హిందూ సంఘాలకు భయపడి.. రిసెప్షన్ రద్దుచేసుకున్న కొత్త జంట

హిందూ సంఘాలకు భయపడి ఓ కొత్త జంట తమ వివాహ విందును రద్దుచేసుకున్నారు. ఈ షాకింగ్ ఘటన ఉత్తర్ ప్రదేశ్‌లోని అలీగఢ్‌లో చోటుచేసుకుంది. అమెరికాలో ఉద్యోగాలు చేస్తోన్న యూపీకి చెందిన హిందూ అమ్మాయిని.. ముస్లిం అబ్బాయి వివాహం చేసుకున్నారు. నాలుగు నెలల కిందట ఈ పెళ్లి జరగ్గా.. ఇండియాలో రిసెప్షన్ ఏర్పాటు చేశారు. ఇందుకోసం ఆహ్వాన పత్రికలు వేయించగా.. ఈ విషయం సోషల్ మీడియాలో వైరల్ అయ్యింది. దీంతో బజరంగ్ దళ్, కర్నిసేన, బ్రహ్మణ మహా సభ సహా హిందూ సంఘాలు వ్యతిరేకిస్తూ ఆందోళనకు దిగాయి. ర్యాలీగా వెళ్లి జిల్లా అధికారులకు వినతిపత్రం అందజేసి.. ఇది మతసామరస్యానికి విఘాతం కలిగించేలా ఉందని స్పష్టం చేశాయి. అంతేకాదు, ఈ విందు జరిగితే మత ఘర్షణలు తప్పవని, పరిణామాలు తీవ్రంగా ఉంటాయని హెచ్చరించాయి.

వివరాల్లోకి వెళ్తే.. ఉత్తర్ ప్రదేశ్‌లోని అలీగఢ్‌కు చెందిన ముస్లిం యువకుడు అషర్ చౌదురి (30) అమెరికాలో ఓ బహుళజాతి సంస్థలో ఉద్యోగం చేస్తున్నాడు. ఎంబీఏ గ్రాడ్యుయేట్ అయిన యూపీకి చెందిన అవని భార్గవ (29) కూడా అమెరికాలోనే ఓ సంస్థలో పనిచేస్తోంది. ఇరువురికి అక్కడ ఏర్పడిన పరిచయం ప్రేమగా మారడంతో వివాహం చేసుకోవాలని నిర్ణయించుకున్నారు. ఇరు కుటుంబాలు అందుకు అంగీకరించడంతో నాలుగు నెలల కిందట అమెరికాలో వివాహం చేసుకున్నారు. శాన్‌ఫ్రాన్సిస్కోలోని భారత కాన్సులెట్‌లో ప్రత్యేక వివాహ చట్టం కింద రిజిస్ట్రేషన్ చేయించారు. అయితే, భారత్‌లోని తమ బంధువులు, కుటుంబసభ్యులకు విందు ఇవ్వాలని నిర్ణయించుకున్న వారి కుటుంబాలు.. ఇక్కడకు చేరుకున్నాయి.

డిసెంబరు 21న అలీగఢ్‌లో రిసెప్షన్ కోసం స్థానిక జీటీ రోడ్డులోని ఓ ఫంక్షన్ హాల్ బుక్ చేసి.. ‘నూతన వధూవరులు అవని, అషర్‌లను వచ్చి ఆశీర్వించండి’ అని ఆహ్వాన పత్రికలు వేయించారు. ఈ పత్రిక సోషల్ మీడియాలో వైరల్ కావడంతో హిందూ సంఘాలు పెద్ద ఎత్తున ఆందోళనకు దిగాయి. శుక్రవారం పెద్ద ఎత్తున ర్యాలీగా కలెక్టరేట్‌కు వెళ్లి.. ఏడీఎం అమిత్ కుమార్ భట్‌కు విజ్ఞాపన పత్రం అందజేసి... రిసెప్షన్ రద్దుచేయాలని డిమాండ్ చేశారు. అంతేకాదు, ఒకవేళ వేడుక జరిగితే పరిణామాలు తీవ్రంగా ఉంటాయని ఫంక్షన్ హాల్ యజమానితో పాటు అధికారులను హెచ్చరించారు. దీని వల్ల మత :ఘర్షణలు చెలరేగుతాయని వార్నింగ్ ఇచ్చారు.

ఇది పూర్తిగా లవ్ జీహాద్ కేసులా ఉందని ఆల్ ఇండియా కర్ని సేన రాష్ట్ర అధ్యక్షుడు ఠాకూర్ జ్ఞానేంద్ర సింగ్ చౌహన్ ఆరోపించారు. ఈ విషయంలో మేము వెనక్కి తగ్గేది లేదని, ఫంక్షన్ హాల్‌లోకి కూడా వెళ్లడానికి వెనుకాడబోమని అన్నారు. ఏదైనా జరిగితే అందుకు అధికారులు, ఫంక్షన్ యజమానే బాధ్యత వహించాలని హెచ్చరించారు. ‘మేజర్లు తమ ఇష్టప్రకారం వివాహం చేసుకోవడానికి రాజ్యాంగం అనుమతిస్తున్నప్పటికీ, అలీగఢ్ వంటి సున్నితమైన నగరంలో అలాంటి కార్యక్రమాన్ని నిర్వహించడం అశాంతిని రేకెత్తిస్తుంది... పెళ్లికి మేం వ్యతిరేకం కాదు.. కానీ వేడుక ఇక్కడ జరగకూడదు’ అని బజరంగ్ దళ్ నేత వ్యాఖ్యానించారు.

ఈ పరిణామాల నేపథ్యంలో రిసెప్షన్‌కు రద్దు చేసుకుంటున్నట్టు ఇరు కుటుంబాలు ప్రకటించాయి. తప్పనిసరి పరిస్థితుల్లో ఈ నిర్ణయం తీసుకున్నట్టు సోషల్ మీడియాలో వెల్లడించాయి. విందుకు హాజరయ్యే అతిథుల భద్రత దృష్టిలో పెట్టుకుని కార్యక్రమాన్ని రద్దుచేయాలని నిర్ణయించినట్టు ఆ కుటుంబాలకు సన్నిహితంగా ఉండే వ్యక్తి అన్నారు.