ఎమర్జెన్సీగా లోన్ కావాలా? సిబిల్ స్కోరు చాలా తక్కువగా ఉన్నా ఇలా ఈజీగా లోన్ పొందొచ్చు

బ్యాంకుల్లో పర్సనల్ లోన్లు తీసుకునే వారి ఎక్కువే. ఇటీవల చిన్న చిన్న అవసరాలకు కూడా ఈ లోన్ల కోసం చూస్తున్నారు. ఒకప్పటితో పోలిస్తే ఇప్పుడు లోన్ ప్రాసెసింగ్ సమయం కూడా తక్కువగానే ఉంటుంది. బ్యాంకులు కూడా లోన్లు ఇష్యూ చేసే సంఖ్య పెరుగుతోంది. ఎలాంటి డాక్యుమెంట్లు కూడా పెద్దగా అవసరం లేకుండా లోన్లు వేగంగా మంజూరు చేస్తున్నాయి. ఇక ఎలాంటి గ్యారెంటీ సమర్పించం కాబట్టి ఈ పర్సనల్ లోన్లు అనేవి అన్‌సెక్యుర్డ్ లోన్లు అని చెప్పొచ్చు. వ్యక్తిగత అవసరాల కోసం.. ఈ పర్సనల్ లోన్ నిధుల్ని ఉపయోగించుకోవచ్చు. ఇక్కడ ఎలాంటి ఆస్తిని తాకట్టు పెట్టాల్సిన అవసరం ఉండదు కాబట్టి.. ఎక్కువగా రుణ గ్రహీత క్రెడిట్ స్కోరు అదే విధంగా ఆదాయాన్ని బట్టి ఆధారపడి ఉంటుంది. ఇక్కడ మీ క్రెడిట్ స్కోరు తక్కువగా ఉన్నట్లయితే అప్పుడు లోన్ పొందే సామర్థ్యం తక్కువగా ఉంటుంది.

క్రెడిట్ స్కోరు అనేది ఆర్బీఐ గుర్తింపు పొందిన క్రెడిట్ బ్యూరోలు ఇచ్చే మూడంకెల స్కోరు. ఇది సాధారణంగా 300 నుంచి 900 పాయింట్ల మధ్య ఉంటుంది. ఇది మీ ఖర్చుల్ని, క్రెడిట్ హిస్టరీని తెలియజేస్తుంటాయి. లో క్రెడిట్ స్కోరు అంటే.. ఇక్కడ వీరికి ఆర్థిక క్రమశిక్షణ లేదన్నమాట. అంతకుముందు రుణాల్ని నిర్దిష్ట సమయానికి చెల్లించలేదని మీపై ముద్రపడినట్లే. ఇక్కడ తక్కువ వడ్డీ రేటుకు లోన్ కూడా రాదు. మరోవైపు నిర్దిష్ట సమయానికి లోన్ కడతారని మీపై రుణ దాత నమ్మకం కూడా ఉంచరు.

సిబిల్ స్కోరు 300-500 మధ్య ఉంటే పూర్ రేటింగ్ అన్నమాట. ఇక్కడ లోన్ పొందే అవకాశాలు చాలా చాలా తక్కువగా ఉంటాయి. అదే 550-600 మధ్య ఉంటే యావరేజ్ అన్నమాట. 650-750 మధ్య సిబిల్ స్కోరు ఉంటే రేటింగ్ గుడ్‌గా ఉంటుంది. 750- 900 రేంజ్ అయితే ఎక్సలెంట్ అన్నమాట. 750 కిపైగా సిబిల్ స్కోరు ఉంటే.. లోన్ పొందే ఛాన్స్ ఎక్కువగా ఉంటుంది. ఇక్కడ వడ్డీ రేట్లు కూడా తక్కువగానే ఉండొచ్చు.

అయితే క్రెడిట్ స్కోరు 450 ఉంటే పర్సనల్ లోన్ పొందడం కాస్త కష్టమే అయినా పొందొచ్చని చెబుతున్నారు నిపుణులు. ఇక్కడ హైయర్ యుటిలైజేషన్ రేషియో వల్ల.. ఇంకా ఈఎంఐలు సరిగా చెల్లించకపోవడం వల్ల ఇలా జరిగి ఉంటుంది. ఇక్కడ రిస్క్ కారణంగా లోన్ ఇచ్చేందుకు దాత వెనుకడుగు వేయొచ్చు. అయితే.. ఇక్కడ కూడా అధిక వడ్డీ రేట్లకు.. తక్కువ కాల వ్యవధితో లోన్లు ఇచ్చే అవకాశాలు ఉంటాయి. ఇంకొన్ని సందర్భాల్లో ఇక్కడ ఆస్తి తనఖా పెట్టొచ్చు. అయితే.. ఇక్కడ ఈఎంఐ చాలా ఎక్కువ ఉంటుందని చెప్పొచ్చు.

>> క్రెడిట్ స్కోరు తక్కువగా ఉన్నప్పుడు మీరు రుణ దాతకు సెక్యూరిటీగా ఏదైనా సమర్పించాలి. రెగ్యులర్ పర్సనల్ లోన్లతో పోలిస్తే ఈ సెక్యుర్డ్ లోన్లపై వడ్డీ తక్కువ పడుతుంది.

>> స్థిర ఉపాధి, రెగ్యులర్ ఆదాయం ఉన్నట్లయితే.. మీరు దీనిని దాతకు నిరూపించగలిగితే అప్పుడు లోన్ పొందే సామర్థ్యం మెరుగుపర్చుకున్నట్లే. మీ ప్రొఫైల్ స్ట్రాంగ్ అని చెప్పేందుకు.. మీ పెట్టుబడులు, ఆస్తుల వివరాలు కూడా వెల్లడించొచ్చు.

 >> ఉత్తమ క్రెడిట్ స్కోరు ఉన్న వ్యక్తిని గ్యారంటర్‌గా చేర్చడం వల్ల కూడా మీకు బ్యాంకులు లోన్ ఇచ్చే అవకాశాన్ని పరిశీలించొచ్చు. తక్కువ రుణ మొత్తం కోసం అప్లై చేసుకోవడం కూడా మంచి ఆప్షన్ అని చెప్పొచ్చు.