అల్లు అర్జున్ ఎర్ర చొక్కా.. బన్నీ షర్ట్ గురించి నెట్టింట చర్చ

సోషల్ మీడియా.. అదో మాయా ప్రపంచం.. లేనిది ఉన్నట్లు భ్రమింపజేయగలదు. ఉన్నదానిని లేదంటూ నమ్మించనూగలదు. ట్రెండింగ్ విషయం ఏదైనా సరే ఎవరి జోస్యాలు, అంచనాలు, విశ్లేషణలు, వాదనలు వారివే. దానికి వచ్చే కౌంటర్లు, వేసే రివర్స్ కౌంటర్లు.. అలా అలా సాగిపోతాయంతే. ఇక విషయానికి వస్తే తెలుగు రాష్ట్రాల్లో ఇటీవల కాలంలో చర్చనీయాంశమైన ఘటనలు రెండే రెండు. ఒకటి మంచు మోహన్ బాబు కుటుంబ వ్యవహారం.. రెండోది అల్లు అర్జున్ అరెస్ట్ సంగతి. మంచు వారింట పంచాయతీ ఇంకా సాగుతూనే ఉంది. రెండోది ఐకాన్ స్టార్ అల్లు అర్జున్ అరెస్ట్ వ్యవహారం. దీనిపై జాతీయ స్థాయిలోనూ చర్చ జరిగింది. కేంద్ర మంత్రులు కూడా దీనిపై స్పందించారంటే ఈ విషయం ఇంపాక్ట్ ఎంతగా ఉందో చెప్పాల్సిన పనిలేదు.

అయితే సంధ్య థియేటర్ తొక్కిసలాట ఘటనపై అల్లు అర్జున్ అరెస్ట్ కావటం.. ఒక రోజు చంచల్ గూడ జైలులో ఉన్న సంగతి తెలిసిందే. ఆ తర్వాత మధ్యంతర బెయిల్ మీద అల్లు అర్జున్ బయటకు వచ్చారు. అల్లు అర్జున్ ఇంటికి చేరుకున్న తర్వాత సినీ, రాజకీయ రంగాలకు చెందిన పలువురు ప్రముఖులు ఆయనను కలిసి పరామర్శించారు. అరెస్ట్ వ్యవహారం గురించి చర్చించారు. అలాగే అల్లు అర్జున్ కూడా చిరంజీవి, నాగబాబు ఇంటికి వెళ్లారు. సతీసమేతంగా అల్లు అర్జున్ చిరంజీవి, నాగబాబు ఇళ్లకు వెళ్లారు. దీనికి సంబంధించి సోషల్ మీడియాలో అనేక ట్వీట్లు, పోస్టులు వైరల్ అవుతున్నాయి. అలాగే ఓ ఎక్స్ యూజర్ పెట్టిన పోస్టు వైరల్ అవుతోంది.

చిరంజీవి, నాగబాబు ఇంటికి వెళ్లిన సమయంలో అల్లు అర్జున్ ఎర్ర చొక్కా వేసుకోవటం గురించి సదరు యూజర్ తనదైన విశ్లేషణ చేశారు. అల్లు అర్జున్ జైలు నుంచి విడుదల అయిన తర్వాత చిరంజీవి, నాగబాబు ఇంటికి తొలిసారిగా వెళ్లారని.. అప్పుడు ఎర్రచొక్కా వేసుకున్నారంటూ యూజర్ రాసుకొచ్చారు. ఎర్ర చొక్కా జనసేన పార్టీకి చిహ్నమంటూ తనదైన విశ్లేషణ చేశారు. మెగా ఫ్యామిలీ గురించి, జనసేన గురించి ఇక అల్లు అర్జున్ ఫ్యాన్స్ విషపు ప్రచారం ఆపాలని రాసుకొచ్చారు.

2024 ఆంధ్రప్రదేశ్ అసెంబ్లీ ఎన్నికల సమయం నుంచి మెగా ఫ్యాన్స్, అల్లు అర్జున్ ఫ్యాన్స్ మధ్య సోషల్ మీడియా వేదికగా వార్ మొదలైంది. వైసీపీ అభ్యర్థి శిల్పారవిచంద్ర కిషోర్ రెడ్డికి మద్దతుగా అల్లు అర్జున్ నంద్యాలకు వెళ్లటంతో ఈ ఫ్యాన్ వార్ ముదిరింది. ఆ తర్వాత పవన్ కళ్యాణ్, అల్లు అర్జున్ అభిమానులు సోషల్ మీడియాలో ఒకరిపై ఒకరు పోస్టులు పెట్టుకోవటం మొదలెట్టారు. అయితే అల్లు అర్జున్ అరెస్ట్ సమయంలో మెగాస్టార్ చిరంజీవి, నాగబాబు అల్లు అర్జున్ ఇంటికి వెళ్లటం వారికి ధైర్యం చెప్పడం.. అలాగే జైలు నుంచి బయటకు వచ్చిన తర్వాత బన్నీ కూడా చిరంజీవిని, నాగబాబుకు కలవటంతో ఈ ఫ్యాన్ వార్‌కు ఫుల్ స్టాప్ పడినట్టేనని భావిస్తున్నారు.