దక్షిణ కొరియా అధ్యక్షుడిపై అభిశంసన తీర్మానం.. ఆమోదించిన సభ!

దక్షిణ కొరియా అధ్యక్షుడు యూన్ సుక్ యోల్ ఇటీవలే ఎమర్జెన్సీ మార్షల్ లా విధించగా.. ఆయనపై తీవ్ర వ్యతిరేకత వచ్చింది. దాని మూలంగానే నేషనల్ అసెంబ్లీలో ఆయనపై అభిశంసన తీర్మానం ప్రవేశ పెట్టారు. ఇప్పటికే ఓసారి ఈ తీర్మానం పెట్టగా.. నేడు మరోసారి ఓటింగ్ నిర్వహించారు. ఈక్రమంలోనే అధ్యక్షుడు పదవి నుంచి తప్పుకోవాలని 204 మంది ఓట్లు వేశారు. దీంతో ఆయన పదవిని కోల్పోయే అవకాశం ఎక్కువగా ఉన్నట్లు తెలుస్తోంది.

దేశంలోని ప్రతిపక్షాలు దేశ వ్యతిరేక కార్యకలాపాలకు పాల్పడుతున్నారంటూ.. డిసెంబర్ 3వ తేదీన దక్షిణ కొరియా అధ్యక్షుడు ఎమర్జెన్లీ మార్షల్ లా ప్రకటించారు. ఇది 6 గంటల పాటు కొనసాగింది. అయితే 40 ఏళ్ల దేశ చరిత్రలో మార్షల్ లా చట్టం ఉపయోగించడం ఇదే మొదటి సారి. అయితే దీనిపై పెద్ద ఎత్తున వ్యతిరేక వచ్చింది. దాదాపు 10 వేల మంది ప్రజలు తీవ్రమైన చలిని తట్టుకుంటూ రాజధాని సియోల్ రోడ్లపైకి వచ్చి అధ్యక్షుడికి వ్యతిరేకంగా నినాదాలు చేశారు. అధ్యక్షుడిని బహిష్కరించి అరెస్ట్ చేయాలంటూ డిమాండ్ చేశారు.ఆ ఒక్కచోట మాత్రమే కాకుండా దేశంలోని చాలా ప్రాంతాల్లో ఈ నిరసనలు కొనసాగాయి. దీంతో వెనక్కి తగ్గిన దేశాధ్యక్షుడు యూన్ సుక్ యోల్.. ప్రకటనను ఆరు గంటల్లోనే వెనక్కి తీసుకున్నాడు. అయినప్పటికీ ప్రతిపక్షాలు ఆయనపై నిరసన వ్యక్తం చేస్తున్నాయి. ఆయన అధ్యక్ష పదవి నుంచి తప్పుకోవాలంటూ కోరుతున్నాయి.

ఈక్రమంలోనే డిసెంబర్ 7వ తేదీన మొదటిసారి అధ్యక్షుడు యూన్ సుక్ యోల్‌పై అభిశంసన తీర్మానం ప్రవేశ పెట్టారు. అయితే దక్షిణ కొరియా అధికార పీపుల్ పవర్ పార్టీకి చెందిన చాలా మంది అసెంబ్లీని బహిష్కరించారు. దీంతో అధ్యక్షుడు తృటిలో అభిశంసన తీర్మానం నుంచి తప్పించుకున్నారు. కానీ మళ్లీ ఈరోజు అభిశంసన తీర్మానం ప్రవేశ పెట్టారు. అసెంబ్లీలో మొత్తం 300 మంది సభ్యులు ఉండగా.. అధ్యక్షుడు యూన్ సుక్ యోల్‌కు వ్యతిరేకంగా 204 మంది ఓట్లు వేశారు. ఆయనకు అనుకూలంగా 85 మంది ఓటు వేశారు.

అయితే అభిశంసన తీర్మానానికి సంబంధించిన ఓటింగ్ పత్రాలను న్యాయస్థానానికి పంపాల్సి ఉంటుంది. వాటిని పరిశీలించి కోర్టు అభిశంసన తీర్మానంపై నిర్ణయం తీసుకోవాల్సి ఉంటుంది. దీనికి 180 రోజుల గడువు ఉంటుంది. అయితే అప్పటి వరకు అధ్యక్షుడిని పదవిలో ఉంచాలా వద్దా అనేదాన్ని కూడా న్యాయస్థానమే నిర్ణయిస్తుంది. ఒకవేళ పదవి నుంచి తొలగిస్తే.. ఆ రోజు నుంచి 60 రోజుల్లోపు ఎన్నికలు నిర్వహించాల్సి ఉంటుంది. చూడాలి మరి ఏం జరగనుంది అనేది.