రష్యాలో సిరియా మాజీ అధ్యక్షుడు బషర్‌పై విషప్రయోగం

పశ్చిమాసియా దేశం సిరియాలో 13 ఏళ్ల నుంచి కొనసాగుతోన్న అంతర్యుద్ధం.. గత డిసెంబరులో ముగిసింది. రాజధాని డమాస్కస్‌పై తిరుగుబాటు దళాలు పట్టుసాధించడంతో అక్కడ ఐదు దశాబ్దాలకుపైగా సాగిన బషర్ అల్ అసద్ కుటుంబ పాలనకు తెరపడింది. మాజీ అధ్యక్షుడు బషర్ తన కుటుంబంతో కలిసి రష్యాకు పారిపోయి.. అక్కడ ఆశ్రయం పొందుతున్న విషయం తెలిసిందే. అయితే, తాజాగా ఆయనపై విషప్రయోగం జరిగినట్టు అంతర్జాతీయ మీడియా కథనాలు వెల్లడించాయి. అస్వస్థతకు గురైన బషర్‌ తీవ్ర దగ్గుతో పాటు ఊపిరి తీసుకోవడంలో ఇబ్బందులు ఎదుర్కొన్నట్టు తెలిపాయి. డిసెంబర్‌ 29న ఆయన అనారోగ్యం బారినపడినట్లు పేర్కొన్నాయి.

అసద్ పరిస్థితి క్షీణించడంతో వెంటనే చికిత్స అందించారని, వైద్య పరీక్షల్లో విషప్రయోగం జరిగినట్టు నిర్దారణ అయ్యిందని మీడియాలో ప్రచారం సాగుతోంది. ప్రస్తుతం ఆయన ఆరోగ్యం నిలకడగానే ఉన్నట్టు తెలుస్తోంది. దీనిపై దర్యాప్తు కూడా కొనసాగుతోందని రష్యా ఇంటెలిజెన్స్ విభాగం మాజీ అధికారి ఒకరు సోషల్‌ మీడియా పేర్కొన్నారు. డిసెంబరు 29 అసద్ అస్వస్థతకు గురయ్యారని, ఆయనపై హత్యాయత్నం జరిగిందని రష్యా మాజీ గూఢచారి ఎస్వీఆర్ అనే పేరున ఉన్న అకౌంట్‌లో పోస్ట్ చేశారు. విషప్రయోగం తర్వాత తలనొప్పి, కడునొప్పితో బాధపడ్డారని, పరిస్థితి క్షీణించడంతో వైద్యులు చికిత్స అందించారని తెలిపారు. ఆయన ఉంటోన్న నివాసంలోనే ఓ గదిలో ఉంచి వైద్య నిపుణులు చికిత్స చేసినట్టు పేర్కొన్నారు.

‘సోమవారం సాయంత్రానికి ఆయన ఆరోగ్యం మెరుగుపడి.. నిలకడగా ఉన్నట్టు వైద్యులు చెప్పారు.. రష్యా అధ్యక్షుడు పుతిన్ సహాయకుడు నికోలాయ్ పాత్రుషెవ్‌కు అందజేసిన నివేదిక ప్రకారం.. దర్యాప్తు జరుగుతోంది.. అయితే బషర్ అల్-అసద్‌పై విషప్రయోగం ఎలా జరిగింది అనేది తెలియాల్సి ఉంది’ అని ట్వీట్‌ చేశాడు. కాగా, దీనిపై రష్యా అధికారుల నుంచి అధికారికంగా ఎటువంటి ప్రకటన వెలువడలేదు. తిరుగుబాటుదళాలు సిరియాను స్వాధీనం చేసుకోవడంతో కుటుంబ సభ్యులతో కలిసి దేశాన్ని వీడిన అసద్ ప్రయాణిస్తున్న విమానాన్ని రెబల్స్‌ కూల్చివేసినట్లు సోషల్‌ మీడియాలో ప్రచారం జరిగింది. చివరకు అసద్‌కు రాజకీయ ఆశ్రయం కల్పించినట్లు రష్యా అధికారికంగా ప్రకటన చేసింది.