మరో 5 బ్యాంకుల ప్రైవేటీకరణ.. వాటా అమ్మేస్తున్న కేంద్రం.. లిస్ట్ ఇదేనా

 ప్రభుత్వ సంస్థలు, బ్యాంకుల ప్రైవేటీకరణ ప్రక్రియ అనేది నిరంతర ప్రక్రియగా కేంద్రం పలు సందర్భాలుగా వెల్లడించిన సంగతి తెలిసింది. అయితే, గత కొన్ని నెలలుగా ప్రభుత్వ సంస్థల్లో వాటాల విక్రయంపై వెనక్కి తగ్గిన కేంద్రం మళ్లీ ఆ దిశగా అడుగులు వేస్తున్నట్లు తెలుస్తోంది. 5 ప్రభుత్వ రంగ బ్యాంకుల్లో ప్రభుత్వ యాజమాన్యంలోని వాటాను తగ్గించుకోవాలని కేంద్రం భావిస్తోందట. ఈ మేరకు ప్రభుత్వ అధికారి ఒకరు తెలిపినట్లు ఎకనామిక్ టైమ్స్ ఓ కథనం ప్రచురించింది. ప్రభుత్వ వాటాను తగ్గించుకోవడం లేదా బ్యాంకులే షేర్లను విక్రయించే అవకాశం ఉందని అధికారి తెలిపినట్లు పేర్కొంది. దీని ద్వారా కనీస ప్రజా వాటా నిబంధనలను చేరుకోవాలని భావిస్తోందటా.

లిస్టులోని బ్యాంకులు ఇవేనా?

వాటా విక్రయాలు చేపట్టాలని భావిస్తున్న ప్రభుత్వ బ్యాంకుల్లో యూకో బ్యాంక్, సెంట్రల్ బ్యాంక్ ఆఫ్ ఇండియా, ఇండియన్ ఓవర్సీస్ బ్యాంక్, బ్యాంక్ ఆఫ్ మహారాష్ట్ర, పంజాబ్ అండ్ సింధ్ బ్యాంకులు ఉన్నట్లు తెలుస్తోంది. ఆయా బ్యాంకుల షేర్లు విక్రయించేందుకు డిపార్ట్‌మెంట్ ఆఫ్ ఇన్వెస్ట్‌మెంట్ అండ్ పబ్లిక్ అసెట్ మేనేజ్మెంట్‌కి కేంద్ర అనుమతులు ఇచ్చిందని సదరు ప్రభుత్వ అధికారి తెలియజేసినట్లు ఈటీ పేర్కొంది. అయితే పెద్ద ఇన్వెస్టర్లకు షేర్లు విక్రయించడం అనేది రెండో ఆప్షన్‌గా తెలిపారు. ప్రభుత్వ ప్రధాన లక్ష్యం ఆయా బ్యాంకుల్లో తమ వాటాను 75 శాతం దిగువకు తగ్గించుకోవడమేనని తెలిపారు.

వాటాల విక్రయం ద్వారా బ్యాంకుల లిక్విడిటీని బలపరుస్తుందని, ఆర్థిక వృద్ధి మందగించిన నేపత్యంలో బ్యాంకింగ్ రంగ ఆస్తి నాణ్యత పెంచడం, రుణ వితరణ మెరుగుపడుతుందని కేంద్రం భావిస్తున్నట్లు తెలుస్తోంది. ప్రభుత్వ బ్యాంకుల్లో వాటా విక్రయంపై వార్తలు వస్తున్న క్రమంలో యుకో బ్యాంక్ షేర్లు అక్టోబర్, 2003 తర్వాత ఇప్పుడు ఒక్కరోజే 20 శాతం మేర పెరిగాయి. అలాగే ఇండియన్ ఓవర్సీస్ బ్యాంక్ షేర్లు 2009 తర్వాత ఒక్కరోజే 20 శాతం మేర పెరిగినట్లు తెలుస్తోంది. గత ఏడాది కాలంగా చూస్తే బ్యాంకు స్టాక్స్ నష్టాల్లో ట్రేడవుతున్నా చాలా మంది ఇన్వెస్టర్లు ప్రభుత్వ రంగ బ్యాంకులపై నమ్మకంగా ఉన్నారు. గత 12 నెలల్లో ప్రభుత్వ బ్యాంకుల నిఫ్టీ ఇండెక్స్ 4 శాతం మేర పెరిగింది. ప్రైవేట్ బ్యాంక్స్ ఇండెక్స్ 3.6 శాతం పడిపోయింది.