ఎమ్మెల్యే కొలికపూడి శ్రీనివాసా? మజాకా? బెల్టు షాపుల బెండు తీశాడు!
Andhra Pradesh Telugu | Suryaa Desk | Published : Tue, Dec 17, 2024, 05:57 PM
అధికార టీడీపీకి చెందిన ఎమ్మెల్యే స్వయంగా దగ్గరుండి మద్యం షాపుల్ని మూసివేయించారు. అంతేకాదు, బెల్ట్ షాపులు మూసివేతకు 48 గంటలు డెడ్లైన్ కూడా విధించడం చర్చనీయాంశంగా మారింది. రాష్ట్ర రాజకీయాల్లో ఎప్పుడూ హాట్టాపిక్గా ఉండే ఎన్టీఆర్ జిల్లా తిరువూరు టీడీపీ ఎమ్మెల్యే కొలికపూడి శ్రీనివాసరావు మరోసారి వార్తల్లో నిలిచారు. కొంతకాలంగా సైలెంట్గా ఉన్న కొలికపూడి.. ఇప్పుడు ఉన్నఫళంగా రంగంలోకి దిగారు. సొంత నియోజకవర్గంలో మద్యం షాపుల సంగతి తేల్చే పనిలో ఉన్నారు. తిరువూరు పట్టణంలో బెల్టు షాపులు నిర్వహిస్తున్నట్లు తెలుసుకున్న కొలికపూడి.. రెడ్హ్యాండెడ్గా పట్టుకున్నారు. కూల్డ్రింక్ షాపులు, కిరాణా దుకాణాలు సహా ఇతర షాపుల్లో తనిఖీలు చేసి బెల్టు షాపుల బెండు తీశారు. స్కూళ్లు, ఆలయాలు, నివాస గృహాల మధ్య మద్యం దుకాణాలు ఉండటంతో ప్రజలు తీవ్ర ఇబ్బందులుకు గురవుతున్నారని ఆగ్రహం వ్యక్తం చేశారు. ఒకవేళ వైన్ షాపులను వారు తెరిస్తే తన దృష్టికి తీసుకురావాలని స్థానికులకు సూచించారు. అలాగే ఉదయం 10 గంటలకే మద్యం తాగడానికి వచ్చిన మందుబాబులను ఎమ్మెల్యే మందలించారు.
|
|