ఏపీలో ఇన్నోవేషన్ యూనివర్సిటీ.. ఫిజిక్స్ వాలా కంపెనీతో ప్రభుత్వం ఒప్పందం

ఆంధ్రప్రదేశ్‌లో మరో ప్రతిష్టాత్మక ఇన్నోవేషన్‌ యూనివర్సిటీ ఏర్పాటు కానుంది. ప్రముఖ ఎడ్యుటెక్ కంపెనీ ఫిజిక్స్‌ వాలాతో ఆంధ్రప్రదేశ్ ప్రభుత్వం అవగాహన ఒప్పందం కుదుర్చుకుంది. ఇన్నోవేషన్ యూనివర్సిటీ ఏర్పాటు కోసం ఫిజిక్స్ వాలా కంపెనీ, ఏపీ ప్రభుత్వం ఈ మేరకు ఒప్పందం చేసుకున్నాయి. సచివాలయంలో ఆంధ్రప్రదేశ్ విద్యాశాఖ మంత్రి నారా లోకేశ్‌ సమక్షంలో సంస్థ ప్రతినిధులు, ఏపీ అధికారులు అవగాహన ఒప్పందంపై సంతకాలు చేశారు. ఏపీ యువతకు ప్రపంచస్థాయి అవకాశాలే లక్ష్యంగా ఈ ఒప్పందం చేసుకున్నట్లు ఏపీ ప్రభుత్వం తెలిపింది.

మరోవైపు ఫిజిక్స్ వాలా ఎడ్యుటెక్ కంపెనీ విషయానికి వస్తే.. విద్యార్థులకు ఆన్‌లైన్, ఆఫ్ లైన్‌లలో పాఠాలు బోధిస్తూ ఉంటుంది. ఆరో తరగతి నుంచి 12వ తరగతి విద్యార్థుల వరకూ ఆన్ లైన్, ఆఫ్ లైన్ కోర్సులను అందిస్తూ ఉంది. అలాగే జేఈఈ, నీట్ వంటి పోటీ పరీక్షలు, ఎస్ఎస్‌సీ, యూపీఎస్సీ వంటి ప్రభుత్వ పోటీ పరీక్షలకు కావాల్సిన ప్రిపరేషన్ ఇస్తూ ఉంది. నమూనా పత్రాలు, మోడల్ పేపర్లు కూడా అందుబాటులో ఉంచుతోంది. మొబైల్ యాప్, వెబ్ సైట్ ద్వారా ఆన్ లైన్ కోచింగ్‌తో పాటుగా కొన్ని కేంద్రాల ద్వారా ప్రత్యక్షంగా కూడా కోచింగ్ అందిస్తోంది.

2016లో అలాక్ పాండే అనే వ్యక్తి ఫిజిక్స్ వాలా యూట్యూబ్ ఛానెల్ ప్రారంభించారు. జేఈఈ పరీక్షలకు సన్నద్ధమయ్యే విధ్యార్థులకు ఫిజిక్స్ పాఠాలు బోధించేందుకు యూపీలోని ప్రయాగ్‌రాజ్‌కు చెందిన అలాక్ పాండే ఫిజిక్స్ వాలా యూట్యూబ్ ఛానెల్ ఏర్పాటు చేశారు. అయితే పాండే టీచింగ్ సరళి, బోధించే విషయాల ద్వారా అనతికాలంలోనే ఈ యూట్యూ్బ్ ఛానెల్‌కు విశేష ఆదరణ లభించింది. దీంతో 2019 నాటికి ఈ యూట్యూబ్ ఛానెల్ ఫాలోవర్ల సంఖ్యం 2 మిలియన్లకు చేరుకుంది. 2020లో అలాఖ్ పాండే.. ప్రతీక్ మహేశ్వరితో కలిసి ఫిజిక్స్ వాలా యాప్ తీసుకువచ్చారు. ఈ మొబైల్ అప్లికేషన్‌కు కూడా సక్సెస్ అయ్యింది.

2023 జనవరి నాటికి ఆండ్రాయిడ్ ప్లే స్టోర్ ద్వారా ఫిజిక్స్ వాలా యాప్‌ను 20 మిలియన్లు సార్లు డౌన్ లోడ్ చేసుకున్నారు. అలాగే ఫిజిక్స్ వాలా యూట్యూబ్ ఛానెల్ సబ్‌స్ర్కైబర్ల సంఖ్య కూడా 9.73 మిలియన్లకు చేరుకుంది. 2022లో వంద మిలియన్ డాలర్ల నిధులను సమీకరించిన ఫిజిక్స్ వాలా.. 1.1 బిలియన్ మార్కెట్ విలువతో యూనికార్న్ కంపెనీగా మారింది. ప్రస్తుతం ఫిజిక్స్ వాలా ఎడ్యుటెక్ కంపెనీకి 34 నగరాల్లో 67కు పైగా ఆఫ్ లైన్ సెంటర్లు ఉన్నాయి. ఈ ఏడాది సెప్టెంబర్‌లో 210 మిలియన్ డాలర్ల నిధులను సమీకరించిన ఫిజిక్స్ వాలా ఎడ్యుటెక్ కంపెనీ.. ప్రస్తుత మార్కెట్ విలు 2.8 బిలియన్ డాలర్లుగా ఉంది. అలా యూట్యూబ్ ఛానెల్‌గా మారి ఎడ్యుటెక్ కంపెనీ స్థాయికి చేరిన ఫిజిక్స్ వాలా.. ఇప్పుడు ఏపీలో ఇన్నోవేషన్ యూనివర్సిటీ ఏర్పాటు కోసం ప్రభుత్వంతో ఒప్పందం కుదుర్చుకుంది.