కొండ కింద ఇదో దందా..! శ్రీవారిమెట్టు వద్ద భక్తుల ఆందోళన

తిరుమల శ్రీవారి దర్శనానికి భక్తులు పోటెత్తుతున్నారు. వరుసగా సెలవులు రావటంతో కొండపై రద్దీ పెరుగుతోంది. అలిపిరి నడకమార్గం నుంచే కాకుండా.. శ్రీవారిమెట్టు మార్గం నుంచి కూడా భక్తులు భారీగా శ్రీవారి దర్శనానికి తరలివస్తున్నారు. దీంతో శ్రీ కల్యాణ వేంకటేశ్వర స్వామి ఆలయం, శ్రీవారిమెట్టు మార్గాలు భక్తుల గోవింద నామస్మరణతో మార్మోగుతున్నాయి. శనివారం ఉదయం భక్తులు భారీగా తరలిరావటంతో శ్రీవారిమెట్టు వద్ద ఉద్రిక్తతలు తలెత్తాయి. తిరుమల శ్రీవారి దివ్య దర్శనం టైమ్‌స్లాట్‌ టోకెన్ల కోసం శ్రీవారిమెట్టు మార్గంలో భక్తులు ఎగబడ్డారు. దీంతో తొక్కిసలాట జరిగింది. టీటీడీ భద్రతా సిబ్బంది మహిళలు, పురుషులకు వేర్వేరుగా టోకెన్లు ఇవ్వటంతో తొక్కిసలాట చోటుచేసుకుంది. అయితే విజిలెన్స్ సిబ్బంది జోక్యం చేసుకుని భక్తులను క్రమబద్ధీకరించటంతో సాధారణ పరిస్థితి నెలకొంది.

శ్రీవారిమెట్టు మార్గం గుండా తిరుమల దర్శనానికి వెళ్లే భక్తులకు 1200వ మెట్టు వద్ద టైమ్ స్లాట్ టోకెన్లు జారీ చేస్తారు. ఉదయం ఆరు నుంచి ఈ ప్రక్రియ మొదలవుతుంది. ఈ క్రమంలోనే శనివారం ఉదయం 6 గంటల నుంచి టైమ్‌ స్లాట్ టోకెన్ల జారీ మొదలెట్టారు. అయితే భక్తుల రద్దీ కారణంగా 10 గంటల 30 నిమిషాలకు టైమ్‌ స్లాట్ టోకెన్ల కోటా పూర్తి అయ్యింది. మిగిలిన భక్తులు సర్వదర్శనం చేసుకోవాల్సిన పరిస్థితి వచ్చింది. అయితే టైమ్ స్లాట్ టోకెన్ల జారీలో అక్రమాలు జరుగుతున్నాయంటూ భక్తులు మండిపడుతున్నారు. శనివారం శ్రీవారిమెట్టు వద్ద భక్తులు ఆందోళనకు దిగారు.దిగారు. 500 మీటర్లు కూడా లేని క్యూలైన్‌లో 3 వేల మంది భక్తులు వచ్చారని.. టోకెన్లు అయిపోయాయని చెప్తున్నారని ఆరోపించారు.

శ్రీవారిమెట్టు మార్గంలో రోజుకు 3000 టైమ్ స్లాట్ టోకెన్లు కేటాయిస్తారని.. అయితే ఆటో డ్రైవర్లతో కలిసి, టీటీడీ సిబ్బంది కుమ్మక్కయ్యారని భక్తులు ఆరోపిస్తున్నారు. దూర ప్రాంతాల నుంచి వస్తున్న భక్తులకు టోకెన్లు అందడం లేదని ఆరోపిస్తున్నారు. సొంత వాహనాల్లో వచ్చేవారికి కూడా టోకెన్లు అందడం లేదని.. ఆటోల్లో వచ్చేవారికి మాత్రమే టైమ్ స్లాట్ టోకెన్లు ఇస్తున్నారని ఆరోపించారు. ఆటో డ్రైవర్లతో కలిసి టీటీడీ సిబ్బంది ఈ దందా నడిపిస్తున్నారంటూ శనివారం శ్రీవారిమెట్టు మార్గంలో ఆందోళనకు దిగారు. టీటీడీ ఈవో ఈ అంశంపై చర్యలు తీసుకోవాలని డిమాండ్ చేశారు. మరోవైపు భక్తుల రద్దీ కారణంగా టైమ్ స్లాట్ టోకెన్ల కోటా పూర్తైందని.. భక్తులు సహకరించాలని టీటీడీ సిబ్బంది కోరుతున్నారు.