మహిళల కోసం కేంద్రం స్కీమ్.. మార్చి 31 లాస్ట్ డేట్.. బ్యాంక్ డిపాజిట్లకు మించి వడ్డీ

కేంద్ర ప్రభుత్వం ఆఫర్ చేసే చిన్న మొత్తాల పొదుపు పథకాలకు ఫుల్ డిమాండ్ ఉంటుందన్న సంగతి తెలిసిందే. ఇక్కడ ఆడపిల్లల కోసం ప్రత్యేకంగా సుకన్య సమృద్ధి యోజన ఉంది. ఇది పదేళ్ల లోపు వయసు వారికి మాత్రమే అర్హత ఉంటుంది. ఇక ఉద్యోగుల కోసం పీపీఎఫ్, సీనియర్ సిటిజెన్స్ కోసం సీనియర్ సిటిజెన్ సేవింగ్స్ స్కీమ్, పెన్షన్ బెనిఫిట్స్ కోసం నేషనల్ పెన్షన్ సిస్టమ్ ఇలా ఎన్నో పథకాలు ఉన్నాయి. మహిళల కోసం కూడా ప్రత్యేకంగా పథకం ఉండాలని.. వారికి ఆర్థిక సాధికారత అందించేందుకు ఉద్దేశించిన పథకమే మహిళా సమ్మాన్ సేవింగ్స్ సర్టిఫికెట్. 2023 బడ్జెట్ సమయంలో కేంద్ర ఆర్థిక మంత్రి నిర్మలా సీతారామన్ ఈ స్కీమ్ ప్రకటించారు. ఇది కేవలం మహిళా ఇన్వెస్టర్ల కోసం ఉద్దేశించిందే అని చెప్పొచ్చు.

బడ్జెట్ ప్రకటన ప్రకారం.. ఈ స్కీమ్ వన్ టైమ్ ఇన్వెస్ట్‌మెంట్ పథకం. అంటే ఒకేసారి పెట్టుబడి పెట్టాల్సి ఉంటుంది. మహిళలకు పొదుపు అలవాటు చేసి.. పెట్టుబడులు పెట్టడం ద్వారా నిధులు సమకూర్చుకోవడం దీని ప్రధాన ఉద్దేశం. ప్రస్తుతం ఈ పథకం టెన్యూర్ రెండేళ్లుగా ఉంది. ఇక రెండేళ్ల వ్యవధి బ్యాంక్ డిపాజిట్ల కంటే కూడా దీంట్లో వడ్డీ రేటు ఎక్కువగా ఉందని చెప్పొచ్చు. అయితే ఈ స్కీమ్ లాంఛింగ్ సమయంలోనే 2025, మార్చి 31 లాస్ట్ డేట్ అని చెప్పారు. అంటే ఆ లోగానే ఈ పథకంలో చేరాల్సి ఉంటుంది.

ఈ క్రమంలో మరో 3 నెలల కంటే తక్కువ సమయమే ఉంది. మరి బడ్జెట్‌లో దీని గురించి ప్రకటన వస్తుందో చూడాలి. వస్తే.. గడువు మరోసారి పొడిగిస్తే మహిళా ఇన్వెస్టర్లకు శుభవార్త అని చెప్పొచ్చు. ఇందులో ఇప్పుడు వార్షిక ప్రాతిపదికన 7.50 శాతం వడ్డీ రేటు ఉంది. వడ్డీ ప్రతి 3 నెలలకు ఓసారి లెక్కిస్తారు. మెచ్యూరిటీ సమయంలో మొత్తం వడ్డీని అసలుతో కలిపి చెల్లిస్తారు. ఈ పథకంలో మహిళలు ఎవరైనా చేరొచ్చు. మైనర్ పేరిట గార్డియెన్ ఖాతా తెరవొచ్చు.

ఈ స్కీంలో కనీసం రూ. 1000 ఇన్వెస్ట్‌మెంట్‌తో చేరొచ్చు. గరిష్టంగా రూ. 2 లక్షల వరకు డిపాజిట్ చేసేందుకు ఛాన్స్ ఉంది. 3 నెలల గ్యాప్‌తో ఎన్ని అకౌంట్లు అయినా తెరిచేందుకు వీలుంటుంది. అకౌంట్ ఓపెనింగ్ ఫారం, కేవైసీ డాక్యుమెంట్స్ (ఆధార్, పాన్ కార్డులు) కావాలి. న్యూ అకౌంట్ హోల్డర్స్ కోసం కేవైసీ ఫారం కావాలి. డిపాజిట్ అమౌంట్ తీస్కొని దగ్గర్లోని ఈ స్కీమ్ గుర్తింపు పొందిన బ్యాంకు లేదా పోస్టాఫీసుకు వెళ్లి చేరొచ్చు. అకౌంట్ ఓపెన్ చేసిన ఏడాది తర్వాత 40 శాతం వరకు డబ్బుల్ని విత్‌డ్రా చేసుకోవచ్చు. పూర్తి డబ్బులు మెచ్యూరిటీ తర్వాతే వస్తాయి. దీంట్లో గరిష్ట పెట్టుబడి అయిన రూ. 2 లక్షలు ఇన్వెస్ట్ చేస్తే.. 7.50 శాతం వడ్డీ రేటు ప్రకారం మెచ్యూరిటీకి రూ. 32,044 వడ్డీ వస్తుంది. అదే రూ. లక్ష జమ చేస్తే రూ. 16022 వడ్డీ వస్తుంది.

ఇదే బ్యాంకుల విషయానికి వస్తే.. ఎస్బీఐలో రెండేళ్ల డిపాజిట్‌పై సాధారణ ప్రజలకు 6.80 శాతం, సీనియర్ సిటిజెన్లకు 7.30 శాతం వడ్డీ రేటు ఉంది. హెచ్‌డీఎఫ్‌సీ బ్యాంకులో మాత్రం సాధారణ ప్రజలకు 7 శాతం, సీనియర్ సిటిజెన్లకు 7.50 శాతంగా ఉంది. యాక్సిస్ బ్యాంకులో రెగ్యులర్ సిటిజెన్స్‌కు 7.10 శాతం, సీనియర్ సిటిజెన్లకు 7.60 శాతం వడ్డీ రేట్లు ఉన్నాయి. పోస్టాఫీస్ టర్మ్ డిపాజిట్లలో రెండేళ్ల వ్యవధిపైనా వడ్డీ రేటు 7 శాతంగానే ఉంది. అంటే సీనియర్ సిటిజెన్లకే బ్యాంక్ ఎఫ్‌డీల్లో కాస్త ఎక్కువ వడ్డీ రేట్లు ఉన్నాయి. అదే సాధారణ ప్రజలతో చూస్తే.. పోస్టాఫీస్ మహిళా సమ్మాన్ స్కీంలోనే అధిక లాభం వస్తుందని గ్రహించాలి.