పెళ్లైన 4 రోజులకే భర్తను చంపిన భార్య.. బావతో కలిసి ఘాతుకం, ఏం తెలియనట్టే

పెళ్లి అయిన నాలుగు రోజులకే ఓ భార్య.. భర్తను చంపించిన ఘటన ఇప్పుడు తీవ్ర సంచలనంగా మారింది. ఆ యువతికి పెళ్లికి ముందే తన బావతో సంబంధం ఉండగా.. ఆమె తల్లిదండ్రులు బలవంతంగా పెళ్లి చేశారు. అయితే ఆ పెళ్లి ఇష్టం లేని యువతి.. ఎలాగైనా భర్తను వదిలేసి తన బావ దగ్గరికే వెళ్లాలని నిర్ణయించుకుంది. ఈ క్రమంలోనే పెళ్లైన 4 రోజులకే.. బావతో భర్తను కిడ్నాప్ చేయించి.. అతి దారుణంగా హత్య చేయించింది. అయితే తనకేమీ తెలియనట్లుగా ఆ యువతి ప్రవర్తించింది. ఈ నేపథ్యంలోనే ఆమెపై భర్త కుటుంబ సభ్యులకు అనుమానం వచ్చింది. ఆమె ఫోన్ కాల్ లిస్ట్ తీయగా.. అనుమానాస్పదంగా అనిపించింది. పోలీసులు రంగంలోకి దిగి విచారణ జరపగా అసలు విషయం వెలుగులోకి వచ్చింది. దీంతో ఆ యువతితోపాటు ఆమె బావను పోలీసులు అరెస్ట్ చేశారు.

గుజరాత్‌లోని గాంధీనగర్‌లో జరిగిన ఈ సంఘటన ఇప్పుడు తీవ్ర చర్చనీయాంశంగా మారాయి. అహ్మదాబాద్‌కు చెందిన భావిక్‌కు, గాంధీనగర్‌కు చెందిన పాయల్‌తో ఇటీవలె పెళ్లి జరిగింది. ఈ క్రమంలోనే అత్తగారింటి వద్ద ఉన్న భార్యను తన ఇంటికి తీసుకువచ్చేందుకు శనివారం బైక్‌పై భావిక్ బయల్దేరాడు. ఈ నేపథ్యంలోనే అతడు ఎంత సేపు అయినా అత్తింటికి చేరలేదు. అతడికి ఫోన్ చేసినా భావిక్ ఫోన్ లిఫ్ట్ చేయలేదు. దీంతో భావిక్ తండ్రికి.. పాయల్ తండ్రి ఫోన్ చేయగా.. అప్పటికే వెళ్లినట్లు చెప్పాడు. దీంతో భావిక్ కోసం వెతకడం ప్రారంభించారు. ఈ క్రమంలోనే రోడ్డు పక్కన భావిక్‌ బైక్‌ను గుర్తించారు. ఎవరో గుర్తు తెలియని వ్యక్తులు వచ్చి భావిక్‌ను ఢీకొట్టి అతడ్ని కిడ్నాప్ చేసినట్లు ప్రత్యక్ష సాక్షులు వెల్లడించారు.

  దీంతో పోలీసులకు ఫిర్యాదు చేయగా.. వారు కేసు నమోదు చేసి విచారణ ప్రారంభించారు. ఇక పెళ్లి అయిన నాలుగు రోజులకే భావిక్‌ కిడ్నాప్‌ అయి చనిపోవడంతో పోలీసులకు పాయల్‌పై అనుమానం వచ్చింది. ఆమెను ప్రశ్నించగా.. తనకేమీ తెలియదని బుకాయించింది. ఈ క్రమంలోనే ఆమె మొబైల్‌ కాల్‌ డేటా పరిశీలించగా.. అసలు విషయం వెలుగులోకి వచ్చింది. పాయల్‌కు తన బావ కల్పేష్‌పై ప్రేమ ఉందని.. తనకు ఇష్టంలేకుండానే తన తల్లిదండ్రులు భావిక్‌తో పెళ్లి చేశారని చెప్పింది. అందుకే ప్రియుడితో చెప్పి కిడ్నాప్‌ చేయించి చంపించినట్లు వెల్లడించింది.

ఇక పాయల్‌ ఇచ్చిన సమాచారంతో కల్పేష్‌ ఆచూకీని కనిపెట్టిన పోలీసులు అతడ్ని అరెస్ట్‌ చేశారు. మరో ఇద్దరితో కలిసి భావిక్‌ను కిడ్నాప్‌ చేసి.. వాహనంలో గొంతునులిమి హత్య చేసినట్లు కల్పేష్ నేరాన్ని అంగీకరించాడు. ఆ తర్వాత సమీపంలోని కాలువలో మృతదేహాన్ని పడేసినట్లు వివరించాడు. దీంతో భావిక్‌ మృతదేహాన్ని పోలీసులు వెలికి తీశారు. పాయల్, కల్పేష్‌లతోపాటు మరో ఇద్దరు నిందితులను పోలీసులు అరెస్ట్‌ చేసి పలు సెక్షన్ల కింద కేసు నమోదు చేసి దర్యాప్తు చేస్తున్నారు.