సౌందర్య వ్యక్తీకరణకు సంబంధించినదని పేర్కొంది. అంతేకాకుండా మహిళ తన భర్త నుంచి విడాకుల పొందిన తర్వాత దాన్ని సెలబ్రేట్ చేసుకోవడం ఆమె ఇష్టం అని చెప్పింది. కానీ అందుకు సంబంధించిన ఫొటోలను ఆమె మాజీ భర్త కోర్టుకు చూపించడం సరైన పద్ధతి కాదని వివరించింది. ఆ ఫొటోలను కుటుంబ న్యాయస్థానం సాక్ష్యాలు తీసుకుందని.. హైకోర్టు వెల్లడించింది.

ఒక మహిళ విడాకులు తీసుకున్న తర్వాత ఏడుస్తూనే ఉండాలి.. అస్సలు సంతోషంగా ఉండకూడదనే భావనా అందరిలోనూ పాతుకుపోయిందని ధర్మాసనం తెలిపింది. ఈ కేసుకు తదుపరి విచారణ ఏమాత్రం అవసరం లేదని.. వ్యక్తిగత అభిప్రాయాలు ఎప్పుడూ తీర్పును ప్రభావితం చేయకూడదంటూ కేసును క్లోజ్ చేసింది.