బంగ్లాదేశ్‌ సైన్యానికి ట్రైనింగ్ ఇవ్వనున్న పాకిస్తాన్.. భారత్‌కు ముప్పు తప్పదా

ఒకప్పుడు పాకిస్తాన్ నుంచి విముక్తి పొందడానికి బంగ్లాదేశ్‌‌కు భారత్ ఎంత సహాయం చేసిందో అందరికీ తెలిసిందే. బంగ్లాదేశ్ విమోచన యుద్ధంలో పాకిస్తాన్ సైన్యానికి వ్యతిరేకంగా.. బంగ్లాదేశ్ సైన్యానికి మద్దతుగా భారత్ యుద్ధంలో పాల్గొని.. బంగ్లాదేశ్ ఏర్పాటులో ఎంతో సహాయం చేసింది. ఇక అప్పటి నుంచి పాకిస్తాన్‌ను శత్రుదేశంగా చూసిన బంగ్లాదేశ్.. భారత్‌ను మాత్రం మిత్ర దేశంగా భావించి సత్సంబంధాలు నెరిపింది. అయితే.. కొన్ని నెలల క్రితం బంగ్లాదేశ్‌లో జరిగిన తిరుగుబాటు.. పరిస్థితులను పూర్తిగా మార్చేసింది. షేక్ హసీనా ప్రధాని పదవిని వదిలేసి.. బంగ్లాదేశ్ నుంచి పారిపోయి భారత్‌లోకి వచ్చి తలదాచుకోవడం.. అదే సమయంలో నోబెల్ శాంతి బహుమతి గ్రహీత మహమ్మద్ యూనస్ నేతృత్వంలో బంగ్లాదేశ్‌లో తాత్కాలిక ప్రభుత్వం ఏర్పడిన తర్వాత మిత్రులు శత్రువులుగా.. శత్రువులు మిత్రులుగా మారిపోయారు. మహమ్మద్ యూనస్ సర్కార్.. భారత్‌పై అక్కసు వెళ్లగక్కుతూ.. క్రమంగా పాక్‌కు మద్దతు పలుకుతోంది.

బంగ్లాదేశ్‌లో హిందువులపై, భారత్‌పై రోజురోజుకూ వ్యతిరేకత ఎక్కువవుతోంది. ఓవైపు.. బంగ్లాదేశ్‌లో హిందువులపై దాడులు జరుగుతుండగా.. అక్కడి ప్రభుత్వం భారత వ్యతిరేక విధానాలు అమలు చేస్తూ ఉంది. అదే సమయంలో పాకిస్తాన్‌కు దగ్గరవుతుండటం ఇప్పుడు తీవ్ర చర్చనీయాంశంగా మారుతోంది. ఇక గతేడాది హిందువులపై పాకిస్తాన్‌లో జరిగిన దాడులు, ఆగడాల కంటే బంగ్లాదేశ్‌లోనే ఎక్కువ జరిగాయని లెక్కలు విడుదల కావడం పరిస్థితికి అద్దం పడుతోంది. ఇప్పటికే పాకిస్తాన్‌ తరచూ భారత్‌పై దాడులు చేస్తుండగా.. ఇప్పుడు ఆ దేశానికి బంగ్లాదేశ్ కూడా తోడు కావడం మరింత ఆందోళనకు గురి చేస్తోంది.

ఈ క్రమంలోనే ఇటీవల బంగ్లాదేశ్-పాకిస్తాన్ మధ్య ఒక కీలక ఒప్పందం కుదిరింది. బంగ్లాదేశ్‌ సైన్యానికి పాకిస్తాన్ సైన్యం శిక్షణ ఇచ్చేందుకు రెండు దేశాలు ఒప్పందం చేసుకున్నాయి. దీంతో దాదాపుగా 50 ఏళ్ల తర్వాత పాకిస్తాన్ సైన్యం బంగ్లాదేశ్‌లోకి అడుగుపెట్టనుంది. గతంలో రెండు దేశాల మధ్య ఉన్న శత్రుత్వాన్ని పూర్తిగా మర్చిపోయిన ఇరు దేశాలు ఇప్పుడు బంగ్లాదేశ్, పాకిస్తాన్‌లు స్నేహాన్ని పెంచుకుంటున్నాయి. ప్రస్తుతం ఈ పరిణామమే భారత్‌కు తీవ్ర ఆందోళనకరంగా మారింది. ఈ నేపథ్యంలోనే ఫిబ్రవరి 2025 నాటికి.. పాకిస్తాన్ సైన్యం బంగ్లాదేశ్‌ సైన్యానికి శిక్షణ ఇచ్చేందుకు ఈ ఒప్పందం కుదుర్చుకుంది. 1971 బంగ్లాదేశ్ విమోచన యుద్ధం తర్వాత బంగ్లాదేశ్ సైనికులకు శిక్షణ ఇచ్చేందుకు పాకిస్తాన్ సైన్యంతో ఒప్పందం కుదుర్చుకోవడం ఇదే తొలిసారి కావడం గమనార్హం.

ఇక పాకిస్తాన్‌తో సంబంధాలను మెరుగుపరుచుకునేందుకు మహమ్మద్ యూనస్ నేతృ‌త్వంలోని తాత్కాలిక ప్రభుత్వం తీవ్ర ప్రయత్నాలు చేస్తున్న వేళ.. ఆ రెండు దేశాల మధ్య సైనిక సహకారం కోసం ఒప్పందం కుదిరినట్లు నివేదికలు వెల్లడి కావడం గమనార్హం. బంగ్లాదేశ్‌లోని మైమెన్‌సింగ్ కంటోన్మెంట్‌లో బంగ్లాదేశ్ సైన్యానికి చెందిన నాలుగు కంటోన్మెంట్లలో పాక్ ఆర్మీ శిక్షణ ఇవ్వబోతోందని సమాచారం.

అయితే బంగ్లాదేశ్‌లోకి రోజురోజుకూ పాకిస్తాన్ చొచ్చుకువస్తోంది. గతంలో బంగ్లాదేశ్‌లోకి వచ్చే పాకిస్తాన్ నౌకలపై ఉన్న ఆంక్షలను మహమ్మద్ యూనస్ ప్రభుత్వం ఎత్తివేసింది. దీంతో పాక్ నౌకలు ఎలాంటి ఇబ్బంది లేకుండా బంగ్లాదేశ్‌లోకి వస్తున్నాయి. ఇటీవల కరాచీ నుంచి చిట్టగాంగ్ పోర్టుకు పాక్ కార్గో నౌకలు చేరుకున్నాయి. ఇక పాకిస్తాన్ నుంచి ఆయుధాలు కొనుగోలు చేయడాన్ని బంగ్లాదేశ్ వేగవంతం చేసింది. ఈ పరిణామాలన్నీ చూస్తుంటే బంగ్లాదేశ్ టార్గెట్ భారత్ అని అర్థం అవుతోంది.

వీటికితోడు బంగ్లాదేశ్‌లో పాకిస్తాన్ ప్రమేయం పెరిగితే భారత్‌లోని ఈశాన్య రాష్ట్రాల్లో ఉగ్రవాద, వేర్పాటువాద శక్తులు మరింత బలోపేతం అయ్యే ప్రమాదం ఉంది. వారికి ఆర్థిక, ఆయుధ సాయం దక్కవచ్చనే ఊహాగానాలు వెల్లువెత్తుతున్నాయి. ఇక భారత్‌పై వ్యతిరేకతను బంగ్లాదేశ్ వ్యాప్తంగా.. పాకిస్తాన్ రెచ్చగొడుతుండటం కూడా భారత్‌కు ముప్పుగా మారుతోంది. ఇప్పటికే జమ్మూ కాశ్మీర్, పంజాబ్ రాష్ట్రాల్లో తిరుగుబాటుదారులను పాక్, దాని గూఢచార సంస్థ ఐఎస్ఐ ప్రేరేపిస్తుండటం తీవ్ర అలజడికి కారణం అవుతోంది. ఈ పరిణామాలన్నింటినీ చూస్తే బంగ్లాదేశ్‌ను వాడుకు భారత్‌పై పాకిస్తాన్ కుట్రలకు తెరతీస్తోందని తెలుస్తోంది.