రూ.7 లక్షల ఉచిత బీమా సహా.. పీఎఫ్ ఖాతాతో లభించే ఈ ప్రయోజనాలు తెలుసా

ఉద్యోగం చేస్తున్న ప్రతి ఒక్కరికీ ఎంప్లాయీస్ ప్రావిడెంట్ ఫండ్ అకౌంట్ అనేది ఉంటుందని తెలిసిందే. ఉద్యోగితో పాటు పని చేస్తున్న కంపెనీ యాజమాన్య నెల నెల ఇందులో డబ్బులు జమ చేస్తుంది. ఉద్యోగి బేసిక్ వేతనం నుంచి 12 శాతం, అంతే సమానమైన మొత్తంలో కంపెనీ పీఎఫ్ ఖాతాకు జమ చేస్తుంటుంది. ప్రతి నెలా ఇందులో జమ అయ్యే డబ్బులకు కేంద్రం వడ్డీ రేటు కల్పిస్తుందని తెలిసిందే. ఈ డబ్బులు పదవీ విరమణ తర్వాత పెద్ద మొత్తంలో చేతికి అందుతాయి. రిటైర్మెంట్ కోసం ఉద్దేశించినప్పటికీ అత్యవసర పరిస్థితుల్లో డబ్బులు పాక్షికంగా విత్ డ్రా చేసుకోవచ్చు. అంతే కాదు పీఎఫ్ ఖాతా ఉండడం వల్ల చాలా ప్రయోజనాలు ఉన్నాయి. అవేంటో ఇప్పుడు మనం తెలుసుకుందాం.

పన్ను మినహాయింపులు..

ఈపీఎఫ్ ఖాతాలో జమ చేసే డబ్బులపై ఆదాయపు పన్ను మినహాయింపులు పొందవచ్చు. ఇన్‌కమ్ ట్యాక్స్ యాక్ట్ 1961లోని సెక్షన్ 80సీ కింద గరిష్ఠంగా రూ.1.50 లక్షల వరకు ట్యాక్స్ మినహాయింపులు లభిస్తాయి. అయితే, పాత పన్ను విధానం ఎంచుకున్న వారికే ఇది వర్తిస్తుందని గుర్తుంచుకోవాలి.

వడ్డీపైనా పన్నులు ఉండవు..

ప్రతి నెల పీఎఫ్ అకౌంట్లో జమ అయ్యే డబ్బులపై కేంద్ర ప్రభుత్వం వడ్డీ చెల్లిస్తుంది. సాధారణంగా వడ్డీ ఆదాయంపై పన్నులు ఉంటాయి. కానీ, పీఎఫ్ ఖాతాలో జమ అయ్యే వడ్డీపైన ఎలాంటి పన్నులు చెల్లించాల్సిన అవసరం ఉండదు.

మెచ్యూరిటీ సొమ్ములపైనా..

జీతం శ్లాబ్‌తో సంబంధం లేకుండా మెచ్యూరిటీ సమయంలో వచ్చే మొత్తంపైనా ఎలాంటి ట్యాక్స్ ఉండదు.

పెన్షన్..

ఈపీఎఫ్ చందాదారులకు పదవీ విరమణ అనంతరం పెన్షన్ లభిస్తుంది. చందాదారుడు మరణించినట్లయితే ఆ కుటుంబ సభ్యులకు పెన్షన్ అందుతుంది.

ముందస్తు ఉపసంహరణ..

ఈపీఎఫ్ నిల్వలను గృహ నిర్మాణం, వైద్య ఖర్చులు, ఉన్నత చదువుల వంటి వాటికి పీఎఫ్ డబ్బులను ముందస్తుగా విత్ డ్రా చేసుకోవచ్చు.

రూ.7 లక్షల ఉచిత బీమా..

ఈపీఎఫ్ అందిస్తున్న ప్రయోజనాల్లో చాలా మందికి తెలియనిది రూ.7 లక్షల బీమా. ఉద్యోగులకు డిపాజిట్ లింక్డ్ ఇన్సూరెన్స్ స్కీమ్  ద్వారా ఇన్సూరెన్స్ కవరేజీ ఉంటుంది. సర్వీసులో ఉండగా చందాదారుడికి జరగరానిది జరిగితే ఆ కుటుంబానికి రూ.7 లక్షల వరకు బీమా ప్రయోజనాన్ని ఈపీఎఫ్ఓ అందిస్తుంది.

కాంపౌండింగ్ ఇంట్రెస్ట్..

ఈపీఎఫ్ ఖాతాలోని డబ్బులపై ఏడాదికి ఒకసారి వడ్డీ చెల్లిస్తుంది కేంద్రం. గత ఆర్థిక సంవత్సరం 2023-24కు సంబంధించి 8.25 శాతం వడ్డీ ప్రకటించింది. దీనిపై చక్రవడ్డీ లభిస్తుంది. ఈపీఎఫ్‌లో ఎక్కువ కాలం ఉండే వారికి పదవీ విరమణ నాటికి కార్పస్ వేగంగా పెరుగుతుంది.