నెలకు రూ.5 వేల పెన్షన్.. కేంద్రం నుంచి 4 గొప్ప పథకాలు.. అర్హతలు సహా వివరాలివే

ఉద్యోగం చేస్తున్నప్పుడే రిటైర్మెంట్ కోసం ఆలోచించాలని ఆర్థిక నిపుణులు ఎప్పుడూ చెప్తుంటారు. పదవీ విరమణ తర్వాత ఆర్థిక భరోసా కల్పించే యాన్యూటీ పథకాల్లో పెట్టుబడి పెట్టడం చిన్నతనం నుంచే మొదలు పెట్టాలంటారు. ఇలా మీరు కూడా రిటైర్మెంట్ తర్వాత నెల నెలా పెన్షన్ రావాలని కోరుకుంటున్నారా? అయితే, కేంద్ర ప్రభుత్వం అందించే 4 గొప్ప పథకాలు అందుబాటులో ఉన్నాయి. ఈ పెన్షన్ స్కీమ్స్ ద్వారా వృద్ధాప్యంలో ఆర్థిక భరోసా కలుగుతుంది. ఈ పథకాల ద్వారా ప్రతీ నెలా స్థిరమైన ఆదాయం వస్తుంది. కేంద్ర సర్కార్ పలు రకాల పెన్షన్ పథకాలు అందిస్తోంది. ఆ 4 పథకాల వివరాలు తెలుసుకుందాం.

నేషనల్ పెన్షన్ సిస్టమ్

నేషనల్ పెన్షన్ సిస్టమ్ అత్యంత ఆదరణ పొందిన స్కీమ్. కేంద్ర ప్రభుత్వం నేతృత్వంలో పీఎఫ్ఆర్‌డీఏ ఈ పథకాన్ని నిర్వహిస్తోంది. ఈ పథకంలో చేరినట్లయితే మెచ్యూరిటీ తర్వాత ఒకేసారి పెద్ద మొత్తంలో కార్పస్ లభిస్తుంది. ప్రతి నెలా పెన్షన్ అందుకోవచ్చు. అలాగే ట్యాక్స్ బెనిఫిట్సూ ఉంటాయి. 60 ఏళ్లు లేదా 70 ఏళ్ల వయసు వచ్చాక ప్రతి నెలా డబ్బులు వచ్చేలా ఏర్పాటు చేసుకోవచ్చు.

ఇందిరా గాంధీ నేషనల్ ఓల్డ్ ఏజ్ పెన్షన్

ఇందిరా గాంధీ నేషనల్ ఓల్డ్ ఏజ్ పెన్షన్ స్కీమ్ ద్వారా నెల నెలా పెన్షన్ లభిస్తుంది. 60- 79 ఏళ్ల వయసు, బీపీఎల్ కేటగిరిలో ఉన్నట్లయితే నెల నెలా రూ.300 చొప్పున స్టైఫండ్ లభిస్తుంది. 80 ఏళ్ల వయసు దాటితే నెలకు రూ. 500 చెల్లిస్తారు. ఈ స్కీమ్ కోసం ఎలాంటి కంట్రిబ్యూషన్ చేయాల్సిన పని లేదు.

వరిష్ట పెన్షన్ బీమా యోజన

వరిష్ట పెన్షన్ బీమా యోజనను భారతీయ జీవిత బీమా సంస్థ ఎల్ఐసీ అందిస్తోంది. ఇందులో ఒకేసారి పెట్టుబడి పెట్టాలి. తర్వాత నెల నెలా పెన్షన్ వస్తుంది. ఇందులో 9 శాతం వరకు వడ్డీ గ్యారంటీ ఉంటుంది. ఇందులో చేరాక 15 ఏళ్ల తర్వాత తమ డబ్బులు వెనక్కి తీసుకోవచ్చు. మీ డబ్బులు మీకు వెనక్కి వచ్చేస్తాయి. అలాగే నెల నెలా పెన్షన్ లభిస్తుంది. 60 ఏళ్ల వయసు ఉన్న వారు అర్హులు. ఈ స్కీమ్ 2014 నుంచి అందుబాటులోకి వచ్చింది.

అటల్ పెన్షన్ యోజన

అటల్ పెన్షన్ పథకానికి సైతం అత్యంత ఆదరణ లభిస్తోంది. అసంఘటితర రంగాల కార్మికులకు ఈ స్కీమ్ ద్వారా ప్రయోజనం కల్పించాలని లక్ష్యం పెట్టుకుంది కేంద్రం. ఇందులో నెలకు రూ.1000 నుంచి రూ. 5 వేల వరకు పెన్షన్ లభిస్తుంది. అది ఇన్వెస్ట్ చేసే మొత్తంపై ఆధారపడి ఉంటుంది. 18 ఏళ్ల నుంచి 40 ఏళ్ల వరకు వయసు వారు ఇందులో చేరొచ్చు. 60 సంవత్సరాలు వచ్చిన తర్వాత పెన్షన్ ప్రారంభమవుతుంది.