పెళ్లికాని జంటలకు ఓయో షాక్.. కొత్త రూల్స్.. రూమ్ కావాలంటే అలా చేయాల్సిందే!

ప్రముఖ హోటల్ అగ్రిగేటర్ ఓయో షాకింగ్ నిర్ణయం తీసుకుంది. హోటల్ బుకింగ్స్‌ కొత్త చెక్- ఇన్ పాలసీ ప్రకటించింది. ఈ ఏడాదిలో పాటించాల్సిన కొత్త మార్గదర్శకాలను తీసుకొచ్చింది. ఈ కొత్త రూల్స్‌లో భాగంగా ఇకపై పెళ్లి కాని జంటలకు రూమ్ బుక్ చేసుకునే సదుపాయాన్ని తొలగించింది. ఇది పెళ్లి కాని జంటలకు షాకింగ్ విషయమనేని చెప్పాలి. అయితే, ఈ కొత్త నిబంధనలు మొదటగా మేరఠ్ నగరంలో అమలులోకి తీసుకొస్తున్నట్లు ఓయో రూమ్స్ తెలిపింది. ఈ మేరకు ఆదివారం ఓ ప్రకటన జారీ చేసింది.

ఓయో కొత్త చెక్- ఇన్ పాలసీ ప్రకారం ఇకపై పెళ్లి కాని జంటలకు రూములు ఇవ్వరు. ఇకపై ఆన్‌లైన్ లేదా ఆఫ్‌లైన్‌లో రూమ్స్ బుకింగ్ చేసుకునే సమయంలోనే రూల్స్ కచ్చితంగా పాటించాల్సి ఉంటుంది. అన్ని జంటలు పెళ్లి చెల్లుబాటు అయ్యో రుజువును సమర్పించాల్సి ఉంటుంది. అంటే కచ్చితంగా పెళ్లిని నిర్ధారించే ధ్రువీకరణ పత్రాన్ని చూపించాలి. ఎలాంటి రుజువులు లేని, రుజువులు చూపించినా ఎలాంటి సందర్భంలోనైనా ఇలాంటి బుకింగ్స్‌ను తిరస్కరించే విచక్షణాధికారాన్ని తమ భాగస్వామి హోటళ్లకు అందిస్తున్టన్లు ఓయో తెలిపింది. మేరఠ్‌లోని భాగస్వామ్య హోటళ్లోనే మొదటగా ఈ కొత్త చెక్- ఇన్ పాలసీ అమలులోకి తీసుకురావాలని నిర్ణయించినట్లు పేర్కొంది. గ్రౌండ్ ఫీడ్ బ్యాక్ ఆధారంగా మరిన్ని నగరాలకు విస్తరించే అవకాసం ఉందని తెలిపింది.

సురక్షితమైన, బాధ్యతాయుతమైన ఆతిథ్య పద్ధతులను అమలు చేసేందుకు ఓయో సంస్థ కట్టుబడి ఉందని ఆ సంస్థ నార్త్ ఇండియా రీజియన్ హెడ్ పవాస్ శర్మ పేర్కొన్నారు. విద్యార్థులు, ఒంటరిగా ప్రయాణాలు చేసే వారికి సురక్షితమైన వసతి కల్పించే బ్రాండ్‌గా నిలవాలని ఓయో భావిస్తున్నట్లు తెలిపారు. అందులో భాగంగానే కొత్త చెక్ ఇన్ పాలసీ తీసుకొచ్చామన్నారు. కస్టమర్లలో ఓయోపై విశ్వాసం పెరిగి, బుకింగ్స్ పెరిగేందుకు ఈ నిర్ణయం ఉపయోగపడుతుందని ఆయన చెప్పారు.

అయితే, కొత్త చెక్- ఇన్ పాలసీ ప్రకారం పెళ్లి అయినట్లు ఐడీ ప్రూఫ్ చూపించాల్సి ఉంటుందన్న అంశంపై గందరగోళం నెలకొంది. వ్యాలిడ్ ప్రూఫ్‌గా ఏయో పత్రాలు చూపించాలనే అంశంపై ఓయో రూమ్స్ ఎలాంటి స్పష్టత ఇవ్వలేదు. తొలుత మేరఠ్‌లో కొత్త నిబంధనలు అమలు చేస్తుండగా.. అక్కడ కస్టమర్ల నుంచి వచ్చే స్పందన ఆధారంగా ముందు ముందు మరిన్ని రూల్స్ అమలులోకి తీసుకొచ్చే అవకాశం ఉందని సంబంధిత వర్గాలు పేర్కొన్నాయి.