దేశమంతా అవినీతి కేన్సర్‌లా విస్తరించింది.. శ్రీలంక అధ్యక్షుడు సంచలన వ్యాఖ్యలు

అవినీతిపై శ్రీలంక అధ్యక్షుడు అనుర కుమార దిసనాయకే సంచలన వ్యాఖ్యలు చేశారు. దేశం మొత్తం అన్ని వ్యవస్థల్లోనూ అవినీతి విస్తరించిందని, చివరికి ఇది కేన్సర్‌ రోగంలా మారిపోయిందని ఆయన వ్యాఖ్యానించారు. అవినీతిని నిర్మూలకు సమష్టి కృషి అవసరమని ప్రజలకు శ్రీలంక అధ్యక్షుడు పిలుపునిచ్చారు. నూతన సంవత్సరం సందర్భంగా రాజధాని కొలంబొలో ప్రెసిడెన్షియల్‌ సెక్రటేరియట్‌లో ఏర్పాటు చేసిన కార్యక్రమంలో ఆయన ఈ వ్యాఖ్యలు చేయడం గమనార్హం.

‘ప్రభుత్వ యంత్రాంగం, రాజకీయ సంస్థలు సహా సమాజంలో అన్ని చోట్ల అవినీతి రాజ్యమేలుతోంది.. అసమర్థత, అధికార దుర్వినియోగం సహా ఇతర సమస్యలతో దేశం సతమతమవుతోంది.. అవినీతి దేశమంతటా వ్యాపించి కేన్సర్‌లా మారింది.. దాన్ని నిర్మూలించాలంటే సమష్టి కృషి ఎంతో అవసరం’ అని పేర్కొన్నారు. అధికారులు తమ విధులను నిజాయతీ, శ్రద్ధతో నిర్వర్తించాలని దిసనాయకే సూచించారు.

‘‘ప్రస్తుతం శ్రీలంక తీవ్ర సవాళ్లను ఎదుర్కొంటోంది.. మోసంలేసి, అవినీతి రహిత దేశంగా రూపుదిద్దుకోవడంలో నేర పరిశోధన విభాగం, న్యాయవ్యవస్థ పాత్ర కీలకం. ఈ సంస్థలు అంకితభావంతో పనిచేస్తున్నాయని విశ్వసిస్తున్నా’’ అని చెప్పారు. ఇక, 2023లో మానవ ప్రమేయం వల్ల 484 ఏనుగులు మృతి చెందాయని.. అలాగే, వాటి దాడుల్లో 181 మంది ప్రాణాలు కోల్పోయారని శ్రీలంక అధ్యక్షుడు గుర్తు చేశారు. పర్యావరణం, మంచి వాతావరణం ఉన్నప్పటికీ మూగజీవాలు చనిపోవడం బాధాకరమని చెప్పారు.

వరదలు, కొండచరియలు వంటి ప్రకృతి వైపరీత్యాల కారణంగా జనజీవనం అస్తవ్యస్తమవుతోందని, దాని ఫలితంగా ఎంతో మంది ఇతర ప్రాంతాలకు వలస పోతున్నారని అన్నారు. దీని వల్ల దేశానికి ఆర్థికంగా ఎంతగానో నష్టం వాటిల్లుతోందని ఆయన వివరించారు. ఇలాంటి తప్పిదాలు పునరావృతం కాకుండా చర్యలు చేపట్టేందుకు భవిష్యత్తు ప్రణాళిక సిద్ధం చేయాలని అధికారులకు ఆయన సూచించారు. 2022లో గత ఏడు దశాబ్దాల్లో ఎన్నడూ లేనంతగా శ్రీలంక తీవ్ర ఆర్ధిక సంక్షోభంలో కూరుకుపోయింది. రెండేళ్ల కిందట మహీంద్ర రాజపక్స కుటుంబానికి వ్యతిరేకంగా అక్కడ ప్రజలు వీధుల్లోకి వచ్చి.. ఏకంగా అధ్యక్ష భవనంపైనే దాడికి దిగిన విషయం తెలిసిందే.