ఛాయ్ బిస్కెట్లతోనే రూ.20 వేల కోట్లు.. 'కుంభమేళా'తో భారీ ఆదాయం.. దేనికి ఎంత లెక్కలివే.

ప్రపంచంలోనే అతిపెద్ద మానవ సమ్మేళనం మహా కుంభమేళా ఉత్తర్ ప్రదేశ్‌లోని ప్రయాగ్‌రాజ్‌లో అట్టహాసంగా ప్రారంభమైంది. జనవరి 13న మొదలైన ఈ మహా కుంభమేళా 45 రోజుల పాటు కొనసాగనుంది. ప్రపంచం నలుమూలల నుంచి భక్తులు ఈ మహా కుంభమేళాకు హాజరు కానున్నారు. ఈసారి 40 కోట్ల మంది ప్రయాగ్‌రాజ్‌లో పుణ్య స్నానాలు ఆచరిస్తారని అంచనాలు ఉన్నాయి. అయితే, ఆధ్యాత్మికతే కాదు.. వ్యాపార పరంగాను అతిపెద్ద కార్యక్రమంగానూ చెప్పవచ్చు. మహా కుంభమేళా ద్వారా ఈసారి రూ.2 లక్షల కోట్ల ఆదాయం వస్తుందని కాన్ఫిడరేషన్ ఆఫ్ ఆల్ ఇండియా ట్రేడర్స్ అంచనా వేసింది. నెల రోజులకు పైగా జరిగే ఈ కార్యక్రమంతో స్థానిక వ్యాపార, పర్యాటక, ఉద్యోగ రంగానికి కీలకంగా మారనుందని తెలిపింది.

మహా కుంభమేళా లో ఆర్థిక పరంగా చూస్తే ఆతిథ్య, పర్యాటక రంగాలు ప్రధాన పాత్ర పోషిస్తాయని ట్రేడ్ బాడీ సీఏఐటీ తెలిపింది. స్థానిక హోటళ్లు, గెస్ట్ హౌసులు, తాత్కాలిక నివాస ఏర్పాట్లతోనే ఈసారి ఏకంగా రూ. 40 వేల కోట్లు బిజినెస్ జరుగుతుందని అంచనా వేసింది. ‘మహా కుంభ్ పెద్ద ఎత్తున ఆర్థిక, వాణిజ్య కార్యకలాపాలకు నిలయంగా మారుతుంది. మతపరమైన ప్రయాణాల సమయంలో ఒక్కో వ్యక్తికి సగటున రూ.5 వేల ఖర్చు చేస్తే మొత్తం ఖర్చు రూ.2 లక్షల కోట్లు దాటుతుందని ఒక అంచనా. ఇందులో హోటళ్లు, గెస్ట్ హౌసులు, తాత్కాలిక వసతి, ఆహారం, మతపరమైన వస్తువులు, ఆరోగ్య సంరక్షణ, ఇతర సేవలపై ఖర్చు ఉంటుంది’ అని సీఏఐటీ సెక్రెటరీ జనరల్ ప్రవీన్ ఖండేల్వాల్ తెలిపారు.

  ఛాయ్ బిస్కెట్స్‌తో రూ.20 వేల కోట్లు..

కుంభమేళాలో ఆహారం, పానీయాల రంగం కీలకంగా మారనుందని సీఏఐటీ తెలిపింది. ప్యాకేజ్డ్ ఫుడ్, నీళ్లు, ఛాయ్ బిస్కెట్లు, పండ్ల రసాలు, మీల్స్ లాంటి వాటితోనే ఈసారి రూ.20 వేల కోట్ల వ్యాపారం జరుగుతుందని అంచనా వేసింది. ఆ తర్వాత ఆధ్యాత్మిక వస్తువులైన నూనె, దీపాలు, గంగా వాటర్, దేవుడి విగ్రహాలు, ఆధ్యాత్మిక పుస్తకాలు లాంటి వాటితో మరో రూ.20 వేల కోట్ల బిజినెస్ అంచనా వేసింది.

వీటితో పాటు రవాణా, లాజిస్టిక్స్ రంగంలో స్థానిక, అంతర్రాష్ట్ర సేవలు, సరకు రవాణా, టాక్సీలు సహా మొత్తం రూ.10 వేల కోట్ల బిజినెస్ అంచనా. ఇక టూరిజం సర్వీసుల విషయానికి వస్తే టూర్ గైడ్స్, ట్రావెల్ ప్యాకేజీలు, అనుబంధ కార్యక్రమాలతో మరో రూ.10 వేల కోట్లు బిజినెస్ జరుగుతుందని సీఏఐటీ తెలిపింది.

తాత్కాలిక మెడికల్ క్యాంపులు, ఆయుర్వేద ఉత్పత్తులు, ఔషధాలు వంటి వాటితో రూ.3 వేల కోట్ల ఆదాయం సమకూరనుంది. అలాగే ఇ-టికెటింగ్, డిజిటల్ పేమెంట్స్, వై-ఫై సర్వీసులు, మొబైల్ ఛార్జింగ్ స్టేషన్ల వంటి సెక్టార్లతో మరో రూ.1000 కోట్ల బిజినెస్ జరగనుంది. ఇక ఎంటర్‌టైన్‌మెంట్, మీడియా రంగంలో ప్రకటనలు, ప్రమోషన్లతో రూ.10 వేల కోట్లు ఆదాయం అంచనా వేసింది. ఈ క్రమంలోనే ఉత్తర్ ప్రదేశ్ ప్రభుత్వం మహా కుంభ మేళాకు అధిక ప్రాధాన్యత కల్పించింది. స్థానిక ఆర్థిక వ్యవస్థ వృద్ధికి ఈ కార్యక్రమం ఎంతగానో తోడ్పడనుంది.