షేక్ హసీనా కుటుంబ చరిత్ర మార్చేస్తున్న బంగ్లాదేశ్

బంగ్లాదేశ్ తాత్కాలిక ప్రభుత్వం.. మాజీ ప్రధాని షేక్ హసీనా కుటంబ చరిత్రను మార్చేస్తుంది. ముఖ్యంగా పాఠ్య పుస్తకాల్లో.. 1971 బంగ్లాదేశ్ లిబరేషన్ వార్ సందర్భంగా స్వాతంత్ర ప్రకటన చేసింది జియావుర్ రహ్మాన్‌గా మార్పులు చేసింది. గతంలో ఈ ప్రకటన చేసింది షేక్ హసీనా తండ్రి షేక్ ముజిబుర్ రహ్మాన్ చేసినట్లుగా ఉండేది. ఇవి మాత్రమే కాకుండా పాఠ్యాంశాల్లో కూడా అనేక మార్పులు చేపట్టినట్లు తెలుస్తోంది. ఈ పూర్తి వివరాలు ఏంటో మనం ఇప్పుడు తెలుసుకుందాం.

1971వ సంవత్సరం మార్చి 26వ తేదీన జియావుర్ రహ్మాన్ స్వాతంత్ర ప్రకటన చేశారని అలాగే మార్చి 27వ తేదీన జంగబంధు ముజిబుర్ రెహ్మాన్ తరఫున కూడా ఇలాంటి ప్రకటనే వెలువరించినట్లు బంగ్లాదేశ్ తాత్కాలిక ప్రభుత్వం పాఠ్య పుస్తకాల్లో ముద్రించింది. ఈ విషయాన్ని నేరుగా కరికులమ్ టెక్స్ట్ బుక్ బోర్డ్ ప్రొఫెసర్ ఏకేఎం రియాజుల్ హుస్సేన్ తెలిపారు. ముఖ్యంగా పాఠ్య పుస్తకాల్లో "ఫాదర్ ఆఫ్ ది నేషన్" గా ముజిబుర్ రెహ్మాన్ ఉండగా.. దాన్ని కూడా తొలగించినట్లు వివరించారు.

జనవరి ఒకటో తేదీ నుంచే కొత్త పుస్తకాల పంపిణీ

అలాగే ప్రైమరీతో పాటు సెకండరీ విద్యార్థుల పాఠ్య పుస్తకాల్లోనూ అనేక మార్పులు చేపట్టారని పేర్కొన్నారు. అయితే ఇందుకు సంబంధించిన సమాచారాన్ని పరిశోధకుడు రఖల్ రహా ఇచ్చినట్లు రియాజుల్ వెల్లడించారు. అలాగే పాఠ్య పుస్తకాల్లో మార్పుల గురించి రఖల్ రహా మాట్లాడుతూ.. పాక్ ఆర్మీ వద్ద బందీగా ఉన్న సమయంలో షేక్ ముజిబుర్ రెహ్మాన్ వైర్ లెస్ సెట్ ద్వారా స్వాతంత్ర ప్రకటన చేశారని చెప్పడంలో ఎలాంటి వాస్తవాలు లేవని వెల్లడించారు. ఇదంతా బలవంతంగా రుద్దిన చరిత్ర అంటూ వ్యాఖ్యానించారు. అందుకే తాము వీటిని మార్చినట్లు స్పష్టం చేశారు. అలాగే మార్చిన పాఠ్య పుస్తకాలను జనవరి ఒకటో తేదీ నుంచి విద్యార్థులకు పంపిణీ చేస్తున్నట్లు వివరించారు.

బంగ్లాదేశ్‌లో పాఠ్య పుస్తకాల మార్పిడి చాలా ఏళ్లుగా సాగుతూనే వస్తుంది. ముఖ్యంగా అధికారంలో ఏ ప్రభుత్వం ఉంటే.. తమకు అనుగుణంగా స్వాతంత్ర ప్రకటన అంశంలో మార్పులు జరుగుతున్నాయి. అయితే అవామీ లీగ్ పార్టీకి చెందిన వాళ్లు ముజిబుర్ రహ్మీన్, నాటి మేజర్ జియావుర్ రహ్మాన్‌తో కలిసి ఈ ప్రకటన చేసినట్లు చెబుతారు. ముఖ్యంగా ముజిబ్ ఆదేశాల మేరకు జియావుర్ ప్రకటన చదివిన వాదిస్తారు. కానీ బీఎన్‌పీ మాత్రం జియావుర్ స్వయంగా ఈ ప్రకటన చేసినట్లు వివరిస్తోంది.