గబ్బా టెస్టులో సమష్టిగా విఫలమవుతున్న భారత్,,,బౌలింగ్‌లో బుమ్రా ఒక్కడిపై ఆధారపడితే ఎలా?

రెండు మ్యాచులు ముగిసే సరికి బోర్డర్ గవాస్కర్ ట్రోఫీ 1-1తో సమమైంది. ఈ పరిస్థితుల్లో గబ్బా టెస్టు ప్రారంభమైంది. సిరీస్ గమనాన్ని మార్చే మ్యాచ్ ఇది. ఇలాంటి టెస్టులో ఎలా ఆడాలి? ప్రత్యర్థికి ఎలా కళ్లెం వేయాలి? కానీ టీమిండియా మాత్రం.. తడబడుతోంది. ముఖ్యంగా గత రెండు టెస్టుల్లో బ్యాటింగ్ విఫలమైన.. బౌలర్లు కాస్త రాణించడంతో ఒక మ్యాచ్‌లో గెలిచింది. ఇక మూడో మ్యాచ్‌లో అయితే.. బ్యాటింగ్, బౌలింగ్‌లో పూర్తిగా పట్టువిడిచింది. దీంతో మ్యాచ్‌లో వెనకబడి పోయింది.

 బోర్డర్ గవాస్కర్ ట్రోఫీలో భారత బౌలర్లలో బుమ్రా మినహా మరెవ్వరూ స్థాయికి తగ్గ ప్రదర్శన చేయడం లేదు. ఓ ఎండ్ నుంచి ఆస్ట్రేలియా బ్యాటర్లపై ఒత్తిడి పెంచుతూ.. వికెట్లు పడగొడుతున్నా.. మిగతా బౌలర్లు మాత్రం పట్టువిడుస్తున్నారు. దీంతో ఆస్ట్రేలియా బ్యాటర్లు సైతం బుమ్రాను కాచుకుని.. మిగతా భారత బౌలర్లను ఆడుకుంటున్నారు. క్రికెట్ అంటేనే..టీమ్ గేమ్. అందరూ సమష్టిగా రాణిస్తేనే.. విజయాలు దక్కుతాయి. కానీ బుమ్రా ఒక్కడిపైనే భారం వేయడం ఎంత వరకూ కరెక్టు? ఇలా ఒక్కరిమీదనే ఆధారపడితే విజయాలు సాధిస్తామా? బుమ్రా ఒక్కడే రెండు వైపుల నుంచి బౌలింగ్ చేయలేడు కదా?

గబ్బాలో టాస్ ఓడి బ్యాటింగ్‌ దిగిన ఆస్ట్రేలియాను బుమ్రా వణికించాడు. స్వింగ్, స్వీమ్‌తో బ్యాటర్లను బెంబేలెత్తించాడు. వర్షం కారణంగా తేమగా ఉన్న పిచ్‌ను ఉపయోగించుకుంటూ.. వరుస ఓవర్లలో ఉస్మాన్ ఖవాజా, మెక్ స్వీనిని ఔట్ చేశాడు. ఈ సిరీస్‌తో టెస్టు క్రికెట్‌‌లోకి అరంగేట్రం చేసిన మెక్ స్వీని.. ఐదు ఇన్నింగ్స్‌లలో నాలుగు సార్లు బుమ్రా బౌలింగ్‌లోనే ఔట్ కావడం గమనార్హం. ఈ దశలో బుమ్రాకు మరో బౌలర్ నుంచి సహకారం లభించలేదు. సిరాజ్, ఆకాశ్ దీప్‌ బౌలింగ్‌లో ఆస్ట్రేలియా బ్యాటర్లు ఈజీగా పరుగులు రాబట్టారు. దీంతో పట్టుబిగించాల్సిన స్థితిలో భారత బౌలర్లు తడబడ్డారు. స్మిత్, హెడ్ సెంచరీలతో తిరుగులేని స్థితిలో నిలిచింది.

ఆ తర్వాత కొత్త బంతితో బుమ్రా మరోసారి సత్తాచాటాడు. 12 బంతుల వ్యవధిలోనే స్మిత్, మార్ష్‌లను ఔట్ చేశాడు. ఈ క్రమంలోనే ఈ ఇన్నింగ్స్‌లో ఐదు వికెట్లను తన ఖాతాలో వేసుకున్నాడు. మొత్తంగా ఈ మ్యాచ్‌లో 28 ఓవర్లు బౌలింగ్ వేసిన బుమ్రా 6 వికెట్లు తీశాడు. 76 పరుగులు ఇచ్చాడు. ఇక ఇదే సమయంలో సిరాజ్, ఆకాశ్ దీప్, నితీశ్ రెడ్డి, జడేజాలు కలిసి 89 బౌలింగ్ చేసినా.. నాలుగు వికెట్లు మాత్రమే తీశారు. 352 పరుగులు సమర్పించుకున్నారు. ఈ గణాంకాలు చూస్తేనే అర్థం అవుతుంది కదా.. టీమిండియా బుమ్రాపై ఎంత ఆధారపడుతుందో అని. ఈ సిరీస్ అనే కాదు.. ఏ మ్యాచ్‌లో గెలవాలన్నా ఇలా ఒక్కరిపై ఆధారపడటం ఏమాత్రం సమంజసం కాదు. మిగతా బౌలర్లు కూడా బాధ్యత తీసుకోవాలి. జట్టుగా రాణించినప్పుడే ఆశించిన ఫలితాలు వస్తాయనే.. విశ్లేషణలు వినిపిస్తున్నాయి.