జనసేనలోకి తమ్మినేని సీతారాం.!? క్లారిటీ ఇచ్చిన అసెంబ్లీ మాజీ స్పీకర్

వైసీపీ ముఖ్య నేత, అసెంబ్లీ మాజీ స్పీకర్ తమ్మినేని సీతారాం జనసేనలోకి వెళ్తారంటూ గత కొన్నిరోజులుగా వార్తలు వస్తున్నాయి. వైసీపీ అధిష్టానం తీరుపై తమ్మినేని సీతారాం అసంతృప్తిగా ఉన్నారని.. అధిష్టానం నిర్ణయాలపై గుర్రుగా ఉన్నారంటూ ప్రచారం జరిగింది. ఈ ప్రచారంపై ఆయన ఎలాంటి వ్యాఖ్యలు చేయకపోవటంతో ఈ వార్తలు మరింత జోరందుకున్నాయి. ఈ నేపథ్యంలో తమ్మినేని సీతారాం స్పందించారు. జనసేన పార్టీలోకి తమ్మినేని సీతారాం వెళ్తున్నారంటూ వస్తున్న వార్తలను ఆయన తోసిపుచ్చారు.

సోషల్ మీడియాలో జరుగుతున్న ప్రచారంపై తీవ్రంగా స్పందించిన తమ్మినేని సీతారాం.. జనసేనలోకి వెళ్లాల్సిన అవసరం తనకేమిటని ప్రశ్నించారు. ప్రతి విషయాన్ని భూతద్దంలో పెట్టి చూస్తున్నారని మండిపడ్డారు. తన కుమారుణ్ని ఇటీవల ఆస్పత్రిలో చేర్పించానని.. గత 15 రోజులుగా ఆసుపత్రి దగ్గరే ఉన్నానని తమ్మినేని సీతారాం వెల్లడించారు. అందుకే పార్టీ కార్యక్రమాలకు హాజరు కాలేకపోయానని చెప్పారు. తనకు జనసేనలో చేరాల్సిన అవసరం ఏముందంటూ ప్రశ్నించారు.

2024 అసెంబ్లీ ఎన్నికల ఫలితాల తర్వాత వైసీపీ అధినేత వైఎస్ జగన్ పలు కీలక నిర్ణయాలు తీసుకున్నారు. అందులో భాగంగా తమ్మినేని సీతారాంను శ్రీకాకుళం పార్లమెంట్ నియోజకవర్గం వైసీపీ పరిశీలకులుగా నియమించారు. ఇదే సమయంలో తమ్మినేని సొంత నియోజకవర్గం ఆముదాలవలసకి కొత్త ఇన్‌చార్జిని నియమించారు. ఆముదాలవలస వైసీపీ ఇంఛార్జిగా చింతాడ రవికుమార్‌ను వైఎస్ జగన్ నియమించారు. ఈ నేపథ్యంలో వైఎస్ జగన్ నిర్ణయంతో తమ్మినేని సీతారాం అసంతృప్తికి గురయ్యారని.. జనసేనలో చేరాలనే ఆలోచన చేస్తున్నట్లు సోషల్ మీడియాలో ప్రచారం జరిగింది. ఈ క్రమంలోనే తమ్మినేని సీతారాం ఈ విషయంపై క్లారిటీ ఇచ్చారు.

మరోవైపు తమ్మినేని సీతారాం నివాసానికి వైసీపీ సీనియర్ నేత, శాసనమండలి ప్రతిపక్ష నేత బొత్స సత్యనారాయణ వెళ్లటం ప్రాధాన్యం సంతరించుకుంది. వైసీపీ కార్యక్రమాలకు తమ్మినేని సీతారాం దూరంగా ఉండటంతో పాటుగా ఆయన పార్టీ మారుతారంటూ ప్రచారం జరుగుతున్న నేపథ్యంలోనే బొత్స అక్కడకు వెళ్లినట్లు తెలిసింది. అయితే బొత్స సత్యనారాయణ కలిసిన రోజే.. తమ్మినేని సీతారాం పార్టీ మార్పు అంశంపై స్పందించడం గమనార్హం. తన కుమారుడు ఆస్పత్రిలో ఉన్నాడని.. అందువల్లనే తాను పార్టీ కార్యక్రమాలకు హాజరు కాలేకపోయినట్లు తమ్మినేని సీతారాం చెప్తున్నారు. మరి చూడాలి ఈ వ్యవహారం ఎలాంటి మలుపులు తిరుగుతుందనేదీ..