నిన్న పార్లమెంట్ ఎదుట యువకుడి ఆత్మాహుతి.. చికిత్సపొందతూ నేడు మృతి

ఢిల్లీలోని కొత్త పారమెంట్ భవనం ఎదుట గురువారం రోజు యూపీకి చెందిన ఓ యువకుడు ఆత్మహత్యాయత్నం చేసుకున్నాడు. వెంట తెచ్చుకున్న పెట్రోల్‌ను ఒంటిపై పోసుకుని నిప్పంటించుకున్నాడు. విషయం గుర్తించిన పోలీసులు వెంటనే అతడిని ఆస్పత్రికి తరలించారు. కానీ అప్పటికే 90 శాతం శరీరం కాలిపోవడంతో.. చికిత్సపొందుతూ ఈరోజు ప్రాణాలు కోల్పోయాడు. అయితే కేసు నమోదు చేసుకున్న పోలీసులు దర్యాప్తు చేయగా.. ఆయన పార్లమెంట్ వద్దకు ఎందుకు వచ్చాడో తెలిసింది. ఆ విశేషాలు మీకోసం.

ఉత్తర ప్రదేశ్‌లోని బాగపట్‌కు చెందిన 26 ఏళ్ల జితేంద్ర వెంట ఓ బ్యాగు పట్టుకుని.. ద్విచక్ర వాహనంపై ఢిల్లీలోని పార్లమెంట్ వద్దకు వచ్చాడు. అక్కడే ఉన్న పార్కులో కూర్చున్న అతడు.. అంతా చూస్తుండగానే తన బ్యాగులోంచి పెట్రోల్ తీసుకుని ఒంటిపై పోసుకున్నాడు. ఆపై నిప్పంటించుకుని ఆత్మహత్యాయత్నం చేశాడు. అయితే మంటల్లో కాలుతుండగానే జితేంద్ర.. పార్లమెంట్ గేటు వైపు పరిగెత్తడం ప్రారంభించాడు. విషయం గుర్తించిన పోలీసులు మంటలు ఆర్పే ప్రయత్నం చేశారు. అంతలోపే అంబులెన్సుకు ఫోన్ చేశారు.

అలా జితేంద్రను వెంటనే ఆస్పత్రికి తరలించారు పోలీసులు. ఆపై కేసు నమోదు చేసుకుని దర్యాప్తు ప్రారంభించారు. ఈక్రమంలోనే జితేంద్ర వెంట తెచ్చుకున్న బ్యాగులో ఏమేం ఉన్నాయో గుర్తించారు. అప్పుడే అతడికి సంబంధించిన ఓ డైరీ, రెండు పేజీల సూసైడ్ నోట్‌తో పాటు మూడు కేసులుకు సంబంధించిన పేపర్లు దొరికాయి. అయితే అతడు నిప్పంటించుకోవడం వల్ల అవి కూడా సగం కాలిపోయాయి. వాటి ద్వారానే జితేంద్ర అడ్రస్ గుర్తించిన పోలీసులు ఆయన తల్లిదండ్రులకు సమాచారం అందించారు. హుటాహుటిన వాళ్లు ఆస్పత్రికి చేరుకుని.. కన్నీరుమున్నీరుగా విలపించారు.

గురువారం ఉదయం తమ కుమారుడు ఢిల్లీ వెళ్తానని చెప్పి 500 వందలు తీసుకుని వెళ్లాడని జితేంద్ర తల్లి చెప్పింది. చాలా సార్లు అతడు పని మీద ఢిల్లీకి వెళ్లి వస్తూ ఉండడం వల్ల తామేమీ అడగలేదని వివరించింది. వారి ద్వారానే అతడు ఆత్మహత్య ఎందుకు చేసుకున్నాడో తెలుసుకున్నారు పోలీసులు. ఇప్పటికే బికామ్ చేసిన జితేంద్ర ఎల్ఎల్‌బీ చేయాలనుకున్నాడు. కానీ గ్రామంలో జరిగిన పలు గొడవల్లే ఇరుక్కోవడంతో.. చదువును కొనసాగించలేకపోయాడు. ముఖ్యంగా 2021 మే, 2022 ఏప్రిల్, 2024 మే నెలలో జరిగిన గొడవల్లో పోలీసులు అతడిపై ఎఫ్ఐఆర్ నమోదు చేశారు.

కేసుల్లో నిందితుడిగా ఉన్న జితేంద్ర అప్పటి నుంచి చదువును కొనసాగించలేకపోతున్నాడు. దీంతో అతడు కూలీగా మారాల్సి వచ్చింది. దాన్ని జితేంద్ర అస్సలే జీర్ణించుకోలేకపోయాడు. కోర్టుల చుట్టూ తరిగీ తిరిగీ విసుగు చెందిన అతడు.. ఇదే విషయమై రాజకీయ నాయకులను కలిసి ఏ తప్పూ చేయని తన పేరును కేసుల్లోంచి తీసేయాలని కోరేందుకు ఢిల్లీకి వచ్చినట్లు పోలీసులు తెలిపారు. న్యాయం జరగకపోతే చనిపోవాలని ముందుగానే నిర్ణయించుకున్న అతడు ఇంటి నుంచే పెట్రోల్ తెచ్చుకున్నాడు. మధ్యాహ్నం 1 గంటలకు ఢిల్లీ చేరుకున్న అతడు.. నాయకులు ఎవరినీ కలవలేకపోవడంతో 3.30 గంటలకు ఆత్మహత్యాయత్నం చేశాడు.